Ответ Яну Роките 5 убо мое слово
Вчера, 06:38

Не хочешь слушать как люди врут, сам ври В.И.Даль Неправда - ложь

Послания Ивана Грозного

Ответ Яну Роките 5 убо мое слово

Се же писалъ еси, Адамскаго ради преступления вси ражаемся подъ завѣсою плоти и смертию осудихомся. Ино сего ради Богъ Слово плоть бысть и вселися в ны. Восхотѣвъ Богъ помиловати заблуждшаго человека, человекъ быти сподобися от пречистыя Дѣвы Мария. Понеже убо царствова смерть от Адама до Авраама, от Авраама до Моисея, а от Моисея до воплощения Христова. И не на согрѣшших царство смертное се, иже убо и праведнии и до Христова воплощения смертию осуждени Быша и во адъ идяху. По Христовѣ воплощении сего дрьзновения смерть не имѣяше, понеже убо Богъ нашъ Исус Христос обновив путь новъ и удобенъ и дѣлающимъ во благое и вѣрующимъ въ правду во спасение. Нынѣ убо смерть никакойже власти имѣяше, но яко убо вси праведнии, яко сномъ уснувше, къ вѣчному царствию преходятъ. Ни воздушныя духи не возмогутъ ихъ удержати, понеже убо добродѣтелми сиящи, свѣтлѣйши солнца явися, и никако возмогутъ удержати противнии дуси, понеже убо въ нихъ не имущи своего обрести. Якоже убо рече Господь нашъ Исус Христос во святемъ Иоанне евангелисте: «Грядетъ убо мира сего князь и во мнѣ не имать ничесоже». Тако убо и сии послѣдоваша по стопамъ Христовымъ, и князь мира сего не обретаетъ ничесоже. И сего ради на нихъ смерть царства не обрѣтает. А иже самоволно предаша себе князю мира сего и прелести его послѣдоваша, сии убо своеволне впадаютъ, подъ царство смертное подкланяются, и здѣ горестию душа злѣ от тѣла разлучаются, и тамо бесконечныя муки приемлют. Понеже убо Господь нашъ Исусъ Христос сотвори человека самовластна, яко и Адамъ преже бысть преступления, послѣдующе стопамъ Христовымъ. Адамьское преступление праведныхъ жителствомъ разрѣшается, и смерьть на них никоеяже власти имѣет. Согрѣшившимъ или отступникомъ не токмо Адамское согрѣшение на них взыскуется, но и приложение своея злобы, и сугубо от своего согрѣшения мучатся. На сих убо царьствует смерть, яко и преже, к симъ и заповѣдей Христовыхъ несохранение на нихъ испытуется. А еже к римлянеж в Послании: «Еже повинни быхомъ, июдеомъ и еллиномъ, всѣм под грѣхомъ быти». Но выше писано, яко: «У Бога нѣсть разньствия лицу». Якоже тойже святый апостолъ Павелъ пиша, глаголетъ: «Нѣсть разньствия у Бога. Варваръ и скифъ, рабъ и свобод, мужский полъ и женский – вси едино есть о Христѣ токмо дѣлы благими».

А что писалъ еси, что ни единъ себя ничимъ избавити не можетъ своими ученьми и дѣлы благими, и указал еси в римленьском Послании и къ галатомъ: «И дѣлающимъ мужемъ мзда не вменяется по благодати, но по долгу, а не дѣлающему, вѣрующему во оправдающаго нечестива, причитается вѣра его въ правду». Что убо, ко евреомъ пиша, глаголетъ? «Праведный вѣрою живъ будет. И аще обинется, не благоволит душа моя о немъ. Мы же нѣсмы обиновении в погибель, но в вѣре во снабдѣние души. Есть вѣра надѣемымъ вещемъ составъ, обличение невидимьшъ. В се бо свидѣтельствовани Быша старцы. Вѣрою разумѣваем совершитися вѣкомъ глаголомъ Божиимъ, во еже не от видимых видимымъ быти. Вѣрою множайшу быти жертву Авель паче Каина принесе Богови, еяже ради свидѣтельствованъ быти праведенъ быти. Вѣрою зовомъ Авраамъ послуша изыти въ мѣсто, иже хотяше прияти в наслѣдие, изыде, не вѣдый, камо грядетъ. Вѣрою и сама Сарра силою возложениемъ сѣмени прият и во время старости роди. Вѣрою Моисей, великъ бывъ, отврьжеся нарицатися сынъ дщери фараоновы, паче изволи страдати с людьми Божиими, нежели имѣти временнаго грѣха сладость. Больши богатство въменивъ египетскихъ сокровищь поношение Христово, взираше бо на мздовоздание. Вѣрою оставивъ Египта, не убоявся ярости царевы, невидимаго бо яко видя, терпяше».

