Сентябрь 24. Феклы заревницы (зарева от осенних огнен). Замолотки. В.И.Даль Месяцеслов.

Слово некоего христолюбца. ревнителѧ по правои вере. Господи благослови

Якоже Илья Фезвитянин. заклавый ерея жерца идольския числом 300. и рече.

ревнуя поревновах по Господе вседержители тако. и сеи (крестьянин) не мога терпети крестьян.

во двоеверно живущих. и верують в Перуна. и в Хорса. и в Мокошь. и в Сима. и в Рьгла. и в Вилы. ихже числом. г҃ ѳ҃ сестръниць.

глаголють (бо) невегласи и мнят богинями. и тако покладывахуть им теребы (требы). и куры им режють. и огневе молятся.

зовуще его Сварожичем. и чесновиток. богом же его творять. егда же у кого будеть пир. тогдаже кладуть в ведра и в чаши.

и (тако) пьють о идолех своих. веселящися не хужьши суть еретиков. ни жидов. иже в вере и во крещеньи тако творять. не токмо невежи но и вежи.

попове и книжници. ащели не творять того вежи да пьють и ядять. моленое то брашно. ащели не пьють ни ядять да видять деяния их злая.

ащели не видять да слышать и не хотять их поучити. о таковых бо пророк речеть. окамене сердце людии сих. ушима тяжко слышать. очи свои сомжиша.

Павел к Римляном рече. открыеться гнев божий с небесе на все бещестье. и на неправду человечю. скрывающим истинну в неправде.

сам Господь рече. мнози пастуси погубиша виноград мой. пастуси суть книжници. а виноград вера. человеци в вере погибають.

лихими пастухи. учители безумными. аще не лишаться проклятаго моленья. и службы дьяволя то достоини огню негасимому.

си же учители будуть им подъгнета. аще их необратять от дела того сотонина. глаголеть бо пророк от лица неверных.

людии приходящих во крещенье. и ученью добрых дел. да обратять ны. боящися тобе. и ведущи свиденья твоя. се же молвить книжником.

Павел рече. горе человеку тому. имже соблазниться мир. рече Господь иже добре научить хто. то велик нарется во царствии небеснем.

Павел рече к римляном. аще многи наставники имате о Христе. но немноги отце о Христе бо Иисусе аз вы родих. еувангелием. молю же вы ся.

подобници ми будите. и попове книжници будитеж. вы подобници Павлу великому учителю. учите ж люди на добро. и обращайте их от ле ти дьяволя. к вере истеннеи. служити истинному Богу.

да и вы речете пред Богом пророческим гласом. се аз и дети моя яже ми дал еси Господи. и аз я родих ученьем.

того ради пьете ясте и дары емлете от них. ащели нехощете учити их. то не примешаитесь им по еуангельскому слову. аще имаши око свое лукаво.

то истъкни е вон. ащели руку то отсеци ю. лучше бо один уд погибнет. нежели все тело. не можетбо погибнуть праведник.

про беззаконника. кое причастье Христу с бесом. такожь и служащих Богу. кое причастье к служащим бесом. и угодья дьяволя творящим.

Павел бо коренфеем рече. братия писах вам посланья не примешаитесь. к блудником. ни к резоимцем. ни грабителем. ни корчьмитом. и к служащим кумиром. но долъжни есте от мира сего изыти.

рекше умрети. ныне же писах вам с таковъм ни пити ни ясти. но изверзите таковаго. таковии бо царства Божия не наследят. окамене бо сердце их в неистовом пьяньстве. и быша слуги кумиром.

якож бо пишет седоша бо людие пити и ясти. не в закон но во упои и быша пьяни. и въсташа играти и соблудиша со ближники своими и того дни погибе их 620 за свое неистовое пьяньство.

того ради неподобае крестьяном игр бесовских играти. еже есть плясанье. гуденье. песни мирьския. и жертвы идольския.

еже моляться огневе подвином. и Вилам. и Мокоши. и Симу. и Рьглу. и Перуну. и роду. и рожанице. и всем тем иже суть тем подобни.

се же ученье нам вписася на конець века да не во лжю будем рекли. крещающеся отрицаемъся сотоны и всех дел его.

