Синодальный списсок

В лѣто  6768/1260 

Бысть тишина все лѣто.

В лѣто  6769/1261

Поби владыка новгородьскыи Далматъ святую Софью всю свинцемь. Того же лѣта мѣсяца ноября въ 8, на сборъ святог,о Михаила, сгорѣ церкы святого Василья, а дворовъ добрыхъ 30; а на заутрье на Славковѣ улици сгорѣ церкы святого Дмитрия, а дворовъ добрыхъ 50.

В лѣто  6770/1262

Срубиша новгородци городъ новъ, а с Литвою миръ взяша. Того же лѣта съгорѣ от грома церкы святого мученика Бориса и Глѣба: горазда бо бяше и лѣпа.

Того же лѣта, въ осенинѣ, идрща новгородци съ княземь Дмитриемь Александровичемь великымь полкомь подъ Юрьевъ; бяше тогда и Костянтинъ князь, зять Александровъ, и Ярославъ, брат Александровъ, съ своими мужи, и Полотьскыи князь Товтивилъ, с ним полочанъ и Литвы 500, а новгородьского полку бещисла, толко богъ вѣсть.

И бяше град твердъ Юрьевъ, въ 3 стѣны, и множьство людии в немь всякыхъ, и бяху пристроили собѣ брань на градѣ крѣпку; но честнаго креста сила и святои Софьи всегда низлагаеть неправду имѣющихъ: тако и сии град, ни во чтоже твердость та бысть, но помощью божиею одинымь приступлениемь взятъ бысть, и люди многы града того овы побиша, а другы изъимаша живы, а инии огнемь пожжени, и жены ихъ и дѣти; и взяша товара бещисла и полона; а мужа добра застрѣлиша с города, и Петра убиша Мясниковича.

И приде князь Дмитрии в Новъгородъ со всѣми новгородци съ многымь товаромь.

Того же лѣта постави чернець Василии церковь святого Василия, а богъ его вѣсть, своимь ли или Борисовымь Гавшинича; но подаи, господи, имъ отдание грѣховъ, и Василии святыи. Того же лѣта поиде князь Олександръ в Татары, и удержа и Берка, не пустя в Русь; и зимова в Татарѣхъ, и разболѣся.

В лѣто  6771/1263

Приде князь Олександръ ис Татаръ велми не здравя, въ осенинѣ, и приде на Городець, и пострижеся въ 14 мѣсяца ноября, на память святого апостола Филипа.

Тои же ночи и преставися; и везоша и въ Володимирь, и положиша и въ манастыри у святои Богородици Рожества; и снемшеся епископи и игумени съ митрополитомь Кюриломь и со всѣмь ерѣискымь чиномь и с черноризци и со всѣми суждалци, пагребоша и честно мѣсяца того же въ 23, на святого Амфилохия, в пятох; даи, гослоди милостивыи, видѣти ему лице твое в будущии вѣкъ, иже потрудися за Новъгородъ и за всю Русьскую землю.

Того же лѣта в Литвѣ бысть мятежь, богу попущьшю на нихъ гнѣвъ свои: въсташа сами на ся, и убиша князя велика Миндовга свои родици, свѣщавшеся отаи всѣхъ.

Того же лѣта роспрѣвшеся убоици Миндовгови о товаръ его, убиша добра князя Полотьского Товтивила, а бояры полотьскыя исковаша, и просиша у полочанъ сына Товтивилова убити же; и онъ вбѣжа в Новъгородъ с мужи своими.

Тогда Литва посадиша свои князь в Полотьскѣ; а полочанъ пустиша, которыхъ изъимали с княземь яхъ, а миръ взяша.

В лѣто  6772/1264

Выгнаша новгородцй князя Дмитрия Александровича, сдумавше с посадникомь Михаиломь, зане князь еще малъ бяше; а по Ярослава послаша, по брата Александрова, во Тфѣрь сынъ посадничь и лучшии бояры.