Что убо во Ияковли Послании соборномъ глаголетъ: «Кая полза, братия моя, аще вѣру кто глаголетъ имѣти, дѣла не имать? Егда бо можетъ вѣра спасти его? Аще ли братъ и сестра нага будета и лишена будета дневныя пища, рече кто има от васъ: «Идѣта, грѣитася и с миромъ насыщаитася», и не дасть има требования телеснаго, кая полза? Сице и вѣра, аще дѣлъ не имать, мертва есть о себѣ. Но речетъ кто: Ты вѣру имаши, азъ дѣла имамъ; покажи ми вѣру твою от дѣлъ твоихъ, и азъ тебѣ покажу и от дѣлъ моих вѣру мою. Ты вѣруеши, яко единъ Богъ есть, добрѣ твориши; и бѣси вѣруют и трепещутъ. Хощеши ли разумѣти, о человече суетне, яко вѣра без дѣлъ мертва есть? Авраамъ отецъ нашъ не от дѣлъ ли оправдася, вознесъ Исаака сына своего на олтарь? Видиши ли, яко вѣра поспѣшествоваше дѣломъ его, и от дѣл совершися вѣра? И совершися Писание глаголюще: «Вѣрова Авраамъ Богови и вмѣнися ему в правду, и другъ Божий наречеся». Зрите ли убо, яко от дѣлъ оправдается человек, а не от вѣры единоя?» А что убо сотворим апостолом симъ, Павлу убо, пишущу о вѣрѣ, Иакову – о дѣле? Или мниши, яко распря бѣ въ нихъ? Ни, но великаго согласия. Единъ убо подтвержаше дѣла, друзий утвержаше вѣру. Обѣма совершитися во едину бо ползу ко спасению человеком по вѣрѣ и дѣломъ. И сего смотри Павла апостола, вѣру исповѣдающу и дѣла утвержающу. Аще бы Авель жертвы не содѣлалъ, не бы свидѣтелствован праведенъ. Аще бы Енохъ не преставленъ бысть, не бы вѣренъ был. Аще бы Ное ковчега не сотворил, не бы вѣровал. Аще не бы Авраамъ на землю обѣтованную не пришел, не бы вѣровал. Аще бы Сарра не родила Исаака, не бы вѣровала рожению сѣмени. Аще бы Аврамъ Исака на заклание не привел, не бы вѣровал, яко от мертвых воздвигнути силенъ есть Богъ; тѣмъже ино того прият, и друг Божий наречеся. Смотри и самого апостола Павла, писа о дѣлех: «Идѣже умножися грѣх, преизбыточьствова благодать. Но яко царствова грѣхъ смертию, тако и благодать воцарится правдою в жизнь вѣчную Исусом Христом Господемъ нашимъ. Что убо речемъ: да належимъ ли грѣсѣ, да благодать умножится? Да не будетъ. Имже убо умрохомъ, како паки оживемъ о немъ? Или не вѣсте, яко елицы во Христа Исуса крестихомся, во смерть его крестихомся? Яко да воста Христос от смерти со славою Отчею, тако и мы во обновлении жизни ходити начнемъ». Видиши ли, яко дѣлы благими угожати Богу?