и всех ангел его и всего студа его. да обещахомъся Христови. да аще ся обещахом Христови. то чему ему не служим.

но бесом служим. и вся угодья им творим. на пагубу душам своим. не також зло творим просто. но и смешаем. некии чистыя молитвы. со проклятым моленьем. идольским. иже ставять лише кутья.

ины тряпезы. законнаго обеда. иже нарицаеться безаконная тряпеза. менимая роду и рожаницам. и в прогневанье богу.

сам бо Господь рече не всяк внидеть во царствие мое. рек ми Господи Господи но творяи волю отца моего.

Павел рече видех облак. кровав распростерт над всем миром. и воспросих глаголя Господи что се есть. и рече ми се есть молитва человеческая.

смешена с безаконьем. того ради рече Господь не можеть раб работать. 2 ма господинома. одиного возлюбить а другаго возненавидить. тако и мы братия возненавидим дьявола.

а Христа возлюбим. во ибо хрестихомъся. его хлеб ямы. и чашю его пьем. умираем здрави бываем о нем.

рече слава тобе о всем даным нам. тобою. не токмож зде но и в будущем веце. рече же Павел что убо требы кладуть страны бесом. а не Богу.

не велюж вам обещником быти бесом. и не можете бо пити чаши Господня. и не можете бо причаститися тряпезе Господни.

да не розъгневаем Бога. аще кто повесть вам. яко се требно кумиром не ядите того. ащели пьете или ясте то все в славу Богу творите.

Господня бо есть земя и конци ея. все ми леть есть но не все на ползу. аще чрево брашно. и брашно чреву то Бог празнит.

рече же Павел братия очистим собе от всякия скверны. плотьския и душевныя. но творящи святыню в страсе Божии.

всем бо нам подобаеть стати пред судищем Христовом. да приимем кождо по своим делом. якоже есмы створили. или добро или зло. ведуще убо страх Господень.

почто убо не воспримаем разумна глаголющая ны во спасенье. умным ученьем. виде бо яко обретенье хощет быти моего спасенья и вашего.

аще быхом ся осужали. не быхом осудими от Господа были. братия не велю же вам не ведати беседы сея. но и инем будите на ползу хотящим спастися. истерьгнитеся от сети дьяволя.

да придем к пречистому свету Господа нашего Иисуса Христа. безаконным же непокоривым. противящимъся здравому ученью. нечестивым хулящим отца и матерь.

славы Божия не наследят. в чистоте Божиеи а не в мудрости плотнеи. молю вы имянем Бога нашего Иисуса Христа. хвалю Бога моего и вас о благодати Божиеи данеи вам яко свиденье Христово известися в вас.

яко вам не лиховати никоегоже дара. чающе пришествия Господа нашего Иисуса Христа. иже посадить вы во дворех жизни вечныя. со всеми служащими ему. всегда и ныне.

Сеже изложенно от многословесных книг. некымь христолюбьцемь. ревнителем по правеи вере. на раздроушение лсти неприязнине. на укор творящим таковая. на поучение правоверным. и на причастье боудоущаго века. послоушающим книг сих. святых. и творящих делом повеления в оставление грехов

Якоже Илия фезитенин. заклав иерея и жерьце идольскыя. числом яко до триисот. и рече ревнуя поревновах по Господе Бозе моемь вседержители.

тако и сыи не мога тьрпети. хрьстьян двоверно живущих. иже суще христьяне. и верують в перуна. и в хърса. и в сима. и в рьгла. и в мокошь. и в вилы. ихже числомь тридесяте сестрениць. глаголють оканьнии невегласи.

и то все творять богы. и богынями. и тако кладуть им требы. и короваи им молять. куры режють. и огневи молять же ся. зовуще его сварожичьмь. и чесновиток.

богом же творя. и егда будеть у кого пир. тогда кладуть в ведра. и в чаше. и пьють веселящеся. о идолех своих. и егда же у кого их будеть брак и творять с бубьны. и с сопельми. и с многыми чюдесы бесовьскыми.

и ино же сего горее есть. устроивьше срамоту мужьскую. и въкрадывающе в ведра. и в чаше и пьють. и вынемьше осморкывають.

