Синодальный список

Въ лѣто  6684/1176 

Иде Вълхово опять на възводье по 5 днии. Тои же весне оженися князь Мьстйславъ Новегородѣ  и поя у Якуна дъчерь у Мирославиця.

И потомь позваша и ростовьци къ собе, и иде Ростову съ дружиною своею, а сынъ остави въ Новегородѣ; и приде Ростову.

И въ то врѣмя умьрлъ бяше Михалко; и поиде съ ростовьци и съ суждальци къ Володимирю, и постави Всѣволодъ съ володимирьци и съ переяславьци противу его пълкъ, и бишася, и паде обоихъ множьство много, и одолѣ Всѣволодъ.

И възвратися Мьстиславъ въ Новъгородъ, и не прияша его новгородьци, нъ путь ему показаша и съ сыномь съ Святославомь; и пояша новгородьци у Всеволода сынъ собе Ярослав.

На ту же зиму иде Мьстислав съ зятьмь съ Глѣбомь и съ братомь Яропълкомь на Суждаль, и бишася за Калакшею, и ту побѣдиша рязанце, и яша князя Глѣба и съ сыномь и Мьстислава съ братомь Яропълкомь, порубиша я.

Тои же зиме приходиша вся Чюдьска земля къ Пльскову, и бишася с ними, и убиша ти Вячеслава и Микиту Захарииниця и Станимира Иваниця и инѣхъ, а Чюди множьство избиша.

Томь же лѣтѣ постави церковь нову Михаль Степаниць святого Михаила, а другую Моисѣи Доманѣжиць святого Иоанна Усѣкновение главы на Чюдиньцевѣ улици.

Въ лѣто  6685/1177

Преставися Глѣбъ, князь Рязаньскыи, Володимири въ порубѣ. Въ то же врѣмя слепленъ бысть Мьстиславъ князь съ братомь Яропълкомь от стръя  своего Всѣволода, и пусти я въ Русь; ведома же има слепома и  гньющема очима, и яко доидоста Смольньска  и придоста на Смядино въ церковь святую мученику Бориса и Глѣба, и ту абие съпостиже я божия благодать и святыя Владычиця нашея богородиця и святую новоявленою мученику Бориса и Глѣба, и ту прозрѣста.

Томь же лѣтѣ, осень, погоре Неревьскыи коньць от Иванъковее, и церквии съгорѣ 5.

И на зиму приде князь Мьстиславъ съ братомь Яропълкомь въ Новъгородъ, и посадиша новгородьци Мьстислава на етолѣ, а Яропълка на Новемь търгу, а Ярослава на Ламьскемь волоце, и тако ся управиша по воли.

Въ лѣто  6686/1178

Индикта 10, мѣсяця априля въ 20, преставися князь Мьстиславъ, сынъ Ростиславль, а вънукъ Гюргевъ, и положиша и въ святѣи Софии въ притворе; а брата его Яропълка посадиша Новегородѣ на столѣ.

И зая Всѣволодъ гость новъгородьскыи, и показаша новгородьци путь Яропълку, и тъгда Всѣволодъ изгонивъ Новыи търгъ и възя.

И тъгда новгородьци послашася по Романа Смольньску, и въниде на сборъ по чистѣи недѣли.

Въ лѣто  6687/1179

Заложи архиепископъ Илия съ братомь церковь камяну святыя богородиця Благовѣщение, и начя здати церковь маия мѣсяця въ 21, на святую цесарю Костянтина и Елены, а коньцяша мѣсяця августа въ 25, на святого апостола Тита, а всѣго дѣла церковьнаго зьдания днии 70; и бысть крестьяномъ прибежище.

Томь же лѣтѣ прѣставися раба божия Елисава , игумения святого Иоанна; и поставиша на мѣстѣ ея Фегнию.

Томь же лѣтѣ иде Романъ из Новагорода Смольньску.