А еже, обращая, глаголеши свыше и долу, яко чрез единаго Господа Бога нашего Исуса Христа начало спасения человекомъ, и сего ради обѣгаеши отеческаго предания, неразумия глаголеши, ни о немже утверждаешися. О семъ бо глаголетъ Писания тако, яко «Начала никто можетъ положити паче лежащаго, иже есть Христос», и еже есть основания вѣры узаконоположения, дѣлом исправления во християнствѣ. Апостоли и отцы, яко предобрии наставницы руководствующе къ Божию повелѣнию, не свѣдущемъ таиньство открываютъ и Богови наставляютъ. Якоже апостолъ Павелъ пиша к Тимофѣю: «Возмагай о благодати, яже о Христѣ Исусе. И яже слыша от мене многими свидѣтели, сия предаждь вѣрнымъ человекомъ, и доволни будутъ и иныхъ научити». Видиши ли, яко повелевает вождемъ и наставникомъ быти и иных научити? И вси убо вожди и наставницы не на своемъ основании пологаху, но ко Христову основанию вся приводяша, начало убо Христос. И апостолъ Павел, к коринфомъ пиша, глаголетъ: «Богу бо есмы поспѣшницы, Божия стяжания, Божия здания есте. По благодати Божии, даннѣй мнѣ, яко премудръ архитектон, основание положих, ин же назидает; кождо же да блюдет, како назидает. Основания бо никтоже не может положити, паче лежащаго, иже есть Христос». И паки, к Тимофѣю пиша, глаголетъ: «Благодать имамъ укрѣпльшему мя Христу Исусу Господу нашему, яко вѣрна непщева положити в службу, иже первие суща хулника, и гонителя, и досадителя, но помилован бых, яко невѣдый сотворих, въ невѣрствии; упреумножися благодать Господа нашего вѣрою и любовию еже о Христѣ Исусѣ».

Сия убо ходатай есть Господь Исусъ Христосъ к Богу и Отцу о людех. Еже плотскаго смотрения свершениемъ Адамский грѣхъ разрушается. И еже до крещения невѣдый кто что сотворит, сия убо очищаются благодатию Христовою и, яко новорожденным младенцемъ, еже от божественнаго крещения от купели исшедше, всякого грѣха на себѣ не имуще будет по крещении и вся заповѣди долженъ есть хранити. Аще ли же не сохранитъ, и ничто убо ему ползует, согрѣшившу, Христово воплощение. Аще бы Владыка о рабѣхъ сицевая пострада, како мы не хотимъ о Владыке пострадати и заповѣди соблюдати и совершати! Господу нашему Исусу Христу глаголющу: «Аще кто служитъ мнѣ, и мнѣ да послѣдствуетъ». И паки: «Не всякъ, глаголяй ми, Господи, Господи, внидетъ во Царствие Небесное, но творяй волю Отца моего, иже есть на небесѣх». Видиши ли, како не велит ленитися дѣлати дѣла благаа? И паки инде рече: «Аще не преизбудетъ правда ваша паче книжник и фарисей, и не внидѣте во Царствие Небесное».

О галатех писал еси сия, самъ славу свою разрушаеши. Сия убо писано о 2-мъ законии, отрицая  Моисеовъ закон, иже ты притекаеши. А еже писал еси, яко Иванк Предтеча показуя перстом и глаголетъ о Сыне Божии: «Се агнецъ Божий, вземляй грѣхи всего мира»; и се выше писах ти. Боюся много глаголати, да не со Июдою осужденъ буду, повѣдая врагомъ тайну. И якоже рече божественый апостолъ Павелъ, пиша к филиписеомъ: «Много глаголах вам. И нынѣ, плачя, глаголю о вразех креста Христова. Имже бог – чрево, и слава – во студ имъ, и земная мудрствующе». Паче навожу тричисленых отрокъ гласа ко Навходоносору царю: «Есть Богъ силенъ на небеси, и может нас избавити от пещи, огнемъ горящия, аще ли ни богомъ твоимъ не служимъ и тѣлу златому, еже постави, не покланяемся». Хощу бо ваше нечестие препрѣти молчаниемъ, яко и Христосъ Пилата и архиереи, неже долгими словесы. Се есть неудерьжание сластемъ и работати чреву и подпупию, еже вы на беззаконный брак разрѣшисте.