В лѣто  6773/1265

Посадиша в Новѣгородѣ на столѣ князя Ярослава Ярославича мѣсяца генваря въ 27.

Того же лѣта бысть мятеж великъ в Литвѣ божиемь попущениемь на нихъ: не тераяше бо господь богъ нашь зрѣти на нечестивыя и поганыя, видя ихъ проливающа  кровь христьяньскую  акы воду, и ины расточены от них по чюжимъ землямъ; тогда господь въздасть имъ по дѣломъ ихъ. Бяше у Миндовга, князя литовьского, сынъ, имя ему Воишелгъ; того избра господь поборника по правои вѣрѣ: шедъ бо в гору Синаискую от отца своего и от рода своего и от поганыя вѣры своея, позна истиньную вѣру христьяньскую, и крестися во имя Отца и Сына и святого Духа, и научися свягымъ книгамъ, и пострижеся въ мнишьскыи чинъ въ Святои горѣ; и пребывъ тамо 3 лѣта, поиде в землю свою къ отцю своему. Отець же поганъ сы, ласкаше его остатися вѣры христьяньскыя и чернечьства и прияти княжение свое; он же въоруженъ силою крестьною, не хотѣ и слышати ласкы отда своего,  ни прѣщения его не убояся, но ишедъ от отца, Сгради собѣ манастырь въ христьянехъ, и ту пребываше, славя святую Троицю, Отца и Сына и святого Духа.

По убиении же отца своего, не хотящю ему сего створити, но богу попущьшю на нихъ, на поганую Литву, за христьяньскую кровь, вложи сему въ сердце, соимя съ себе ризу, обѣщася богу на 3 лѣта, како прияти риза своя, а устава мнишьскаго не остася; съвкупи около себе вои отца своего и приятели, помоливъся кресту честному, шедъ на поганую Литву, и побѣди я, и стоя на земли ихъ все лѣто.

Тогда оканьнымъ възда господь по дѣломъ ихъ: всю бо землю ихъ оружиемь поплѣни, а по христьяньскои земли веселие бысть всюда.

Тогда вбѣгоша въ Пльсковъ съ  Литвы с женами и с дѣтми, и крести я князь Святьславъ с попы пльсковьскыми и съ пльсковичи; а новгородци хотѣша ихъ исѣщи, но не выда ихъ князь Ярославъ и не избьени быша.

В лѣто  6774/1267

Посадиша пльсковичи у себе князя Довмонта Литовьского. Того же лѣта вложи богъ въ сердце Довмонту благодать свого побороти по святои Софьи и по святои Троици, отмьстити кровь христьяньскую, и поиде со пльсковичи на поганую Литву, и повоеваша много, и княгыню Герденевую взяша, и  2 княлшча взяша.

Князь же Гердень совкупи около себе силу Литовьскую, и погонися по нихъ. И яко увѣдаша пльсковичи погоню, отслаша полонъ, а сами сташа крѣпко противу имъ о сю сторону Двины.

Литва же начаша бродитися на сю сторону; тогда пльсковичи сняшася с ними; и пособи богъ князго Довмонту съ пльсковичи, и множьство много ихъ побиша, а инии в рѣцѣ истопоша, толко убѣжа одинъ князь Гердень в малѣ дружинѣ; пльсковичи же придоша вси здорови.

Того же лѣта, на зиму, ходиша пакы пльсковичи на Литву съ княземь Довмонтомь.

Того же лѣта приде князь Ярославъ в Новъгородъ с полкы низовьскыми, хотя ити на Пльсковъ на Довмонта; новгородци же възбраниша ему, глаголюще: «оли, княже, тобѣ с нами увѣдавъшеся, тоже ѣхати въ Пльсковъ»;  князь же отсла полкы назадь.

В лѣто  6775/1267

По грѣхомъ нашим загорѣся на Кузмадемьяни улиди мѣсяца маия 23, передъ вечернею, и погорѣ всь конець Неревьскыи.