Тъгда же новгородьци послашася по брата его по Мьстислава въ Русь, и въниде Мьстиславъ въ Новъгородъ мѣсяця ноября въ 1, на святую безмездьнику Къзмы и Дамияна;  а на зиму иде Мьстиславъ съ новгородьци на Чюдь, на Очелу, и пожьже всю землю ихъ, а сами отбегоша къ морю, нъ и ту ихъ досыти паде.

Въ лѣто  6688/1180

Переставися кънязь Мьстиславъ Новегородѣ Ростиславидь, вънукъ Мьстиславль, мѣсяця июня въ 14, и положиша и въ святѣи Софии у святыя Богородиця.

И послаша новгородьци къ Святославу въ Русь по сынъ, и приведоша Володимира въ Новъгородъ, и посадиша и на столѣ въ 17 августа.

Тъгда же отяша посадницьство у Завида и въдаша Михалеви Степаницю. Томь же лѣтѣ заложи церковь камяну въ манастыри на воротехъ боголюбивыи архепископъ новъгородьскыи Илия съ братомь Гавриломь у святого Благовѣщения.

Томь же лѣтѣ, на зиму, иде князь Святославъ Всѣволодиць, Олговъ вънукъ, из Руск на Суждаль ратью на Всеволода, а сынъ его Володимиръ съ новъгородьци из Новагорода; и съяшася на Вълзѣ устье Тьхвери, и положиша всю Вългу пусту, и городы всѣ пожьгоша, и не дошьдъше Переяславля за 40 вьрстъ, у Вьлѣнѣ у рѣцѣ, ту ся воротиша: ту бо бяху вышли суждальц пълкомь, и угошили около себе твьрдь, и не съмѣша ти  пълку; а князь съ новъгородьци посылаху к нимъ, просяце пълку; нъ богъ своею милостью боле кръви не пролья крьстьяиьстѣи: сълипали бо ся бяху на мале часу, и убиша ихъ новъгородьци нѣ о трьхъ стехъ, а сами сторови вси воротишася; и пояша князя самого въ Новъгородъ, Яропълка посадиша на Новемь търгу; и въниде Святославъ великыи Всеволодиць Новугороду.

Въ лѣто  6689/1181

Мѣсяця июля въ 3, зажьжена бысть церкы от грома Варязьская на Търговищи, по вечернии, въ час 10 дни; и церкы съгоре святого Иоанна Ишькова.

Томь же лѣтѣ загорѣся пожаръ въ Славнѣ от Къснятина, и съгореста церкви 2: святого Михаила, а другая святыхъ Отець, и дворове  мнози по брегу, оли и до Руцья.

Зъ то же лѣто сърубиша церковь святого Иякова на Добрыни улици, и святую безмездьнику Къзмы и Дамияна, и святого Савы, и святого Георгия, и святого Йоанна Ищькову.

Томь же лѣтѣ идоша новгородьци къ Дрьюцьску съ Святославомь, съ Олговомь вънукомь. И въ то врѣмя приде Всеволодъ съ всѣмь пълкомь своимь и съ муромьци и с рязанъци на Новыи търгъ; и затворишася новотържьци въ граде съ княземь Яропълкомь.

И осѣдоша городъ, и сѣдѣша  недѣль, и изнемогоша въ градѣ: зане не бяше имъ кърма, друзии бо ихъ и конину ядяху; и устрѣлиша князя Яропълка въ градѣ, и бѣда имъ  бѣ велика; и предашася новотържьци, а Яропълка веде съ собою, оковавъ, и новотържьце все съ женами и съ детьми, и городъ пожьже.

А новгородьци възворотишася от Дрьюцьска, пожьгъше городъ. Тъгда же на зиму показаша путь Володимиру Святославицю, и иде къ отцю въ Русь, а новгородьци послашася къ Всѣволоду по князь, и въда имъ своякъ свои.

Въ лѣто 6690/1182

Приде князь Ярослав въ Новъгородъ, сынъ Володимирь, а вънукъ великаго Мьстислава. Томь же лѣтѣ концяста церковь архепископъ Илия съ братомь на воротѣхъ святого Богоявления. Тъгда же и святыхъ 3 церковь поставиша.