А что писал еси о воплощении Слова Божия, еретичествуя, что почался Сынъ Слово Божие от пречистыя Богородица, ино апостолъ, пиша, Павелъ к филиписеомъ глаголетъ о семъ: «Се убо да премудрствуется в вас, еже о Христе Исусе, иже во зрацѣ Божии, не восхищениемъ непщева быти равенъ Богу, но себе излия, зрак раба прием, въ подобии человечестемъ быв, и образомъ обрѣтеся яко человекъ». Видиши ли, яко не ин, воплотивыйся от Присно Дѣвы Мария, соприсносущное его Слово Божие Отцу и Духови, воплотившейся на спасение наше, заимствова плоть от Пречистыя и Приснодѣвыя Мария, той единъ Отца Сынъ собезначален, и единороден, и от Приснодѣвыя Мария воплотивыйся на спасение. «Яко всяк младенецъ мужска полу разверзает ложесна, свято Богови наречется». Совершенъ Богъ и человекъ.

А еже о страсти Христовѣ, и воскресении, и о вознесении, и о сѣдении одесную Отца, мы вѣмы. А ты како вѣси, ни писал еси. Еже посредство имѣетъ Христос о нас, и, яко рече апостолъ Павел, еже всегда проповѣдати о нас, ты убо како чтеши? Аще вѣруеши апостолским преданиемъ, въ коемъ чину ихъ самих положиши и како имъ почесть воздаси, иже таковую тайну намъ открывше и на таковый путь истинный наставившимъ и научившимъ? Кую почесть имъ подобаетъ творити!? Аще убо златокузньца обрящеши, или землѣмѣрителя, или архитектона, философию исправляюще, или строение зданиемъ строящи, или каменосѣчьца, или какоя иная земная мудрования, како учителей и наставников сихъ почтемъ, яко открывшемъ намъ премудрость и жительству строения преподавшу. И аще убо сии о тлѣнномъ и мимотекущемъ мудровании подобнимъ честемъ мздовоздаания восприимут, – въ ваших странах златокузньцы и среброкузньцы, аще кое строят дѣло работу, противу состоянию дѣлу приемлетъ множайшее сугубо, – и аще убо таковы сии достойнии почести таковым, како же не почтем убо ко благочестию насъ наставляющих, и благоразумия разумъ намъ открывающе, и уруководствующе ко Христу! Аще и по твоему слову, яко написанному, вѣровати? И аще бы не написаны бысть были Евангелия, како убо Быша разумѣли Божия Слова смотрения? Аще бы апостоли не бысть учили и послания не бысть писали, како убо разумѣли Слово Божие, къ человекомъ схожения и къ Богу человекомъ возведение? Како убо не суть божественнии апостоли и святии отцы достойны чести, и покланянию, и похвалению, иже таковый свѣт просвѣтивше душа наша, и данный имъ талантъ Господемъ умножившим, и мног прикупъ сотворившим!? Мы же, истиннии християне, вѣруем, яко ходатай есть к Богу, и начало спасению, и посредникъ о людех Христосъ Богъ наш к Богу и Отцу. Емуже, яко здания и раби суще, и страстию его спасени быхомъ, со Отцемъ и с Пресвятымъ Духомъ во едином существѣ и во триехъ лицехъ покланяемся, и молимся, и славословимъ, и превозносимъ его во вѣки, и просимъ отпуста грѣховъ и Царствию Небесному наслѣдия, и полезная душамъ и телесемъ нашимъ, яко Богу, и Царю, и Создателю, всѣм, и вся въ руцѣ свои содержащу. Пресвятей, пречистей и присно дѣвѣ Марии, яко сподобльшейся таковей тайнѣ послужити, и огнь Божества во своих ложеснахъ неопално приимши, вмѣстивши намъ невмѣстимаго Бога, еюже къ Богови примирихомся, и вражда, иже от Адама, от Бога разрушися, и яко Матери всѣхъ, Владычице и Богородице, яко матерне дерзновение к нему стяжавши и недостаточная наша благодатию Христовою наполняющи. Якоже рече божественный апостолъ Павелъ: «Сила бо Христова в немощи совершается». Сей убо, яко заступнице и предстателнице всего роду христианскаго, молимся и просимъ помощи, да умолит Творца своего и Сына и Бога нашего о наших согрѣшении, да подасть намъ Христос Богъ нашъ ея молитвами спасение получити и будущих благъ наслаждения прияти.