и облизывают и целують. не хужьше суть жидов. и еретик. и болгарь. иже в вере и в хрьщении суще. а тако творять. не токмо же то творять невеже. нъ и веже. и книжници. аще ли не творять того веже.

да пьют и ядять моленое то брашно. аще ли ни пьють ни ядять. да видять деяния та их злая. аще ли не видять да слышать. и не хотять их поучити. о таковых бо пророк рече.

окамене сердце людии сих. и ушима тяжко слышаша. и очи свои съмежиша. и Павел. к Римляном. рече. открыется гнев Божии с небесе.

на все бещестье. и на неправду человечю. съкрывающим истину в неправьде. имьже разумение Божие. яве есть в них. Бог бо им яви. нъ си не хотят учити.

и сам Господь рече. мнози пастуси погубиша виноград мои. пастуси суть учители попове. а виноград вера. а сущее в винограде в вере человеци.

и погыбають лихыми учители. безумными невегласы. да аще тако творящии. и не ошибутся. проклятаго того моления. и службы тое дьяволе.

то достоини будуть огню негасимому. и смоле присноврющии. си же учители под ними будуть. аще их не обратять. от дел тех сотонин.

пророк бо глаголеть. от лица невежьствьных людии приходящих в хрьщение. да обратять ны боящиися тебе. и ведущии сведенья твоя.

сеже молвить попом. ти бо ведять сведения Божия. а не ведающим сведенья. недостоить попом быти.

тако бо и в заповедех глаголеть. аще невежа будеть поставлен попом. да извержется. Павел бо рече горе тому имьже съблазна приидеть. нъ се ё пришла.

и расплодялася всюду. и пакы рече. иже кто добре научить. тъ велик наречется. аще бы кто хотел научити. да прочии невегласи не дадять.

зависти ради. и на убииство попущаются. яко же на Исуса. жидовьстии архиереи. и книжьници. и пакы Павел рече к Римляном.

аще и многы наставникы имате о Христе. нъ немногы о отце. о Христе бо Иисусе Еѵангильем аз вы родих. молю же вы ся. подобьници ми будете.

то се вам попом молвить Павел моля. будете же вы попове подобници Павлу. великому учителю. учите же люди на добро.

и обращаите от льсти тое дьяволе. к вере истиньнеи. служити единому Богу. да и вы речете пред Богом. пророческым гласом.

се аз и дети и аз родих ученьем. аще ли ни то что имаши отвещати. а слышиши. ему же буде дано много. много от него и истяжют.

И пакы рече. связавши ему руце и нозе. въверзете лениваго раба. в тьму кромешнюю. скрывшаго талант. талант есть ученье. а прочее и петье. и пьете. и ясте. и дары емлете у них.

а поучити их не хочете. и аще тако деюще есте. да не примешаитеся к ним. ни дружьбы с ними держите. по еѵангельскому слову. иже рече. аще имаеши око твое лукаво. истъкни е.

аще ли руку то отсеци ю. луце бо есть да один уд погыбнеть. неже все тело. не можеть бо погибнути праведник. про безаконьника. кое причастье свету к тьме кое ли причастье Христосу с бесом. тако же и служащиим Христосу.

кое причастье к служащиим идолом. и угодья дьяволом творящиим Павел Коренфеом рече.

братие писах вам в посланемь писании. не премешатися вам к блудником. и к лихоемьцемь. рекше к резоимьцемь. и к грабителем. и к коръчьмитом. и к идослужителем.

Коеже суть идолослужители. то суть идолослужители. иже ставять тряпезу рожаницям. короваи молять. вилам. и огневи. под овином и прочее их проклятьство.

и пакы рече ныне писах вам. не примешаитеся аще ти есть брат так. ли блудник. ли резоимець. ли коръчьмит. ли пьяниця. ли служитель кумиреск. с таковыми. ни ясти. ни пити.

изверзете злаго ни самех вас. таковии бо не наследять царства Божья. положи бо их окамененью неистовное пьяньство и быша слугы кумиром. якоже пишеть.

седоша бо людие ясти и пити. не в закон. и въсташа играт. и съблудиша. и том часе падоша. 2900 и погыбоша за свое неистовое пьяньство.

того ради не подобаеть хрьстьяном. в пирех. и на свадьбах. бесовьскых игр играти. аще ли то не брак наричется. нъ идолослужение. иже есть пляска.