Въ лѣто  6691/1183

Постависта цьрковь святого Еупатия Радъко съ братомь на Рогатеи улици. Томь же лѣтѣ ходи Всѣволодъ на Българе съ всею областию своею, и убиша Българи князя Глѣбовиця Изяслава. На ту же зиму бишася пльсковици съ Литвою, и много ся издѣя зла пльсковицемъ.

Въ лѣто  6692/1184

Заложи архепископъ Илия съ братомь церковь святого Иоанна камяну на Търговищи. Томь же лѣтѣ выведе Всеволодъ, приславъ, своякъ свои из Новагорода Ярослава Володимириця: негодовахуть бо ему новгородьци, зане много творяху пакостии волости Новгородьскеи.

И съдумавъше новгородьци, послашася Смольньску къ Давыдови, просяце сына у него; и въда имъ Мьстислава, и приведоша и Новугороду и посадиша и на столѣ, мѣсяця септября. Въ то же лѣто сърубиша церковь нову святого Власия.

Въ лѣто  6693/1185

Маия въ 1 день, въ час 10 дни, яко въ звонение вечернее, солнце помьрче, яко на часу и боле, и звезды быша, и пакы просветися, и ради быхомъ. Мѣсяця того же въ  заложиша Лукиници церковь камяну святых апостолъ Петра и Павьла на Сильнищи 1.

Въ то же лѣто Милонегъ заложи церковь камяну святого Възнесения, при архиепископѣ 2 Илии, а князи Мьстиславе Давыдовици.

А на зиму поиде Давыдъ къ Полотьску съ новгородьци и съ смольняны, и, умиривъшеся, воротишася на Еменьци.

Въ лѣто  6694/1186

Иде Завидъ къ Давыду Смольньску; и въдаша посадничьство Михалеви Степаницю. Томь же лѣтѣ приде цесарь грьцьскыи Алекса Мануиловиць въ Новъгородъ.

Тъгда же ходиша на Емь молодьци о Вышатѣ о Василевици и придоша опять сторови, добывъше полона.

Въ то же лѣто преставися Илия, арьхиепископъ  новъгородьскыи, мѣсяця септября въ 7 день, и положенъ бысть въ притворе святыя София.

Новгородьци же съ княземь Мьстиславомь и съ игумены и съ попы съдумавъше, изволиша собе поставити брата его Ильинъ Гаврила; и послаша съ мольбою къ митрополиту къ Никифору; и прислаша по нь митрополитъ и вся княжья русьская, и пояша и съ любъвью.

Тои же зиме Новегородѣ убиша Гаврила Неревиниця, Ивачя Свеневиця, и съ моста съвьргоша. Въ то же врѣмя въстань бысть Смоленьске промежи князьмь Давыдомь и смолняны, и много головъ паде луцьшихъ муж.

Въ лѣто  6595/1187

Поставленъ бысть архиепископъ новгородьскыи  Гаврила мѣсяця марта въ 29, на святого Варихисия, и приде Новугороду мѣсяця маия въ 31, на святого мученика Ермиа; и ради быша новъгородьци.

Томь же лѣтѣ преставися игуменъ Моисѣи у святыя Богородиця Антонове манастыри, и поставиша на мѣсте его Волоса.

Въ то же лѣто громъ бысть страшьнъ зѣло и мълния; прищьдъшмъ съ кресты от святыя София къ святому Михаилу и поющимъ 9 пѣснь, и шибе громъ и мълния, и падоща вси людье, и церкы загореся; нъ богъ своею милостию  и молитвами святого Михаила и не бысть беды церкви а 2 человѣка быста мьрътва.

Въ то же время избьени быша печерьскеи и югърьскии  въ Печере, а другии за Волокомь, и паде головъ о сте къметьства.

Томь же лѣтѣ бысть знамение въ солнци въ полъдни, и бысть яко мѣсяць, и съмерчеся, и по мале времени напълнися и пакы просвѣтися, мѣсяця септября въ 9.

