| 21.11.2026, 06:27 | |
Не хочешь слушать как люди врут, сам ври В.И.Даль Неправда - ложь Послания Ивана Грозного Ответ Яну Роките 7 убо мое слово И что еси писал о Лютореве учении, что вы вѣру свою покладаете на самомъ Христе Господб нашимъ, а не на Люторе, а что бы Люторь, а любо иный кто, науку свою показал. Что и Святымъ Писмомъ сложно, то и науку должни приимати вы, яко от самого Бога. А есть бы кто противъ той науки Господа нашего Исуса Христа, евангельска и апостольска, кто научал, аще бы и аггелъ с небеси, того проклятого бы судилъ. Слыши, что апостолъ глаголетъ о томъ, что писал еси. Та бо глаголет: «Чюжду же бо, яко тако скоро прилагаетеся от звавшаго вы благодатию Христовою во ино благовѣствование, еже нѣсть ино, аще бо не нѣцыи смущающеи вы и хотяще превратити благовѣствование Христово. Но и аще мы, или аггелъ съ небеси благовѣститъ вамъ паче, еже благовѣстихом вамъ, анафема да будетъ. Но яко преди рекохомъ, и нынѣ паки глаголю: аще кто вамъ благовѣститъ паче, еже приясте, анафема да будет. Нынѣ убо человеки препираю или Бога? И ищу человекомъ угожати? Аще бо единаче человекомъ угожал бых, Христу раб не бых был. Сказаю вам, благовѣствование, благовѣщеное от мене, яко нѣсть по человеку, ни аз бо от человекъ приах е, ни научихся, но явлениемъ Исус Христовымъ». Видиши ли, яко ни своимъ хотѣниемъ, ни своимъ смышлениемъ проповѣдь благовѣстити, ни паки что от себе мысли. Аще что сложно Божественому Писанию, ничто от себе помысли, якоже вашь Люторь и с вами кознодѣи. Но Павел явлением Исус Христовымъ благовѣсти и основания своего не положи паче лежащаго, иже есть Христос. Слыши, тойже Павелъ глаголетъ, коринфомъ пиша: «Основания бо иного никто может положити паче лежащаго, еже есть Христос. Аще ли кто назидает на основание семъ и злато, и сребро, камение честно, древа, сѣно, отростие, – комуждо дѣло яве будетъ, день бо явит имъ». Видиши ли, яко основание паче лежащаго, еже есть Христосъ, никто может положити. Христос посла по воскресении своемъ божественыя своя ученикы и апостолы на проповѣдь, глаголеть: «Шедше научите вся языки, крестяще их во имя Отца и Сына и Святаго Духа, учаще ихъ блюсти вся, елика заповѣдах вамъ». Видиши ли, яко повелевает блюсти повелѣнная, написаная? Якоже Громовъ сынъ глаголет: «Суоть и ина многа сотвори Исусъ пред ученикы своими, яже не суть писана въ книгах сихъ. Аще по единому писана бывают, ни самому, мню, всему миру вмѣстисти писаных книг». Не послушающих апостольских поучений и неповинующихся, слышиши, что в Луцѣ глаголетъ: «Послушаяй васъ, мене слушает, отметаяйся вас, мене отметается». Апостоли же на проповѣдь исшедша, воставиша в свое мѣсто намѣстницы апостолы 70, по них и святители, даже и доселе по преданию рода духовна достигоша, от нихже и священницы, иже наставницы человекомъ. Яже Павелъ, к Титу пиша, глаголетъ: «Чадо Тите, сего ради оставих тя въ Крите, да некончанная исправиши и поставиши по всѣх градех попы». И аще бы не нужно се было христианомъ, не бы апостолъ о семъ писалъ. Вашего же Лютора и васъ кто на се поставилъ? Паче же не токмо не истиньствуете, но паче развращаете. Якоже рече верховный апостолъ Петръ во втором послании, сице глаголя: «И яко, – рече, – возлюбленный брат наш Павелъ по данней ему премудрости написа вам, яко