А СЕ РУКОПИСАНИЕ КНЯЗЯ ВСЕВОЛОДА.

Се азъ князь великыи Гавриилъ, нареченыи Всеволод, самодержець Мстиславець, внукъ Володимеровъ, властвующе всею Рускою землею и властию Новгородскою, и божиимъ благоволениемъ поставилъ есмь церковь святыи Иванъ великыи на Петрятинѣ дворищи; и устроилъ есмь иконами многоцѣнными и еуангелии многоцѣнными и всѣми книгами исполонь; и устроилъ есми попы, и диакона, и дияка къ съборнои великои церкве.

А даю святому великому Ивану от своего великого имѣния на строение церкви и въ вѣхы: вѣсъ вощанои, а в Торшку даю пуд вощаныи, половина святому Спасу, а половина святому великому Ивану на Петрятино дворище; а оброкъ даю попомъ, и диякону, и диаку, и сторожамъ из вѣсу изъ вощаного имати попамъ по осми гривенъ сребра, диакону 4 гривны сребра, диаку 3 гривны сребра; а имати имъ тои оброкъ и в вѣкы, по моему данию князя великого Всеволода.

А попомъ пѣти у святого великого Ивана вседѣннаа, у святого Захарии на полатѣх пѣти по недѣлямъ и в вѣкы; а дьякону пѣти у святого Ивана субота да недѣля изъ того оброка и в вѣхы.

А язъ князь великыи  Всеволодъ поставилъ есмь святому Ивану 3 старосты от житьихъ людии и от черных тысячкого, а от купьцевъ 2 старостѣ, управливати имъ всякаа дѣла торговаа Иваньскаа и гостиннаа; а Мирославу посаднику в то не въступатися, ни инымъ посадникамъ въ Иваньское ни въ чтоже, ни бояромъ новгородскымъ.

А кто хочеть въ купечество вложитися въ Иваньское, и дасть купцамъ пошлымъ людемъ вклада 50 гривенъ сребра, а тысячскому сукно ипьское; ино купцамъ положити въ святыи Иванъ полътретьятьцать гривенъ серебра; а не вложится въ купечьство, а не дасть пятидесять гривенъ сребра, ино то не пошлыи купець; а пошлымъ купцамъ ити имъ пошлиною и вкладомъ и отчиною.

А вѣсъ вѣсити въ притворѣ святого Ивана; гдѣ дано, ту его и дръжати; а вѣсити старостамъ иваньскыимъ двѣма, купцамъ пощлымъ, добрымъ людемъ; а непошлымъ купцамъ старощениа имъ не дръжати, ни вѣсу имъ не вѣсити Иваньского.

А у гостя имати у низовьского от дву берковьсковъ от вощаных полъгривны сребра да гривенка перцю; а у полочкого и у смоленьского по двѣ гривны кунъ от берковьскаго от вощаного; а у новоторжанина полторы гривны кунъ от берковьска от вощаного; а у новгородьца 6 мордокъ от берковьска отъ вощянаго; а куны класти в домъ святого Ивана великаго, что вывѣсять по правому слову; а новоторжьцу в бологодѣть не вѣсити ни у которогоже гостя.

А по моемъ животѣ великого князя Всеволода стояти за домъ святого Ивана великого брату моему князю великому всея Руси и владыцѣ новгородскому, и за вся церковникы святого Ивана. А взяти князю великому из вѣсу из вощаного полътретьятьцать сребра чрес год.

А праздникъ рожество святого великого Ивана почесть творить и праздновати старостамъ иваньскымъ купцамъ; а пѣть въ праздникъ обѣдняа владыцѣ, а на завътрѣе архимандриту святого Георгия, а на 3 день игумену святѣи богородици изъ Онтонова манастыря.

А взяти владыцѣ дару рубль; а князя великого намѣстникомъ дару по сукну ипьскому, а дати имъ 20 пудовъ меду на подсласту чистого пошлины; а дворечьскому сукно ипьское, а 10 пудовъ меду на подсласту чистого пошлины по; а тиуну дару сукно тумаское, а дати ему 5 пудовъ меду на подъсласту чистого пошьлины по; архимандриту взяти дару сукно ипьское; а игумену Онтоновьскому взяти дару полтина, а пошлины от него идеть 40 колачевъ да сорокъ хлѣбовъ да калуста и уксусъ.

А буевище Петрятино дворище от прежнихъ дверии святого Ивана до погреба, а от погреба до Кончяньскаго мосту; а с того буевища имать куны старостѣ Иваньскому и Поберескому, тыи куны къласти в домъ святого Ивана великаго.

А поповъ, и дьякона, и дьяка, и сторожовъ святого Ивана призирати старостамъ Иваньскымъ, и старостамъ Паберескымъ, и пабережанамъ.

А в дому святого Ивана великого не держати никому ничегоже, развѣе свѣчь и тѣмиана.

А городу, ни владыкѣ, ни бояромъ вѣсу не отъимати у святого Ивана великого, ни продавати моего даниа князя великого Всеволода.

А кто почнеть вѣсъ отъимати или продавати, или дэмъ оби. дити святого и великого Ивана и святого пророка Захарии, ино на того Спасъ и Пречистаа и святыи великии Иванъ и святыи пророкъ Захарии; и будеть имъ тма и огнь и съблазнъ и казни божия.