Хоть София и пуста, да не Крутицким верста (София новгородская; духовенство новгородское не хотело подчиниться митрополитам московским на Крутицком подворье).  В.И.Даль Русь-родина

Духовная Грамота (первая) Великого Князя Дмитрия Иоанновича: о учинении наследником движимому и недвижимому имению сына своею Князя Василия Димитриевича. — Писанная при Митрополите Алексее  1371 года.

 ......................моимъ детемъ.............. Замошьскую свободу, Руза, Угожь, ..........дъ, Вышегородъ, Истерва, Дмитрьева свобода, ...............ми селы, и зъ бортники и съ оброчники и съ мыты.

А что буди прикупилъ или примыслилъ или починковъ, или которая будеть села Отца моего Великомъ Княженье купля, или моя села купленая, или брата моего села Княжи Ивановы, те села и починки сыну моему Князю Василью, и моей Княгини и моимъ детемъ.

А чимъ мене благословилъ Отець мой Князь Великий которымъ золотомъ, суды, или доспехъ, или что язъ примыслилъ, то золото и шапку золотую, и чепь и сабли золотые, и порты саженые, и суды золотые и серебреные суды, и кони и жеребьци и стада своя далъ есмь своему сыну Князю Василью, и своей Княгине и своимъ детемъ.

А что Отець мой Князь Великий .... село Павловьское къ святому Олександру, а къ святей Богородици на Круцицю четвертую часть исъ тамги исъ Коломеньское, а костки Московьские къ святей Богородици на Москве у святого Михаило; а того не подвигнуть.

А что моихъ казначеевъ, или посельскихъ и тивуновъ и деяковъ, хто что отъ мене ведали, те все сыну моему Князю Василью, ни моей Княгини, ни моимъ детемъ не надобны.

А что моихъ людий купленыхъ, а тымъ далъ есмь свободу; а сынъ мой Князь Василий и моя Княгиня и мои дети не приимають ихъ.

А сю грамоту писалъ есмь собе душевную, и явилъ есмь отцю своему Олексею Митрополиту всея Руси, и отецъ мой Олексей Митрополитъ всея Руси и печать свою привесилъ къ сей грамоте.

А послуси на сю грамоту Тимофей Околничий Васильевичь, Иванъ Родивоновичь, Иванъ Федоровичь, Федоръ Андреевичь. А грамоту писалъ дьякъ Нестеръ.

А хто иметъ сю грамоту чимъ рушати, на его души.

К сей Грамоте, у коей начала недостает, привешены две печати серебреные позолоченные.

(Перепечатано изъ С. Г. Г. и Д., т. I, № 30, стр. 51).