и во всѣхъ своихъ посланиихъ, глаголяй въ них о сих, въ нихже суть неудобь разумна нѣкаа, иже ненаучении и неутвержении развращают, яко и прочая писании, к своей погибели имъ». Основание выше рѣхъ, яко «Кто назидаетъ на основание злато, сребро, камение честно» – сиирѣчь дѣла благия; «дрова, сѣно, трость» – худѣйшая дѣла и грѣшная. Видиши ли, в кую пропасть снидосте, яко Петръ глаголетъ, иже развращати Писания, и яко вы развращаете по своему хотѣнию. Павел же глаголетъ, яко «основание никто может положити паче лежащаго, иже Исус Христос». Вы же, притекше священникомъ, притекше учителемъ инѣмъ, тоже и святителемъ и апостолом, самое Христово повелѣние развращаете, вспропинающе въ себѣ Христа Исуса, и самовластнѣ учите. И еже апостолъ, пиша к галатомъ, глаголет: «Яже и аггела не послушати, паче, еже и приясте». Вы же предание апостольское все отвергосте, сего ради по апостолу сами себе проклинаете. Тѣмже и мы, яко врагомъ истинны и нечестию поборникомъ праведенъ судъ, проклятию наводимъ, яко люди есте Антихристовы, еже есть Сопротивника. А что еси писал о руской вѣрѣ, ино как Богъ, просветилъ прародителя нашего благочестиваго великаго князя Владимира, нареченнаго во святом крещении Василия, – крестися во имя Отца и Сына и Святаго Духа, нынѣ и присно и во вѣки вѣкомъ, аминь, – от тѣх мѣстъ и доселе не нарицается руская вѣра, но християньская. Тѣмже и повсюду вселенныя, аще гдѣ християнска вѣра истинная, ту християне зовутся, а идѣже зовутся иным именемъ, которые земли, по прозвищу имя, ту ересь и расколъ, а не истинная вѣра. Яко рече божественный апостолъ Павелъ: «Аще во языцѣхъ бози мнози и господие мнози, но намъ единъ Богъ Отецъ, из него вся, и мы у него. И единъ Господь Исусъ Христосъ, имже вся, и мы тѣмъ. И единъ Духъ Святый, в немже всяческая, и мы въ немъ; едино крещение и едина вѣра. Аще языцы повсюду вѣруют и жрут, мнящеся Богу, но бѣсомъ вѣруют и жрут». О семъ убо во Троицы славимому Богу молимся прилѣжно, да соблюдетъ нас от неприязни тмы невѣрия вашего и все православне християнство Руския земли. А еже убо что видиши от слабых и ленивых, не вся заповѣданная исполняющих, сия ни закону оиисующу, ино онѣхъ небрежениемъ. Сия убо недостаточная, яже в немощи Христосъ благодатию навершаетъ. Аще ли по благодати нечювствены пребывают, сами на своя главы неотреченыя Божия гнѣва суд приносятъ. А что писал еси о церкве, иже вы не затворяете до одного народа, языку, али бо мѣсцу на свите, ино християнская соборная и апостольская церкви едина есть. Аще и во едином мѣстѣ, во граде, или веси, или повсюду вселенныя, аще много церквей, и уставъ един имѣют. А что писалъ еси о латынской церкве, и аз о томъ не хощу много глаголати, понеже, яко латыни – прелесть, тако и вы – тма. Аще бо кто нѣкоего изведетъ ис темницы, темны суща и несвѣтлы, во друзей темне и мрачне затворит, что убо ползова? Но прелесть, а не истинна. Искомое бо себѣ, еже от тмы на свѣт извести. Аще ли паки тмѣ наслѣдника сотвори, прелестникъ есть, а не истиненъ. Сия убо доздѣ.
Библиотека литературы Древней Руси / РАН. Ин-т рус. лит. (Пушкинский дом) ; под. ред. Д.С. Лихачева и др. - Санкт-Петербург : Наука, 1997-. / Т. 11: XVI век. - 2001. - 681, c. | |
|
| |
| Просмотров: 4 | Загрузок: 0 | | |
| Всего комментариев: 0 | |