Въ то же лѣто выгнаша новгородьци князя Мьстислава Давыдовиця, и послаша къ Всѣволоду Володимирю по Ярослава по Володимириця; и въниде въ Новъгородъ, и седе на столѣ мѣсяця ноября въ 20.

Въ лѣто  6696/1188

Заложи церковь камяну святыя Богородиця Успение въ Аркажи манастыри Сьмьюне Дыбачевиць.

Томь же лѣтѣ дѣлаша мостъ новъ чересъ Волхово по сторонь ветъхаго.

Томь же лѣтѣ переставися рабъ божии Германъ, иерѣи святого Якова, зовемыи Воята, служивъшю ему у святого Иякова полъпятадьсятъ лѣт въ крртости и съмерении и богобоязньствѣ: поя съ собою Пльскову архепископъ Гаврила, и дошьдъ Пльскова разболеся, и постриже и владыка и въ скиму, и преставися мѣсяця октября въ 13, на святую мученику Карпа и Папула, и положиша и у святого Спаса въ манастыри. Покои, господи, душю раба твоего Германа, отпусти ему вся прегрешения вольная и невольная.

На ту же зиму бысть дорогъвь, оже купляху по двѣ ногате хлѣбъ, а кадь ръжи по  гривнъ; нъ божиею милостию не бысть пакости въ людьхъ.

Въ то же лѣто рубоша новгородьце Варязи на Гътѣхъ, Немьце въ Хоружьку и въ Новотържьце; а на весну не пустиша из Новагорода своихъ ни одиного мужа за море, ни съла въдаша Варягомъ, нъ пустиша я без мира.

Въ лѣто 6697/1189

Святи церковь Гаврила, архиепископъ новъгородьскыи, святыя богородиця Успение въ Аркажи манастыри мѣсяця июня въ 4, на святого Митрофана.

Въ то же лѣто постави церковь нову архепискотъ Гаврила на Жатуни въ имя святыхъ 3-и отрокъ: Анания, Азария и Мисаила, и Данила пророка.

Въ то же лѣто родися Новегороде у Ярослава дъци княгыни на Рожьство богородици. Томь же лѣтѣ коньцаша церковь пишюще святого Благовѣщеняя.

Томь же лѣтѣ отяша посадницьство у Михаля и вдаша Мирошки Нездиницю.

Въ лѣто  6698/1190

Родися Новегородѣ у Ярослава сынъ Михаилъ, а княже имя Изяслав, а вънукъ Володимирь. Томь же лѣтѣ избища  пльсковици Чюдь поморьскую: пришли бо бяху въ 7 шнекъ и оболочилися около порога въ озеро, и удариша на не пльсковици и неВперёдмужа, а шнеке привезоша Пльскову въ городъ.

Въ лѣто  6699/1191

Ходиша новгородьци съ Корелою на Емь, и воеваша землю ихъ и пожьгоша и скотъ исекоша.

Въ то же лѣто сърубиша церковь на Городищи святого Николы князь Ярослав, а владыка въ дворе у себе Устретение господне; въ то же лѣто и святого Образа Вънездѣ Нѣздиниць, и святыя Пятьници на Търговищи Къснятине съ братомь.

Томь же лѣтѣ святи церковь боголюбивыи архепископъ Гаврила святого Възнесения, създана Милонегомь тысяцьскымь.

Въ то же лѣто ходи князь Ярослав на Лукы, позванъ полотьскою княжьею и полоцяны, и поя съ собою новъгородьць передьнюю дружину; и съняшася на рубежи и положиша межи собою любъвь, яко на зиму всѣмъ сънятися любо на Литву, любо на Чюдь; и приде князь Новугороду Ярославъ одаренъ.

Тъгда же родися у князя сынъ у Ярослава. И бысть на зиму и иде князь Ярославъ съ новъгородьци и съ пльсковици и съ оболостью своею на Чюдь и възя городъ Гюргевъ, и пожьгошя землю ихъ и полона бещисла приведоша; а сами придоша сторови въ Новъгородъ.

