Синодальный список

В лѣто  6817/1309

Поставленъ бысть въ Володимири архиепископъ Новугороду Давыдъ Петромь митрополитомь, мѣсяца июня 5, на память святого Никандра, и приде в Новъгород мѣсяца июля 20, на Ильинъ день, и срѣтоша и игумени и попове и всь Новъгород съ честью съ кресты, и посадиша и на столѣ; и ради быша новгородци своему владыцѣ.

Того же лѣта, на зиму, даша посадничьство Михаилу Павшиничю.

В лѣто  6818/1310

Ходиша новгородци в лодьяхъ и в лоивахъ въ озеро, и идоша в рѣку Узьерву, и срубиша городъ на порозѣ новъ, ветхыи сметавше.

Того же лѣта постави церковь камену на Коломцах архимандрит Кюрилъ Успѣние святыя богородица; а другую камену поставиша церковь на Дубенкѣ Покров святыя богородица, стяжаниемь раба божия Олония мниха.

Того же лѣта, на зиму, грабиша села около Новагорода.

Тои же зимы преставися архиепископъ новгородскыи Фектистъ, мѣсяца декабря 23, на память святыхъ мученик 10, иже въ Критѣ, и положенъ бысть въ церкви, в манастыри святыя богородица Благовѣщения, честно всѣмь ерѣискым чиномь.

В лѣто  6819/1311

Ходиша новгородци воиною на Нѣмецьскую землю за море на Емь съ княземь Дмитриемь Романовичемь, и переѣхавше море, взяша первое Купецьскую рѣку, села пожгоша, и головы поимаша, а скотъ исѣкоша; и ту убиенъ бысть Костянтинъ, Ильинъ сынъ Станимировича, в загонѣ.

Потомь взяша Черную рѣку всю, и тако по Чернои придоша к городу Ванаю, и взяша город, и пожгоша; а Нѣмци възбѣгоша на Дѣтинець: бяше бо мѣсто велми силно, твердо, на камени  высоцѣ, не имѣяоткуду же; и сослаша с поклономь, просяще мира; новгоровци же мира не даша.

И стояша 3 дни й 3 ночи, волость труче, села великая пожгоша, обилие все потравиша, а скота не оставиша ни рога; и потомь идуче, взяша Кавгалу рѣку и Перну рѣку, и выидоша на море, и придоша здорови вси в Новъгородъ.

Тои же весны, мая 19, в ночь, загорѣся на Яневѣ улици, и сгорѣ  дворовъ безъ 3-и 40, а головъ  сгорѣ 7-ро.

И потомь июня 28, в ночь, загорѣся на Розважи улици Глѣбовъ дворъ , и погорѣ конець Неревьскыи, сѣмо до гребли, а сѣмо и за Борькову улицю; и сгорѣ церковь святою Козмы и Демьяна, и другая святого Савы, и четыридесят церковь огорѣ, и домове добрии.

О, горе, братие, лютъ бяше пожаръ, с вѣтромь и вихромь, а злии человѣци и недобрии, бога не боячеся, видяще людемъ погыбель, пограбиша чюжая имѣния.

Потомь июля 16, в ночь, загорѣся на Ильинѣ улици, и ту такоже бысть лютъ пожаръ, вихромь наборзѣ, трѣскомь; и погорѣ торгъ, и домове по Рогатицю, а церквии сгорѣ деревяныхъ 7: святого Дмитрия и святого Георгия и святою Бориса и Глѣба, и святого Ивана Ишкова, и святыя Катерины, и святого Прокопья и Христова; а каменыхъ 6 огорѣ, 7-я Варяжьская.

А оканьнии человѣци, такоже бога не боящеся, ни суда божия помняще, ни жалующе своея братья, пограбиша чюжая имѣния. Въздажь имъ, господи, по дѣломъ ихъ.