О, горе, братье, толь лютъ бяше пожаръ, яко и по водѣ хожаше огнь, и много товара погорѣ на Волховѣ в лодьяхъ, и нѣколико головъ сгорѣ, и одиномь часѣ все погорѣ; и мнози от того разбогатѣша, а инии мнози обнищаша.

Того же лѣта ходиша новгородци съ Елефѣрьемь Сбыславичемь и с Доумонтомь съ пльсковичи на Литву, и много ихъ повоеваша, и приѣхаша вси здорови.

В лѣто  6776/1268

Сдумаша новгородци с княземь своимь Юрьемь, хотѣша ити на Литву, а инии на Полтескъ, а инии  за Нарову. И яко быша на Дубровнѣ, бысть распря, и въспятишася и поидоша за Нарову къ Раковору, и много в земли ихъ потратиша, а города не взяша; застрѣлиша же с города мужа добра Федора Сбыславича и инѣхъ 6 человѣкъ; и приѣхаша здорови.

Того же лѣта сдумавше новгородци с посадникомь Михаиломь, призваша князя Дмитрия Александровича ис Переяславля с полкы, а по Ярослава послове послаша; и посла Ярославъ в себе мѣсто Святъслава с полкы.

И изискаша мастеры порочныѣ, и начаша чинити порокы въ владычни дворѣ. И прислаша Нѣмци послы своя, рижане, вельяжане, юрьевци и изъ инѣхъ городовъ, с лестью глаголюще: «намъ с вами миръ; перемогаитеся с колыванци и съ раковорци, а мы к нимъ не приставаемъ, а крестъ цѣлуемъ».

И цѣловаша послы крестъ; а тамо ѣздивъ Лазорь Моисиевичь  водилъ всѣхъ ихъ къ кресту, пискуповъ  и божиихъ дворянъ, яко не помогати имъ колыванцемъ и раковорцемъ; и пояша на свои руцѣ мужа добра из Новагорода Семьюна, цѣловавше крестъ.

И совкупившеся вси князи в Новъгородъ: Дмитрии, Святъславъ, брат его Михаило, Костянтинъ, Юрьи, Ярополкъ, Довмонтъ Пльсковьскыи, и инѣхъ князии нѣколико, поидоша к Раковору мѣсяца генваря 23; и яко внидоша в землю ихъ, и роздѣлишася на 3 пути, и много множьство ихъ воеваша.

И ту наѣхаша пещеру непроходну, в неиже бяше множьство Чюди влѣзше, и бяше нѣлзѣ ихъ взяти, и стояша 3 дни; тогда мастеръ порочныи хытростьюВперёдня воду, Чюдь же побѣгоша сами вонъ, и исѣкоша ихъ, а товаръ новгородци князю Дмитрию всь даша.

И оттолѣ поступиша к Раковору; и яко быша на рѣцѣ Кѣголѣ, и ту усрѣтоша стоящь полкъ нѣмецьскыи; и бѣ видѣти якои лѣсъ: бѣ бо съвкупилася вся земля Нѣмецьская.

Новгородци же не умедляче ни мало, поидоша к нимъ за рѣку, и начаша ставити полкы: пльсковичи же сташа по правои руцѣ, а Дмитрии и Святъславъ сташа по ІІраву же выше, а по лѣву ста Михаило, новгородци же сташа в лице желѣзному полку противу великои свиньи.

И тако поидоша противу собѣ; и яко съступишася, бысть страшно побоище, яко не видали ни отци, ни дѣди.