Апостоловъ не боготворим, не буди то, яко самъ апостолъ, пиша, глаголетъ: «Аз насадих, Аполос напои, Христос возрастит. Тѣмъ ни насажаяй, ни напаяй, но возращаяй». Тако убо и мы божественныхъ апостолъ почитаемъ, яко Слова Божия ученики и посланники, нашему спасению наставники и руководители. Сего ради молимся имъ и призываем въ помощь, да яже они написаша и научиша, сия убо разумнѣйша разумѣваем и их спасению нашему спомощникы имамы. Тако и святыя отцы, яко наставникы и учители ко истиннѣ и благочестию. Тако и святыя страстотерпца почитаемъ, яко о истиннб благочестия пострадавше, и ихъ ревностию вооружаяся, благочестия совершаемъ. Преподобныя, яко совершителя апостолскому учению, и сих ревнующе, сами на путь благочестия направляежся. Сице убо мы вѣруем, яко единъ ходатай Господь нашь Исус Христос; пречистая его Богомати – всѣхъ Владычице, и ходатаице, и заступление всѣмъ християномъ; сия вси апостоли, пророцы, и святители, и вси святии, яко служителе правде и намъ наставницы, и Христу приводящу, почитаются, сего ради и мощемъ их поклоняемся, да болшую помощь от нихъ обрящемъ. И якоже рече Господь нашъ Исус Христос: «Нѣсть ученик над учителем своимъ. Совершен всяк будетъ, яко и учитель его». Видиши ли, яко не велитъ взиматися над учителемъ, но послѣдствовати учителю. Но якоже рече божественный апостолъ Павелъ: «Комуждо дается явление Духа на ползу. Овому убо Духомъ дается слово премудрости, иному слово разума о том же Дусѣ, другому вѣра тѣмъ же Духомъ, иному дарования исцѣлением о том же Дусѣ, другому дѣйствия силамъ, иному пророчество, другому разсуждение духовомъ, иному роди языкомъ. Вся сия дѣйствует единый той же Духъ, раздѣляяй на власти комуждо, яко хощет. И, яко бо тѣло едино есть, и уды имать многи, вси уды единаго тѣла, мнози суще, едино суть тѣло. Тако и Христос. Ибо едином Духомъ мы вси во едино тѣло крестихомся, аще июдѣи, аще ли еллини, аще раби, аще свободни, вси бо единымъ пивомъ напихомся. Ибо тѣло нѣсть един удъ, но мнози. Аще речет нога: нѣсмь рука, нѣсмь от тѣла, но сего ли ради нѣсть от тѣла? И аще речет ухо, яко нѣсмь око, нѣсмь от тѣла, ни от сего ли нѣсть от тѣла? И аще все тѣло око, гдѣ слух? Аще все слух, гдѣ ухание? И нынѣ положи Богъ уды, единаго кождо в тѣлеси, якоже восхотѣ. Аще ли Быша вси един удъ, гдѣ тѣло? И нынѣ положи мнози удове, едино тѣло. Не можеть око рещи руцѣ: не требе ми еси; или паки глава ногама: не требе ми есте. Но много паче мнящеися уди тѣла, немощнейше быти, нужнѣйши суть, яже мнимъ нечестнѣйша быти тѣлу, симъ честь множайшу облагаемъ; и неблагообразни наши благообразие множайше имутъ, а благообразнии наши не требе имут. Но Богъ раствори тѣло, лишающемуся болшую дастъ честь, да не будет распря в телеси, но тожде въ себѣ пекутся уды. И аще стражетъ единъ удъ, с ним стражютъ вси уди. Вы есте тѣло Христово, и уди от части. И овѣх убо положи Богъ во церкви, 1 апостолы, 2 пророкы, 3 учителя, потом силы, таже дарование исцѣления, заступления, кормителя, роди языкомъ. Еда вси апостоли, и пророцы, и учители? Еда вси силы дѣютъ, вси дарования имуть исцѣления? Еда вси языки глаголют?»