Того же лѣта отъяша посадничьство у Михаила и даша Семену Климовичю. Того же лѣта архиепископъ Давыдъ постави церковь камену на воротѣхъ от Неревьского конца святого Володимира.

В лѣто  6820/1312 

Затратися князь Михаило к Новугороду и намѣстникы своя выведе, не пустя обилья в Новъгород, а Торжекъ зая и Бѣжичи и всю волость.

И иде владыка Давыдъ во Тфѣрь веснѣ, в роспутье, и доконча миръ; князь ворота отвори, а намѣстникы своя присла в Новъгородъ.

Того же лѣта владыка Давыдъ заложи церковь камену в Неревьскомь конци, на своемь дворищи, во имя святого отца Николы. 

В лѣто  6821/1313

Выѣха посадникъ ладожьскыи с ладожаны въ воину; и по грѣхомъ нашимъ изъѣхаша Нѣмци Ладогу и пожгоша.

Того же лѣта священа бысть церкы каменая святого Николы в Неревьскомь конци, юже созда архиепископъ Давыдъ, и створи в неи вседеньнуюслужбу, и черньци совъкупи.

В лѣто  6822/1214

Избиша Корѣла городчанъ, кто былъ Руси в Корѣльскомь городкѣ, и въведоша к собѣ Нѣмець; новгородци же с намѣстникомь Федоромь идоша на нихъ, и передашася Корѣла, и избиша новгородци Нѣмець и Корѣлу перевѣтниковъ.

Того же лѣта приѣха Федоръ Ржевьскыи в Новъгород от князя Юрья с Москвы, и изъима намѣстникы Михаиловы, и держаша ихъ въ владычни дворѣ, а новгородци с княземь Федоромь поидоша  на Волгу; и выиде князь Дмитрии Михаилович со Тфѣри и ста об ону сторону Волгы, и тако стояша и до замороза, а Михаилу князю тогда сущю въ Ордѣ.

Посемь докончаша съ Дмитриемь миръ, и оттолѣ послаша по князя Юрья на Москву, на всеи воли новгородскои; а сами възвратишася в Новъгород.

Тои же зимы, пред великымь заговѣниемь, приѣха князь Юрьи в Новъгород на столъ съ братомь Афанасьемь; и ради быша новгородци своему хотѣнию.

Тои же зимы хлѣбъ бяше дорогъ в Новѣгородѣ; а въ Пльсковѣ почали бяху грабити недобрии людие села и дворы в городѣ и клѣти на городѣ, и избиша ихъ пльсковичи съ 50 человѣкъ; и потомь бысть тихо.

В лѣто  6823/1315

Поиде князь великыи  Юрьи из Новагорода, позванъ въ Орду от цесаря, марта 15, в суботу Лазореву, оставивъ в Новѣгородѣ брата своего Афанасья. Того же лѣта поиде князь Михаило изъ Орды в Русь, ведыи с собою Татары, оканьнаго Таитемеря.

Услышавше же новгородци съ княземь Афанасьемь, изидоша к Торжку и пребыша ту съ  недѣль, вѣсть переимаюче. Тогда же поиде князь Михаило со всею Низовьскою землею и с Татары к Торжку; новгородци же съ княземь Афанасьемь и с новоторжци изидоша противу на поле.

Бысть же то попущениемь божиемь: съступившема бо ся полкома обѣма, бысть сѣча зла, и створися немало зла, избиша много добрыхъ муж и бояръ новгородскыхъ: ту убиша Андрѣя Климовича, Юрья Мишинича, Михаила Павшинича, Силвана, Тимофѣя Андрѣянова сына тысяцьского, Онанью Мелуева, Офонаса Романовича и купець добрыхъ много, а иныхъ новгородцевъ и новоторжьцевъ богъ вѣсть; а инии останокъ вбѣгоша в город и затворишася в городѣ с княземь Афанасьемь.

И присла князь Михаило к новгородцемъ в Торжекъ: «выдаите ми князя Афанасья и Федора Жревьского, а язъ с вами миръ докончаю».