И ту створися зло велико: убиша посадника Михаила, и Твердислава Чермного, Никифора Радятинича, Твердислава Моисиевича, Михаила Кривцевича, Ивача, Бориса Илдятинича, брата его Лазоря, Ратшю, Василя Воиборзовича, Осипа, Жирослава Дорогомиловича,  Поромана Подвоиского, Полюда, и много добрыхъ бояръ, а иныхъ черныхъ людии бещисла; а иныхъ без вѣсти не бысть: тысячьского Кондрата, Ратислава Болдыжевича, Данила Мозотинича, а иныхъ много, богъ и вѣсть, а пльскович такоже и ладожанъ; а Юрьи князь вда плечи, или перевѣтъ былъ в немь, то богъ вѣсть.

Но то, братье, за грѣхы наша богъ казнить ны и отъятъ от насъ мужи добрыѣ  да быхом ся покаяли, якоже глаголеть писание: дивно оружие молитва и постъ; и пакы : милостыни совкупилася с постомь, от смерти избавляета человѣка; и пакы помянемъ  Исаия пророка, глаголюща, аще хощете послушати мене, благая земная снѣсте; аще ли не хощете, ни послушаете мене, оружие вы поясть, и тако поженеть единъ 100 васъ, а от ста побѣгнет 1000 васъ.

Мы же ту страсть видѣвъше, ни худѣ покаемся грѣхъ своихъ, но горше быхомъ на зло, братъ брата хотяще снѣсти завистию и друг друга, крестъ цѣлующе и пакы преступающе, а не вѣдуще, кака есть сила крестная: крестомь бо побѣжены бывають силы бѣсовьскыя, крестъ княземъ пособить въ бранехъ, крестомь огражаеми вѣрнии людие побѣжають супротивныя; иже бо крестъ преступають, то и сдѣ казнь приимають, и на ономь вѣцѣ муку вѣчную. Мы же на преднее възвратимся.

Бывшю бо великому тому снятию и добрымъ мужемъ главами своими покывающе за святую Софью, милосердыи  господь посла милость свою въскорѣ, не хотя смерти грѣшнику до конца, кажа нас и пакы милуя, отврати ярость свою от нас, и призрѣ милосерднымь си окомь: силою креста честнаго и помощью святыя Софья, молитвами святыя владычица нашея Богородица приснодѣвица Мария и всѣх святыхъ, пособи богъ князю Дмитрию и новгородцемъ, мѣсяца ферваря 18, на память святого отца Лва, в суботу сыропустную; и гониша ихъ, бьюче, и до города, въ 3 пути, на семи верстъ, якоже не мочи ни коневи ступити трупиемь.

И тако въспятишася от города, и узрѣша иныи полчищь свинью великую, которая бяше вразилася въ возникы новгородьскыѣ; и хотѣша новгородци на нихъ ударити, но инии рекоша: «уже есть велми к ночи, еда како смятемся и побиемся сами»; и тако  сташа близъ противу собѣ, ожидающе свѣта.

Они же оканьнии крестопреступници, не дождавъше свѣта, гюбѣгоша. Новгородци же стояша на костехъ 3 дни, и приѣхаша в Новъгородъ, привезоша братию свою избьеныхъ, и положиша посадника Михаила у святои Софьи.

Буди, господи боже милостивыи человѣколюбче, въ ономь вѣцѣ стати со всѣми угодившими ти от вѣка, иже кровь свою прольяша за святую Софью, животъ свои отдавше честно.

И даша посадничьство Павшѣ Онаньиничю; а тысячьского не даша никомуже, ци будеть Кондратъ живъ.

В лѣто  6777/1269

Придоша Нѣмци в силѣ велицѣ подъ Пльсковъ в недѣлю Всѣх святыхъ, и приступиша к городу, и не успѣша ничтоже, но большюю рану въсприяша, и стояша 10 днии.

Новгородци же съ княземь Юрьемь погонишася по нихъ, инии на конихъ, а инии в насадѣхъ поѣхаша вборзѣ; и яко увѣдаша Нѣмци новгородьскыи полкъ, побѣгоша за рѣку.

Новгородци же приѣхаша въ Пльсковъ, и взяша миръ чресъ рѣку на всеи воли новгородьскои.