Над се убо указах ти доволно, како подобает почитати богоносныя апостолы и священныя отца. А еже писал еси, что о ходатайствѣ Божии и о имени, еже нѣсть спастися о иномъ имени развее о имени Господа Исуса Христа, и отпущения грѣхомъ о имени его, живот вѣчный, и мы вѣруемъ тако, но токмо сими ученики его, и апостолы, и богоносными отцы к сему приводимся и на истинный путь наставляемся. А еже о началех глаголалъ еси, ино сами апостоли того не написали о своих началех – спасению человекомъ быти, – да едино начало Христово они убо, яко служители благодати Владычне, распространиша и устроиша на основании и началѣ Христовѣ. А еже писалъ еси, что грѣхи по благодати отпущают даромъ, а не дѣлы сопряжны, и недостаточная благодатию наполняемы, аще не дѣлы грех изыдетъ, слыши Господа, во святомъ Евангелии глаголюща: «Аще кто не оставит отца своего и матерь, жену и чада, села и имѣния и не отвержется себе всего, еще и душа своея, не может быти мой ученикъ. И аще не возметъ кто креста своего и вослѣд мене грядет, нѣсть мене достоинъ». Крестъ есть, еже распятися мирови, яже суть в мирѣ. Распятие се есть – мирьскаго всякаго хотѣния остатися: сел, и имѣния, и богатьства, пища, и пития, и ничего требовати и не избирати, развѣ удовлятися по прилучаю случающимися, и сия с воздержаниемъ великымъ, и крѣпостию, и молитвою непрестанною. И к сему любити враги и вся оскорбляющая, и молитися за творящих напасть, своя вся, аки не сущая, презирати и не пещися ими, но токмо непрестанное молитва, постъ и заповедемъ Господним сохранение со спасениеж. И здѣ яко пришельцы, яко рече апостолъ Павел, но тамо будущаго повсегда желающе, и к вѣчнымъ онемъ селениемъ преселитися хотяще, и ничто о здѣшних желающе. Сице крестъ свой взимати и распинатися мирови, по Исусе ходити.