Въ лѣто  6700/1192

Иде князь Ярослав Пльскову на Петровъ день, и новъгородьци въмале; а самъ седе на Пльскове, а дворъ свои пославъ съ пльсковици воеватъ, и шьдъше възяша городъ Медвежю голову и пожьгоша, и придоша сторови.

Въ то же лѣто постави цьрковь вънизу на Хутинѣ Варламъ цьрнець, а мирьскымь именьмь Алекса Михалевиць, въ имя святого Спаса Преображения; и святи ю владыка архепископъ Гаврила на праздьникъ, и нарече манастырь.

Въ то же лѣто концяша церковь святыхъ Апостолъ на Силинищи, и святи ю архепископъ Григории на Петровъ день.

Въ то же лѣто въ Русе сърубиша церковь на островѣ, Мартурии игуменъ, въ имя святого Преображенияг и створи, и бысть прибежище манастырь крьстьяномъ.

Томь же лѣтѣ съгоре црькы на Хълмѣ святыхъ Апостолъ, зажьжена от грома.

Томь же лѣтѣ переставися игумения Мария святого Въскресения, и поставиша на месте Евдокию.  

Томь же лѣтѣ у святѣи Богородици въ Звериньци поставиша игумению.

Въ лѣто  6701/1193 

Преставися Гаврила, архепископъ новгородьскыи, мѣсяця маия въ 24, на святого Смена, иже на Дивнѣи горе, и положенъ бысть въ притворе святыя София, посторонь брата, нареченаго въ чьрнецьстве Григории.

Новгородьци же съ княземь Ярославомь и съ игумены и съ софьяны и съ попы съдумавъше, изволиша богомь избрана Мартурия, и послаша по нь, и приведоша из Русѣ, и посадиша и въ епископии, и послаша къ митрополиту; и присла по нь съ чьстью.

И иде с передними  мужи, и прия и съ любъвью князь Святослав и митрополитъ, и поставиша и мѣсяця декабря въ , на святого Данила стълъпника; и приде въ Новъгородъ мѣсяця генваря въ , на святого апостола Петра Съпадение веригамъ.

Въ то же лѣто идоша из Новагорода въ Югру ратью съ воеводою Ядреемь; и придоша въ Югру и възяша городъ, и придоша къ другому граду, и затворишася въ градѣ, и стояша подъ городомь  недѣль; и высылаху къ нимъ Югра, льстьбою рекуще тако, яко «копимъ сребро и соболи и ина узорочья, а не губите своихъ смьрдъ и своеи дани», а льстяще ими, а вое 2  копяче.

И яко скопиша вое и выслаша из города къ воеводѣ: «поиди въ городъ, поемъ съ собою 12 муж вячьшихъ»; и иде въ городъ воевода, поимя съ собою попа Иванка Легена и инѣхъ  вячьшихъ, исѣкоша я на канунъ святыя Варвары; и выслаша пакы, и пояша ихъ 30 муж вячьшихъ, и тѣхъ исѣкоша и потомь 50.

И яко изнемогоша голодомь, стояли бо бяху  недѣль, слушаюче льстьбѣ ихъ, и на праздьникъ святого Николы вылѣзъше из города, исѣкоша вся; и бѣ туга и беда останку  живыхъ; бѣ бо осталося ихъ 80 муж.

И не бяше вести чересъ всю зиму въ Новегородѣ на не, ни на живы, ни на мьртвы; и печяловахуся въ Новегородѣ князь и владыка и вьсь Новгородъ.

Въ то же лѣто родися въ Новегородѣ у Ярослава сынъ Ростислав.

Томь же лѣтѣ сърубиша церковь святую Апостолу на Хълмѣ Живогложю и святого Иоанна Милостиваго на воротехъ о Въскресения.