Того же лѣта приѣха князь Ярославъ в Новъгородъ, и нача жалити: «мужи мои и братья моя и ваша побита; а вы розъратилися с Нѣмци», на  Жирослава Давыдовича и на Михаила Мишинича и на Юрья Сбыславича, хотя ихъ лишити волости.

Новгородци жех; князь же хотѣ из города ѣхати. Новгородци же кланяхуся ему: «княже, тѣмъ гнѣва отдаи, а от нас не ѣзди»; еще бо не добрѣ ся бяху умирили с Нѣмци. Князь же того не послуша и поѣха проче.

И послаша владыку с вятшими мужи с молбою, и въспятиша и с Броньници. Тогда же даша тысячьское Ратибору Клуксовичю по княжи воли, Того же лѣта, на зиму, князь Ярославъ, с новгородци сдумавъ, посла на Низовьскую землю Святъслава полковъ копитъ, и совкупи всѣх князии и полку бещисла, и приде в Новъгородъ; и бяше ту баскакъ великъ володимирьскыи, именемь Амраганъ, и хотѣша ити къ Колываню.

И увѣдавше Нѣмци, прислаша послы с молбою: «кланяемся на всеи воли вашеи, Норовы всеи отступаемся, а крови не проливаите»; и тако новгородци, гадавше, взяша миръ на всеи воли своеи. Князь же хотѣ ити на Корѣлу, и умолиша и новгородци не ити на Корѣлу; князь же отсла полкы назадъ.

В лето  6778/1270

Преставися  Варламъ, игуменъ святого Георгия, архимандритъ новгородьскыи. Того же лѣта бысть мятежь в Новѣгородѣ: начаша изгонити князя Ярослава из города, и съзвониша вѣче на Ярославли дворѣ, и убиша Иванка, а инии вбѣгоша в Николу святыи; а заутра побѣгоша къ князю на Городище тысячьскыи Ратиборъ, Гаврило Кыяниновъ и инии приятели его.

И взяша домы ихъ на разграбление и хоромы рознесоша; а къ князю послаша на Городище, исписавше на грамоту всю вину его: «чему еси отъялъ Волховъ гоголными ловци, а поле отьялъ еси заячими ловци; чему взялъ еси Олексинъ дворъ Морткинича; чему поималъ еси серебро на Микифорѣ Манускиничи и на Романѣ Болдыжевичи и на Варфломѣи; а иное, чему выводишь от нас иноземца,  котории у насъ живуть», а того мкого вины его; «а ныне, княже, не можемъ терпѣти твоего насилья; поѣди от насъ, а мы собѣ князя промыслимъ».

Князь же присла на вѣче Святьслава и Андрѣя Воротиславича с поклономь: «того всего лишюся, а крестъ цѣлую на всеи воли вашеи».

Новгородци же отвѣчаша: «княже, поѣди проче, не хотимъ тебе; али идемъ всь Новъгородъ прогонитъ тебе».

Князь же поиде из города по неволи; новгородци же послаша по Дмитрия Александровича; Дмитрии же отречеся, тако река: «не хочю взяти стола передъ ст

стрыемь своемь».

И быша новгородци печални; а Ярославъ нача полкы копити на Новъгородъ, и бѣ послалъ къ цесарю татарьску Ратибора, помочи прося на Новъгородъ.

И се учювъ князь Василии Ярославич, присла послы в Новъгород, река тако: «кланяюся святои Софьи и мужемъ новгородцемъ; слышалъ есмь, аже Ярославъ идеть на Новъгородъ со всею силою своею, и Дмитрии с переяславци, и Глѣбъ съ смолняны; жаль ми своея отчины»; а самъ поѣха в Татары, поима съ собою Петрила Рычага и Михаила Пинещинича, и възврати татарьскую рать, тако рекъ цесареви: «новгородци прави, а Ярославъ виновать».