И рекоша новгородци: «не выдаемъ Афанасья, но измремъ вси честно за святую Софью».

И присла князь Михаило опять: «выдаите ми Федора Жревьского»; и не хотѣвше выдати, по неволи выдаша его, и на собѣ докончаша  50 000 гривен серебра, и докончаша миръ и крестъ цѣловаша.

И по миру князь Михаило призва к собѣ князя Афанасья и бояры новгородскыи, и изъима ихъ, и посла на Тфѣрь в тали, а останокъ людии в городѣ нача продаяти,  колико кого станеть, а снасть отъима у всѣхъ. А бои бысть мѣсяца февраря 10, на святого мученика Харлампия.

И посла князь Михаило намѣстникы своя в Новъгород, а посадничьство даша Семену Климовичю.

В лѣто  6824/1316 

Выидоша намѣстници Михаиловы из Новагорода, и поиде князь Михаило к Новугороду со всею Низовьскою землею; а новгородци учиниша острогъ около города по обѣ сторонѣ, и соидеся вся волость новгородская: пльсковичи, ладожане, рушане, Корѣла, Ижера, Вожане.

Князь же Михаило, не дошедъ города, ста въ Устьянѣхъ; и тако мира не возма, поиде проче, не успѣвъ ничтоже, но болшюю рану въсприимъ: възвративше бо ся въспять, заблудиша въ озерѣхъ и в болотѣхъ; и начаша мерети гладомь, ядяху же и конину, а снасть свою пожгоша, а иное пометаша; и придоша пѣши в домы своя, приимше рану немалу.

Того же лѣта, еще не дошедшю князю Михаилу до города, яша Игната Бѣска, и биша и на вѣчи, и свергоша и с моста въ Волховъ: творяхуть бо его перевѣтъ державша к Михаилу; а богъ то вѣсть. Тогда же и Данилъко Писцевъ убьенъ бысть на рли от своего холопа: обадилъ бо его бяше к горожаномъ, тако река: «посылалъ мя с грамотами къ Михаилу князю».

В лѣто  6825/1317

Послаша новгородци владыку Давыда къ князю Михаилу с молбою, просяще на окупъ братьи своеи, кто у князя в талехъ; и не послуша его князь.

Того же лѣта приходиша Нѣмци въ озеро Ладожьское и побиша много обонижьскыхъ купець.

В лѣто  6826/1318

Ходиша новгородци воиною за море, в Полную рѣку, и много воеваша, и взяша Людеревъ город сумьского князя и пискупль; и придоша в Новъгород вси здорови.

Того же лѣта выиде князь великыи Юрьи изъ Орды с Татары и со всею Низовьскою землего, и поиде ко Тфѣри на князя Михаила.

И, приславъ Телебуту, позва новгородци; и они, приѣхавше в Торжекъ, и докончаша съ княземь Михаиломь, како не въступатися ни по одиномь: понеже не вѣдяху князя Юрья, кдѣ есть, и придоша пакы в Новъгород.

Князю же Юрью пришедшю с полкы близь Тфѣри за 40 верстъ, и ту выиде на нь князь Михаило со Тфѣри, и съступишася, и бысть сѣча зла, много паде головъ о князи Юрьи; а брата его Бориса и княгыню Юрьеву яша и приведоша во Тфѣрь, тамо ю и смерти предаша; а самъ прибѣжа в Новъгородъ, и позва новгородцевъ съ собою, и идоша с ним всь Новъгородъ и Пльсковъ, поимше владыку Давыда съ собою; и пришедше на Волгу, и докончаша с Михаиломь княземь миръ, како ити въ Орду обѣма, а брата Юрьева и княгыню пустити. И придоша новгорэдци вси в Новъгород, веснѣ сущи; а князь Юрьи иде на Москву и оттолѣ въ Орду.