Въ лѣто  6702/1194

Зажьжеся пожаръ Новегородѣ въ недѣлю на Всѣхъ святыхъ, в говѣние, идуче въ заутрьнюю: загореся Савъкине дворе на Ярышевѣ улици, и бяше пожаръ зълъ, съгорѣша церкъви 10: 1святого Василия, святыя Троиця, святого Въздвижения, и много домовъ добрыхъ; и уяша у Лукини улици.

И не ту ся зло устави за грехы наша, нъ на другыи день загореся въ Чьглове улки, и погоре дворовъ съ 10.

И потомь боле въздвижеся: тои же недѣли въ пятници, въ търъгъ, загорѣся от Хревъкове улици оли до ручья Неревьскеи коньць, и съгорѣ церкъвии 7 и домове величии.

Оттоле въста зло: по вся дни загарашеся невидимо и 6 мѣстъ и боле; и не съмяху людье тировати 2 въ домъхъ, нъ по полю живяхуть; и потомь погоре Городище.

Томь же лѣтѣ и Ладога погоре переди Новагорода, а потомь и Руса погорѣ; а въ Людини коньци погорѣ дворовъ 10; и тако ся чюжяше от Всѣхъ святыхъ до Госпожина дни.

И тъгда придоша избытъкъ живыхъ изъ Югры. И убиша Сбышку Волосовиця и Негочевиця Завида и Моислава Поповиця сами путьники, а друзии кунами ся откупиша; творяхуть бо я съвѣтъ дьржаще на свою братью, а то богови судити.

Въ то же лѣто поставиша церковь святого апостола Филипа иа Нутьнѣи улици, и святи ю владыка Мартурии мѣсяця генваря въ 29, на святого Игнатия перенесение мощьмъ.

Въ то же лѣто прѣставися игуменъ Дионисии святого Георгия, и поставиша на мѣстѣ его Саватию.

Тои же зиме преставися игуменъ Герасимъ у святыя Богородиця въ Аркажи манастыри, и поставиша на мѣстѣ его Панъкратия попина.

Въ лѣто  6703/1195

Заложи церковь камяну на городьныхъ воротѣхъ боголюбивыи архепископъ новгородьскыи Мартурии въ имя святыя богородиця Положение ризы и пояса; и начяша дѣлати мѣсяця маия въ 4, на святого Исакия; а концяша мѣсяця августа въ 2, на святого Стефана; и святи владыка на праздьникъ святыя  богородиця  Положение ризы и пояса; и бысть крестьяномъ прибежище,  и радость и веселие вернымъ.

Тои же осени заложи церковь святого Въскресения камяну въ манастыри владыка Мартурии, и възделаша до двьрии охоло до осени.

Томь же лѣтѣ преставися раба божия Хрьстна святыя Варвары; и поставиша на мѣстѣ еи, избра владыка и сестры все, кротъку и съмѣрену именьмь Варвару Гюргевую Олекшиниця; и постави ю владыка на сборъ святыя Еуфимие.

Томь же лѣтѣ сърубиша цер.<овь нову святого Въздвижения и святого Василия и святого Дмитрия Ноздрьцину.

Томь же лѣтѣ, на зиму, позва Всѣволодъ новгородьце на Чьрниговъ, на Ярослава и на всѣ  Ольгово племя; и новгородьци не отпьрешася ему, идоша съ княземь Ярославъмь огнищане и гридьба и купци.

И быша на Новѣмь търгу, и присла Всѣволодъ и възвороти е съ чьстью домовь.

И послаша новгородьци къ нему Мирошку посадника и Бориса Жирославиця, Микифора съцьскаго, просяче сына, а Ярослава негодующе; и възворотишася въ Новъгородъ.

Тои же зимѣ бишася смолняне съ черниговьци, и поможе богъ цьрниговьцемъ, и яша кънязя Бориса Романовиця; и не бяше мира межи ими.

И прия Всеволодъ Мирошку и Бориса и Иванка и Фому, и не пусти ихъ  въ Новъгородъ, а самъ посла въ Половьце; и почаста вое копити Всѣволодъ и Давыдъ собе, а Ярославъ Цьрниговьскыи и Игорь съ братьею; и не бяше мира межи ими, нъ рать большю въздвигнуша.

