| 21.11.2026, 06:55 | |
Не хочешь слушать как люди врут, сам ври В.И.Даль Неправда - ложь Послания Ивана Грозного Ответ Яну Роките 3 убо мое слово Да писал еси так, что будто ты учишь всякому християнину полную вѣру имѣти всѣмъ писмом святымъ, что сколко пророцы, и евангелисты, и апостолы научили и на писмѣ подали, чудесы великыми запечатлѣли. И вы сами, что учите, то и разоряете, понеже убо вси уставы святыхъ отецъ развратисте и отвергосте. Господу нашему Исусу Христу во Евангелии глаголющу: «Шедше научите вся языки, крещаше их во имя Отца и Сына и Святого Духа, учаще ихъ блюсти вся, елико заповѣдах вамъ. И се аз с вами есжь вся дни до скончания вѣка. Аминь». Смотри убо сего, како обѣщевается «и до скончания вѣка». Гдѣ убо нынѣ суть апостоли? Не якоже ли по его божественому словеси, идѣже убо бяше труп божественаго его воплощения со Отцем сѣдяй, тому бо божественнии орли апостоли собрашася. Или убо нынѣ Христа нѣсть с вѣрными? Еже да не будет, но сего ради наведе и рече «до скончания вѣка», а не рече «до скончания вашего». Они убо, яко добрии строителие благодати Владычне послуживше, на небесныя востекоша, радующеся. Господь нашъ Исус Христос смотрения исполнивъ тайну, пославъ божественыя ученики и апостолы на проповѣдь, и при них, и по них, и доселе пребываетъ съ вѣрными, – и до скончания вѣка, даже до втораго его пришествия, иже приидет судити живым и мертвымъ. По неложному обѣщанию с вѣрными пребудет и якоже при божественнѣй своей страсти плотскаго смотрения исполняет тайну, моля Отца своего о ученицѣх и о всемъ мирѣ и рече: «Якоже мене пославъ иже в мир, и аз посла ихъ въ мир, и аз за них свѣщу себе, да и тии будут священнии воистинну. Не о сих молю токмо, но и о вѣрующих словесе их ради въ мя. Да вси едино суть. Яко ты, Отче, во мнѣ и азъ в тебѣ, да и тии в нас едино будут, и да мир вѣру имет, яко ты мя посла». Видиши ли, каково величество святыхъ отецъ? И Господу нашему Исусу Христу молящуся Отцу своему не токмо о одних ученицѣх, но и о всѣх вѣрующих словесе ихъ ради во нь. Да и ти въ них будутъ едино со Отцемъ и Сыномъ и Святымъ Духомъ неразлучно – не существомъ, но вѣрою и заповедей Христовых совершениемъ и тамо сущихъ в Небесномъ Царствии благъ наслаждений. Сия убо яко Отецъ въ Сынѣ и Сынъ во Отцы сотворяют человекамъ з Богом быти и въ Бозѣ пребывати заповѣдей его исполнениемъ. В Марке же глаголетъ Господь: «Знамения вѣрующим сия послѣдуют: именемъ моим бѣсы изженутъ, языки возглаголют новы; змия возмут, аще и что смертно испиютъ, не вредит ихъ, на недужныя руки возложат и здрави будут». Сия убо многая обрящиши божественными отцы сотворена. Святый Великий Василей, иже в Кесарии бывый архиепископъ, богоносному Ефрѣму Сирину дасть молитву отъ асирийска языка елински, иже глаголется гречески, глаголати. Сия убо многа въ Божественномъ Писании, аще хощеши, многа обрящеши. Аще бы убо они неистиннии пастырие были и не дверми вошли паствы Христовы пасти, не бы таких евангельскых чюдес сотворили дѣлом, яже Христос словомъ проповѣда. И како убо вы вѣру всѣмъ писмом святыхъ учите держати, сами вся Божественная Писания развративше и отвергосте? А что о чюдесѣх писалъ еси, и избранный сосуд апостолъ Павелъ къ коринфомъ в первомъ своем послании глаголет: «Знамения убо не вѣрнымъ, но невѣрным, а пророчество не невѣрным, но вѣрующим». И аще бы есте вѣрны были, и вы бы вѣровали Божественымъ Писанием, а не чюдесем дивилися. Яко во Иоанне реченно есть: рече Исус ко пришедшимъ къ нему июдеомъ: «Ищете мене, не яко видѣсте знамения, но яко яли есте хлѣбы и насытистеся. Дѣлайте не брашно гибнущее, но брашно, пребывающее в животѣ вѣчнемъ». Яко рече избранный сосудъ апостолъ Павелъ, ко евреомъ пиша, глаголет: «Бысть убо яко младенцы умом и бысть требующе млека, а не крѣпки пища. Всяк убо причащаяйся млецѣ, младенец убо есть, неискусен слову». Тако убо и вы о чюдесѣхъ внемлете, яко о млецѣ, Писания силы не разумѣсте, яко крѣпкия пища. И паки тойже Павелъ, къ коринфом пиша, рече въ первомъ Послании: «Июдѣи бо знамения просятъ, и еллины премудрости ищут. Мы же проповѣдаем Христа распята. Июдеомъ убо блазнъ, и еллином безумие. Самѣмъ званным, июдеом и еллиномъ, Христа, Божию силу и премудрость». Сия убо доздѣ.
Библиотека литературы Древней Руси / РАН. Ин-т рус. лит. (Пушкинский дом) ; под. ред. Д.С. Лихачева и др. - Санкт-Петербург : Наука, 1997-. / Т. 11: XVI век. - 2001. - 681, c. | |
|
| |
| Просмотров: 3 | Загрузок: 0 | | |
| Всего комментариев: 0 | |