гудьба песни бесовьскыя. сопели. бубьни. и вся жертва идольска. иже молятся. огневи. вилам. мокошьи. симу. рьглу. перуну. хърсу. роду и рожаницям. и всем проклятым богом их.

се же учение нам написася на конець век. темже мьняися стояти. да ся не падеть.

темже възлюблении. бегаите жьртвы идольское и требокладенья. и всея служьбы идольскыя. да не в лжю будемь рекли крьщающеся отрицаемъся сотоны.

и всех дел его и всего студа его. и всех ангел его. и всех служеб его. и всего студа его. такоже и обещахомся Христови.

Да аще ся обещахом Христови служити. то чему не служим ему. нъ бесом служим. и вся угодья им творим на пагубу души своеи.

не такоже простотою зле служим. нъ смешаем с идольскою тряпезою трьсвятыя богородиця. с рожаницями. в прогневание Богу.

сам бо Господь рече. не всяк вънить в царствие. река ми Господи Господи. нъ творяи волю отца моего. и Павел рече видех облак. простьрт надо всем миром. и въпросих глаголя.

Господи что есть. и рече ми. се есть молитва человечьска. смешено с безаконьем. того ради рече Господь.

не можеть раб один работати двема господинома. единаго възненавидить. а другаго возлюбить.

тако и мы братие. дьявола възненавидим. а Христоса възлюбим. вонь бо хрьстихомся. и его хлеб ямы. и его чашю пьемь и умираемь и здрави бываемь о немь. рекуще.

слава тобе Господи о всемь. данем нам тобою. не томко в сесь век. нъ и в будущии паче.

И пакы рече Павел. что убо требы кладуть страны бесом. не велю же вам обещником быти бесом. не можете бо пити чаше Господне и чаше бес.

не можете бо причаститися тряпезе Господни и тряпезе бес. да не разъгневим Бога.

таже рече. аще кто повесть вам. яко се требьно кумиром. не едите. того деля поведавъшаго. аще бо пьете и аще есте. все в славу Божию творите.

Господня бо есть земля. и конци ея. таже рече. все ми леть есть. нъ не все на пользу. аще чрево брашну. и брашьно чреву. и тъ Бог да упразни.

и пакы Павел рече. братие очистим себе от всякыя сквьрны плътьныя. и душевныя. творяще святыню в страсе Божии.

всемь бо намь подобаеть стати пред судищом Христосовым. да приимемь кождо нас. противу деломь. яко же есмы створили. ли добро. ли зло. ведуще убо страх Господень. почто въспираемь.

разумно глаголющая. и ведущая ны богоумьным ученьемь. в спасенье. надеюжеся на ваше спасение. и на сведенье. яко не вътще глаголю. веде бо яко приобретенье хощеть быти. вашего же и моего спасенья.

аще бо быхом сами ся осужали. не быхом осужени были. судими же от Господа наказани есмы. да не с ненаказаными осужени будемь братье не велю вам не ведети беседы сея.

нъ и инемь будете на пользу. хотящиим поучитися в спасение да бысте многы исторгъше. от сетии дьяволь. привели к пречистому свету.

Господа нашего Иисуса Христа. и прияли милость. неже ти они. нъ и вы. и к Тимофею рече. вемь яко добр закон. аще кто законьне творить.

яко правьдиву закон не лежить. безаконьныимь же. и непокоривым. и противящимся здравому ученью. и нечьтивыим. хулящим святая писанья. и раздрушающим заповеди святых отець. славы Божия не наследити.

хвала си есть съведения нашего. в простыни и в чистоте Божии. а не в мудрости плътнеи. молю же вы именем Господа нашего Иисуса Христа.

да то же глаголете вси. да не будуть в вас которы. да будете свершени в томже уме. и в томже разуме. възвести бо ми ся о вас. и пред вами. благодать и мир.

от Бога Отца. Господа нашего Иисуса Христа. хвалю Бога моего о вас. и о благодати Божии данеи вам яко вам не лиховати никоего же дара.

яко сведение Христово известися в вас. чающе пришьствия Господа нашего Иисуса Христа. иже посадит вы в дворех жизни вечныя. с всеми служащими Ему. о Христе