Въ лѣто  6704/1196

Заложиста црьковь камяну святого Кюрила въ манастыри въ Нѣлезѣнѣ Къснятинъ и Дъмитръ, братеника, на Лубянѣи улици; и начаша дѣлати мѣсяця априля, а коньцяша мѣсяця июля въ 8, на святого Прокопия; и святи ю владыка Мартурии на зиму мѣсяця генваря въ 19, на святыя Татияны, при игумене Онисиме; и бысть радость крестьяномъ, а Къснятину и Дъмитру вѣчьная память.

Томь же лѣтѣ испьса црковь на воротехъ архепископъ Мартурии святыя Богородиця, а писець Грьцинъ Петровиць.

Въ то же лѣто концяша церковь святого Въскресения; и святи владыка Мартурии мѣсяця септября въ 13, на святого Корнилия, на канонъ святого Въздвижения, при игумени; а владыка тружаяся и горя въ день зноемь, а въ ноць печялуяся, абы коньцяти и видети церковь съвѣршену и украшену; и егоже желавъ, прия царство небесное и радость неисконьцяему въ вѣкы, аминъ.

Исходящю лѣту, слахуся новъгородьци къ Всѣволоду посадника дѣля Мирошке и Иванка и Фомѣ, пустилъ бо бяше Бориса и иные муже с нимь; а Всѣволодъ иде на Чьрниговъ, съкупивъ силу свою и половьчьску силу приведъ, и вожаше съ собою посадника новгородьскаго Мирошку и Иванка и Фому, а новгородьцемъ повеле ити на Лукы.

Идоша съ Ярославомь, и сѣдѣвъше на Лукахъ, воротишася домовь, а Всѣволодъ въшьдъ въ землю ихъ; и не вда богъ межи ими кръви пролития больша, и възяша миръ межи собою, а Новгородъ выложиша вси князи въ свободу: кде имъ любо, ту же собе князя поимають.

И възвративъся Всѣволодъ, пусти Фому Новугороду, а Мирошке и Иванка не пусти, и розгнѣви новгородьце; и съдумавъше новгородьце, и показаша путь из Новагорода и выгнаша и на Гюргевъ день, осень, Ярослава князя.

Иде князь Ярославъ на Новыи търгъ, и прияша и новоторожьци  съ поклономь; и жяляху по немь въ Новегородѣ добрии, а злии радовахуся.

И послаша Цьрнигову къ Ярославу по сынъ, и сѣдеша всю зиму Новегородѣ бесъ князя; а Ярославъ княжяше на Търъжьку въ своеи волости, и дани поима по всему  Вьрху и Мъсте, и за Волокомь възьма дань; а новгородьце измавъ Всеволодъ за Волокомь и по всѣи земли своеи, дьржаше у себе, не пустя ихъ Новугороду; нъ хожаху по городу по воли Володимири.

Тои же зиме святи церковь святого Кюрила въ Нелезенѣ епископъ Мартурии.

Въ лѣто 6705/1197 Приде князь ис Церьнигова Новугороду Яропълъкъ Ярославиць на вьрьбницю, настануцю лѣту мртъмь мѣсяцемь; и сѣдевъшю ему от вьрьбнице до Сменова дни  мѣсяць одину, и выгнаша из Новагорода, и послаша опять по Ярослава.

Иде Ярославъ съ Новаго търгу Володимирю, позванъ Всеволодомь.

Идоша из Новагорода переднии мужи сътьскии 3 и пояша Ярославасъ всѣю правьдою и чьстью; и приде на зиму Ярославъ по Крещении за недѣлю и седе на столѣ своемь, и обуяся съ людьми, и добро все бысть; и Мирошка приде посадникъ, сѣдевъ 2 лѣта за Новгородъ; и вси придоша неврежени ничимь же; и ради быша Новегородѣ вси от мала и до велика.

Томь же лѣтѣ постави церковь на острове святого Никифора Мартурии архепископъ. Въ то же лѣто постави манастырь святыя Еуфимия въ Плътьникихъ Полюжая Городьшиниця Жирошкина дъци.

