Из «Великого зерцала»
Како боятися суда Божия, милосердый некий царь научи

Писано есть, яко един некий царь никогдаже в животе своем весел бысть, ниже когда осклабися. Князи же его молиша царя того брата, да известится от брата, о чем смущается и скорбит и в непрестанной печали.

Царь же егда о сем от брата услыша и рече, яко во оный день известится ему. Повеле же сотворити ров глубокий и повеле углия горящаго до половины насыпати и над тем рвом поставити престол ветхий и иструхлявый.

Над престолом же повеле повесити на тончайшей нити мечь острый голый, пред ним же повеле поставити стол со множеством различных брашен и драгаго вина.

Призва же брата и посади его на оном ветхом и трухлявом престоле над оным углием и четырех мужей с голыми мечи окрест его постави: единаго против сердца, другаго созади и дву от обою стран, и всем повеле мечи к брату кождому от себя приложити.

По сем повеле мусику привести и играти.

И рече царь ко брату: «Яждь, пий, радуйся и веселися».

И рече ко царю брат его: «Како имам веселитися, яко отвсюду обстоим лютыми: аще позрю на дол, тамо огнь, аще горе – оттуду мечь хощет главу мою отсещи, и ниже обратитися смею на престоле сем, да не разрушится и аз впаду во огнь. От всех же стран мечи мя хощут пронзити. И ни о чем же ми ныне, точию яко вижду всеконечную погибель».

Тогда рече царь брату: «Якоже ты, сия зря пристройная не к погибели твоей, но к наказанию, пити и ясти не хощеши, ниже веселитися можеши, тако и аз имам всегда пред очима моима:

аще позрю умом моим горе, вижду тамо Судию моего, иже мя имать судити, сведущу ему вся моя деяния, емуже отдати число дел и словес и мыслей, и за та лютый и ярый ответ прияти.

Аще ли позрю долу, помышляю огнь адский и муку лютую и всих осужденных, с ними же и аз буду осужден, аще и во едином гресе смертном отиду.

Аще позрю за ся, вижду грехи моя, ихже пред Богом сотворих.

Аще позрю пред ся, размышляю смерть мою, к нейже на всяк час приближаюся, не вем же ни часа, ниже места, како и где ми будет конец.

Аще позрю на шуе, присмотряю, иже во дни и в нощи демони-врази ищут души моей и запинают избавлению моему.

Аще позрю на десно, вижду аггелы Божия, иже ми благия мысли и благую волю подают, ихже аз не приемлю и не творю.

И егда все сие еже о мне помышляю, никакоже в мире сем прелестной и на подкрадующем престоле моем весел быти могу».