А что еси писал, что Богъ Отецъ для заслуги Сына своего приимъ человека в милость свою и грѣхи отпущает даром, и то еси писал ересью Ариевою, понеже повинна написал еси Отцу Сына. Громовъ сынъ нас научи: «Въ начале бѣ Слово, и Слово бѣ к Богу, и Богъ бѣ Слово. Се бѣ искони къ Богу. Вся тѣмъ Быша, и без него ничтоже бысть, еже бысть». Видиши, яко собезначален Сынъ Отцу, и любве ради и имѣя составъ Отецъ къ Сыну нераздѣлный и неслиянный по Богословцу. Яко и во святомъ Иоанне евангелисте речено бысть: «Глаголы, яже аз глаголю вам, о себѣ не глаголю, Отецъ во мнѣ пребываяй, и той творит дѣла. Вѣруйте мнѣ, яко аз во Отцы и Отецъ во мнѣ». «И аще чесо просите от Отца о имени моемъ, то и сотворю, да прославится Отецъ въ Сынѣ». «Имѣяй заповѣди моя и соблюдая их, той есть любяй мя, а любяй мя, возлюблен будет Отцемъ моимъ, и аз возлюблю его и явлюся ему сам». И паки речено есть: «Отецъ любитъ Сына и вся показует ему, яже самъ творит. Яко Отецъ воскрешаетъ мертвыя и живит, тако и Сынъ, ихже хощетъ, и живит. Отецъ бо не судитъ никому, но суд весь дасть Сынови, да вси чтутъ Сына, якоже чтут Отца, пославшаго его». Послание разумѣй не уничижениемъ, но едину волю и хотѣние Отца и Сына и Святаго Духа. Но единъ от Троица Сынъ Слово Божие съ плотию смотрениемъ тайны своея человекомъ спасение содѣла со Отцемъ и Святымъ Духомъ. Идѣже бо есть Сынъ, ту и Отецъ, и Духъ, и гдѣ Духъ, ту и Отецъ, и Сынъ. Якоже рече во святомъ Евангелии: «Егда приидет утѣшитель, егоже аз послю вамъ от Отца, Духъ истинный, иже от Отца исходит, той свидѣтельствуетъ о мнѣ». Видиши ли Отца безлѣтна и собезначална Сына, соприсносущна Пресвятаго Духа? Едина слава, честь и держава, едина воля, и хотѣние, и сотворение, Святыя Троица. И паки помале наводит, глаголя: «Егда приидетъ онъ, Духъ истинный, наставит вы на всяку истинну. Не от себѣ бо глаголати имать, но елика аще услышит, глаголати имать, и грядущая возвеститъ вамъ. Той мя прославитъ, яко от моего приимет, и возвеститъ вамъ. Вся, елика имать Отецъ, моя суть, сего ради рѣх, яко от мене прииметъ, и возвѣстит вам». Видиши ли едино существо, яко Сынъ посланъ волею от Отца и своимъ хотѣниемъ и дѣйствомъ Пресвятаго Духа спасение человекомъ содѣла. Тако и Духъ не имать от себѣ глаголати, но со едино хотѣние со Отцем и Сыномъ, ино послание Сынове плотному смотрению разумѣваемъ. Паки же о единосуществѣ и собезначалствѣ Сыну ко Отцу во Иоаннѣ речено есть: «Сего ради мя Отецъ любит, яко яз душу свою полагаю, да паки прииму ю. Никтоже возметъ ю от мене, но азъ полагаю ю о себѣ. Область бо имам положити ю, и область имамъ паки прияти ю. Сию заповѣдь приях от Отца моего». Видиши ли, самовластво и собезначальство ко Отцу? И не требующу никогоже воставити его от мертвыхъ, но самовластно воскрешаетъ из мертвыхъ. Якоже рече избранный сосудъ Павелъ: «Не восхищениеж непщева быти равенъ Богу, но себе излия, зракъ раба приимъ», и прочая. Егда Лазаря воскреси, и пришедъ, надъ него рече: «Отче, хвалу тебѣ воздаю, яко услыша мя. Азъ вѣдѣх, яко всегда мя послушаеши, но народа ради, стоящаго окрестъ, рѣхъ, да вѣру имуть, яко ты посла». И паки рече Исус: «Аще кто любитъ мя и слово мое соблюдетъ, и Отецъ мой возлюбит его, и к нему придевѣ, и обитель у него сотворивѣ». Видиши ли, вездѣ равновластие, а не повиновение. И паки рече Исусъ: «Отче, прослави Сына своего, да Сынъ твой прославит тя». И ина многа обрящеши в Божественном Писании о семъ свидѣтельствующе, яко равночестенъ есть Сынъ Отцу, а не служебенъ. Сия убо доздѣ.
 

Библиотека литературы Древней Руси / РАН. Ин-т рус. лит. (Пушкинский дом) ; под. ред. Д.С. Лихачева и др. - Санкт-Петербург : Наука, 1997-. / Т. 11: XVI век. - 2001. - 681, c.

 

Категория: Послания Ивана Грозного | Добавил: coldaevatatyana2016 | Теги: дополнения, К пословицам, убо мое слово, Послания Ивана Грозного, Слово по слову, Ответ Яну Роките
Просмотров: 2 | Загрузок: 0 | Рейтинг: 0.0/0


Всего комментариев: 0
avatar