Въ лѣто  6706/1198

Заложи церковь камяну въ Русѣ святого Преображения боголюбивыи архепископъ Мартурии; нацяша дѣлати мѣсяця маия въ 21, на святую цесарю Костянтину и Елены, а коньцяша мѣсяця июля въ 31, на святыя Улиты; и святи церковь на Успение святѣи Богородици, и створи праздьникъ честьнъ и служьбу створи, и помолися, глаголя: «господи боже, призри съ небесъ и вижь, и посѣти винограда своего, и съвѣрьши иже насади десниця твоя; и призри на церковь сию, юже създахъ рабъ твои; архепископъ Мартурии, въ имя святого твоего Прѣображения: да аще кто помолиться въ церкви сеи съ вѣрою, тъ услыши молитву его, и отпусти грѣхы его, молитвами святыя богородиця и всѣхъ святыхъ твоихъ, аминъ».

И веселяшеся блаженыи душею и теломь, устроивъ собе память вѣчьную и всѣмъ крестьяномъ честьныи манастырь.

Тои же весне преставистася у Ярослава сына 2: Изяслав бяше посаженъ на Лукахъ княжити 

и от Литвы оплечье Новугороду, и тамо преставися; а Ростиславъ Новѣгородѣ; и оба положена у святого Георгия въ манастыри.

Въ то же лѣто заложи церковь камяну князь великыи Ярославъ, сынъ Володимирь, вънукъ Мьстиславль, въ имя святого Спаса Преображения Новегородѣ на горѣ, а прозвище Нередице; и начаша дѣлати мѣсяця июня въ 8, на святого Федора, а кондяша мѣсяця септября.

На ту же осень придоша полочяне съ Литвою на Лукы и пожьгоша хоромы, а лучяне устерегошася и избыша въ городѣ. Томь же лѣтѣ заложиша церковь камяну святого Илие на Хълмѣ.

На ту же зиму ходи князь Ярославъ съ новъгородьци и съ пльсковици и съ новотържьци и съ ладожаны и съ всею областию Новгородьскою къ Полотьску, и устретоша полоцяне съ поклономь на озѣре на Касънле; и възьмъше миръ, възвратишася Новугороду: богъ бо не вда кръви пролитья крестьяномъ межи собою.

Въ лѣто  6707/1199

Приславъ Всѣволодъ, выведе Ярослава из Новагорода и веде и къ собе; а из Новагорода позва владыку и посадьника Мирошку и вячьшии мужи по сынъ.

И яко быша на озѣре Серегери, преставися рабъ божии архепископъ новгородьскыи Мартурии мѣсяця августа въ 24, на святого апостола Варфоломея; и привезоша и, положиша и въ притворе святыя София.

Идоша людье съ посадникомь и съ Михалкомь къ Всѣволоду; и прия е съ великою честью и вда имъ сынъ Святославъ; а въ Новъгородъ, съдумавъ  съ посадникомь, присла, и съ новъгородьци, и въведе въ епискупию Митрофана, мужа богомь избьрана; и всь Новъгородъ, шьдъше, съ честью посадиша и, донележе будеть от митрополита позвание: и тъгда поидеши на поставление.

Въ то же лѣто заложиша церковь камяну Святыхъ 40.

Томь же лѣтѣ постави церковь княгыни Ярославляя на Михалици манастырь святыя богородиця Рожьство, игумению поставиша Завижюю посадника.

Въ то же лѣто испьсаша церковь святого Преображения на Городищи.

Въ то же лѣто испьсаша церковь въ Русѣ святого Сааса владычьню въ манастыри. Приде же князь Святослав въ Новъгородъ, сынъ Всеволожь, вънукъ Гюргевъ, мѣсяця генваря въ 1, на святого Василия, и посадиша и на столѣ въ святѣи Софии, и обрадовася вьсь Новъгородъ. Въ то же лѣто въ Русѣ городъ обложиша.