Уже бо бяше цесарь отпустилъ рать на Новъгородъ по Ратиборову лживому слову, рече бо Ратиборъ цесарю: «новгородци тебе не слушають; мы дани прошали тобѣ, и они нас выгнали, а инѣхъ избили, а домы наша розграбили, а Ярослава бещьствовали».

Новгородци же поставиша острогъ около города по обѣѣ, а товаръ въвозиша в город.

И пригониша сторожи Ярославли мало не до Городища, и выидоша всь град въ оружии от мала и до велика къ Городищю, и стояша два дни пѣши за Жилотугомъ, а коневьници за Городищемь.

То увѣдавъ, Ярославъ гоиде об ону сторону к Русѣ и сѣде в Русѣ, а в Новъгородъ присла Творимира: «всего, что вашего нелюбия до мене, того лишаюся; а князи вси за мене поручатся».

Новгородци же послаша к нему Лазоря Моисиевича: «княже, сдумалъ еси на святую Софью; поѣди, ать изъмремъ честно за святую Софью; у нас князя нѣтуть, но богъ и правда и святая Софья, а тебе не хочемъ».

И совкупися в Новъгородъ вся волость Новгородьская, пльсковичи, ладожане, Корѣла Ижера, Вожане; и идоша в Голино  от мала и до велика, и стояша недѣлю на бродѣ, а Ярославль полкъ об ону сторону.

И присла мктрополитъ грамоту  в Новъгородъ, река тако: «мнѣ поручилъ богъ архиепископию в Русьскои земли, вамъ слушати бога и мене; кръви не проливаите, а Ярославъ всеѣ злобы лишается, а за то язъ поручаюся; аже будете и крестъ цѣловали, язъ за то прииму опитемью и отвѣчаю за то пред богомь».

И не да богъ кровопролития христьяномъ. И присла Ярославъ с поклономь в новъгородскыи полкъ, и взяша миръ на всеи воли новгородьскои, и посадиша Ярослава, и водиша и къ кресту.

Того же лѣта, на зиму, иде князь Ярославъ въ Володимирь, и оттолѣ иде въ Орду, а в Новѣгородѣ остави Андрѣя Воротиславича; а пльсковичемъ дасть князя Аигуста.

В лѣто  6779/1271

Померче солнце въ 5-ю недѣлю поста средѣ утра и пакы ыаполнися, и ради быхомъ. Того же лѣта постави церковь святого Савы Федоръ Хотовичь.

Поставиша же и другую церковь Козмы  и Демьяна на Холопьи улици.

В лѣто  6780/1272

Преставися князь великыи Новгородьскыи Ярославъ Ярославичь в Татарѣхъ, и положиша и въ Тфѣри у святою Козмы и Демьяна. И присла Дмитрии князь  послы своя в Новъгород с поклономь, хотя сѣсти в Новѣгородѣ; а Василии Ярославичь такоже присла с поклономь, хотя сѣсти на столѣ.

И сташа обои послы на Ярославли дворѣ; новгородци же съ посадникомь Павшею яшася по Дмитрия и послаша по него. Того же лѣта приѣха князь Дмитрии Александрович в Новъгород и сѣде на столѣ мѣсяца октября въ 9.

В лѣто  6807/1299 

Мѣсяца  априля 18, в суботу великую, въ 1 час ночи, загорѣся на Варяжьскои улици, и створися горе велико, по нашимъ грѣхомъ въздвижеся буря с вихромъ; и тако бысть силенъ огнь вборзѣ, кто, мало что похвативъ, выбѣжа изъ своего двора, а иное все огнь взя.

И вержеся огнь из Нѣмечьского двора в Неревьскыи конець, загорѣся на Холопьи улици, а тамо того силнѣе огнь, а неревляне на онои сторонѣ, а мостъ великыи огнь заялъ.

И тако створися пагуба велика; олна на свѣтѣ богъ и добрии люди уяша; а злии человѣци падоша на грабежи: что въ церквахъ, все разграбиша, бога не боячеся; а вѣдуче казнь божию, в покаяния мѣсто горшее зло створиша: въ святомь Иванѣ надъ товаромь сторожа убиша; а въ святомь Яковѣ сторожь сгорѣ; на Торговомъ полу 12 церквии сгорѣ, иконъ не всѣхъ успѣша выносити, ни книг; а въ Христовѣ церкви нѣколико головъ сгорѣ и два попа сгорѣша; в Неревьскомь конци 10 церквии сгорѣ и многа узорочья въ церквахъ, и мужь добръ сгорѣ Елефѣрии Лазоревичь; и бысть заутра печаль и сѣтование в радости мѣсто.

То же все бысть грѣхъ дѣля нашихъ; събыстся пророчесгво Исаия пророка, еже рече: «преложю праздникы ваша въ плач, и игрища ваша в сѣтование, да быхом ся остали от злобъ своихъ; твоя бо есть, господи, власть казнити и пакы миловати. Казнивъ, господи, помилуи ны».

Того же лѣта мѣсяца маия 22, на иамять святого мученика Висилиска, в пяток 4-и недѣли по Пасцѣ, въ7  час дни, преставися архиепископъ новгородскыи Климентъ, бывъ въ епископии лѣт 23, и положенъ бысть въ притворѣ святыя София от владычня двора архимандритомь Кюриломь и всѣми игумекы и всѣмь ерѣискымь чиномь и посадникомь Андрѣемь и всѣми новгородци.

Того же лѣта преставися Довмонтъ, князь Пльсковьскыи, много пострадавъ за святую Софью и за святую Троицю.

По преставлении же Климонтовѣ новгородци, много гадавше с посадникомь Андрѣемь, възлюбиша вси богомь назнаменана мужа добра и смѣрена Феоктиста, игумена святого Благовѣщения; и съзвонивше вѣче у святои Софьи, князь Борисъ Андрѣевич со всѣми новгородци въведоша его с поклономь, и посадиша и въ владычни дворѣ, донде увѣдають, кдѣ митрополит.

В лѣто  6808/1300

Приѣха Максим  митрополитъ в Новъгородъ, и ростовьскыи епискояъ Семенъ, и тфѣрьскы и епископъ Андрѣи, и поставиша архиепископа Новугороду Феоктиста; знаменаша его въ церкви святою Бориса и Глѣба, мѣсяца июля 29; того же мѣсяца и поставиша его въ святои Софьи, на память святою апостолу Петра и Павла; и бысть радость Новугороду о своемь владыцѣ.

Того же лѣта, веснѣ, погорѣ Новыи торгъ.

Тоѣ же весны заложиша церковь камену святого Михаила на Михаиловѣ улици. Того же лѣта срубиша 4 церкви: святыя Богородица в манастыри въ Звѣринци, и святого Лазоря, и святого Дмитрия на Бояни улкѣ, и святою Бориса и Глѣба на Подолѣ.

Того же лѣта придоша изъ замория Свѣи в силѣ велицѣ в Неву, приведоша изъ своеи земли мастеры, из великого Рима от папы мастеръ приведоша нарочитъ, поставиша городъ надъ Невою, на усть Охты рѣкы, и утвердиша твердостию несказаньною, поставиша в немь порокы, похвалившеся оканьнии, нарекоша его Вѣнець земли: бѣ бо с ними намѣстникъ королевъ, именемь Маскалка; и посадивше в немь мужи нарочитыи с вое. водою Стѣнемъ и отъидоша; князю великому тогда не будущю в Новѣгородѣ.

В лѣто 6809/1301

Приде князь великыи Андрѣи с полкы низовьскыми, и иде с новгородци къ городу тому, и приступиша к городу, мѣсяца мая 18, на память святого Патрикия, въ пяток пред Сшествием святого духа, и потягнуша крѣпко; силою святыя Софья и помощью святою Бориса и Глѣба твердость та ни во чтоже бысть, за высокоумье ихъ; зане всуе трудъ ихъ безъ божия повелѣния: град взят бысть, овыхъ избиша и исѣкоша, а иныхъ извязавше поведоша с города, а град запалиша и розгребоша.

А покои, господи, въ царствии своем душа тѣхъ, иже у города того головы своя положиша за святую Софью.

В лѣто 6810/1302

Заложиша город каменъ Новугороду. Того же лѣта заложиша церковь камену святою Бориса и Глѣба, которая порюшилася.

Того же лѣта посылаша послы за море в Доньскую землю, и привезоша миръ докончавше. Того же лѣта поиде князь великыи Андрѣи в Татары.

Того же лѣта свершиша церковь святого Михаила на Михаиловѣ улици.

В лѣто  6811/1303

Отъяша посадничьство  у Семена Климовича и даша брату его Андрѣю.

Того же лѣта срубиша 4 церкви деревяны: святого Георгия в Торгу, и святого Ивана Ишкову, и святою Козмы и Демьяна на Холопии улици, и святого Георгия на Борьковѣ улици.

В то же лѣто, на зиму, бысть зима тепла, не бысть снѣга чересъ всю зиму, и не добыша люди хлѣба, и бысть дороговь велика, туга велика и печаль людемъ.

Но не отчаемъся милости твоея; кажа, господи, накажи, а смерти не предаи: аще бо 

сгрѣшихомъ, но тебе не отступихомъ; казнивъ, помилуи, господи человѣколюбче, не по нашимъ дѣломъ злымъ, но по своеи велицѣи милости: ты еси богъ нашь, развѣ тебе иного бога не знаемъ.

В лѣто  6812/1304

Преставися великыи князь Андрѣи Александрович, внукъ великого Ярослава, мѣсяца июля 27, на память святого Пантелѣимока, постригъся въ скиму, и положенъ бысть на Городци; а бояре его ѣхаша во Тфѣрь.

И сопростася два князя о великое княжение: Михаило Ярославич Тфѣрьскыи и Юрьи Данилович Московьскыи, и поидоша въ Орду оба, и много бысть замятни Суждальскои земли во всѣхъ градѣхъ.

А в Новъгород вослаша тфѣричи намѣстникы Михаиловы силою, и не прияша ихъ, но идоша новгородци в Торжекъ блюстъ Торжку, и совкупиша всю землю противу, и съсылаючеся послы, розъѣхашася, докончавше до приѣзда князии.

В лѣто  6813/1305

Постави Семенъ Климович церковь камену на воротѣхъ от Прусьскои улици. Того же лѣта дѣлаша мостъ новъ чересъ Волховъ.

Того же лѣта священа бысть церкы святою мученику Бориса и Глѣба великымъ священиемь архиепископомь новгородскымь Фектистомь, мѣсяца декабря , на зачатье святыя Анны, въ державу христолюбиваго князя Михаила.

Лѣта  6814/1306

Лѣта  6815/1307

В лѣто  6816/1308

Сѣде князь великыи Михаило Ярослазичь, внукъ великого Ярослава Всеволодича, въ Новѣгородѣ на столѣ, в недѣлю, на Сборъ святыхъ отець 630, иже в Халкидонѣ.

Того же лѣта, на зиму, выиде архиепискоаъ Фектистъ изъ владычня двора, своего дѣля нездоровия, благословивъ Новъгородъ, и иде в манастырь къ Благовѣщению святыя богородица, изволивъ молчаньное житие.

Новгородци же вси съ игумены и со всѣмь ерѣискымь чиномь възлюбиша богомь избрана и святою Софьею отца его духовнаго Давыда, и съ честью посадиша и въ владычни дворѣ,  а Фектистъ благослови его въ свое мѣсто, и послаша его к митрополиту ставитъся.

Того же лѣта Якимовая Столбовича постави церковь камену на княжи дворѣ святыхъ Отець 318, иже в Никии.