В лѣто  6827/1319

Уби цесарь въ Ордѣ князя Тфѣрьского Михаила, а великое княжение дасть Юрью, и сына Михаилова Костянтина, и бояры его; и присла князь Юрьи в Новъгород брата Афанасья.

В лѣто  6828/1320

Ходи князь Юрьи ратью на Рязань на князя Ивана Рязаньского, и докончаша миръ.

В лѣто  6829/1321

Ходи князь Юрьи ратью на Дмитрия Михаиловича Тфѣрьского и приде в Переяславль с полкы.

И ту присла князь Дмитрии владыку тфѣрьского, и докончаша миръ на дву тысячю серебра, а княжения великого Дмитрию не подъимати.

Того же лѣта, мѣсяца июня 26, бысть знамение въ солнци пред обѣднею: чисту сущю небу, внезапу померче солнце яко на час, и бысть яко мѣсяць 5 ночии, и тма бысть яко в зимнюю ночь, и пакы наиолнися по малу; и ради быхом.

В лѣто  6830/1322

Приде князь Юрьи в Новъгород, позванъ  новгородци, и повелѣ порокы чинкти. Тогда же приходиша Нѣмци ратью къ Корѣльскому городку и не взяша его.

Того же лѣта поиде князь великыи Юрьи с новгородци къ Выбору, городу нѣмецьскому; и биша и 6-ю пороковъ, твердъ бо бѣ, и избиша много Нѣмедь в городѣ, а иныхъ извѣшаша, а иныхъ на Низъ поведоша; и стоявше мѣсяць, приступиша и не взяша его, но за грѣхы наша нѣколико муж добрыхъ паде.

Того же лѣта преставися князь Афанасии, брат Юрьевъ, постригъся в черньци; и положиша и у святого Спаса на Городищи.

Того же лѣта ходи князь Дмитрии Михаиловичь въ Орду, и подъя великое княжение.

Того же лѣта приходи в Русь посолъ силенъ изъ Орды, именемь Ахмылъ, и много створи пакости по Низовьскои земли, много посѣче христьянъ, а иных поведе въ Орду.

Князь же Юрьи пришедъ от Выбора, и поиде на Низъ, много моливъ новгородци, а быша и проводили.

И бывшю ему на Урдомѣ, и ту князь Александръ Михаиловичь со Тфѣри нападе на нь, да князь Юрьи самъ убѣжа в малѣ и вбѣжа въ Пльсковъ, а товаръ его всь разграбиша, а въ Пльсковѣ бяше Литовьскыи князь Давыдко; и оттолѣ призваша и новгородци по крестному цѣлованию.

В лѣто  6831/1323

Ходиша новгородци съ княземь Юрьемь и поставиша город на усть Невы, на Орѣховомь островѣ; ту же приѣхавше послы великы от свѣиского короля и докончаша миръ вѣчныи съ княземь и с Новымьгородомь по старои пошлинѣ.

Того же лѣта воеваша Литва Ловоть, и угониша ихъ новгородци, и биша я, а инии убѣжаша.

Того же лѣта заратишася устьюжане с новгородци, изъимаша новгородцевъ, кто ходилъ на Юргу, и ограбиша ихъ.

В лѣто  6832/1324

Идоша новгородци с княземь Юрьемь на Заволочье, и взяша Устьюгъ на щитъ, и придоша на Двину, и ту прислаша послы князи устьюжьскыи къ князю и к новгородцемъ и докончаша миръ по старои пошлинѣ; и придоша новгородци вси здорови; а князь Юрьи поиде въ Орду изъ Заволочья по Камѣ рѣцѣ.

Того же лѣта свершиша Христову камену церковь, и свяща ю владыка Давыдъ. Тои же зимы преставися архиепископъ новгородьскыи Давыдъ, мѣсяца февраря 5, на память святои мученици Агафьи; и положиша и въ притворѣ у святои Софьи, посторонь Климента.

Тогда же сдумавше новгородци и игумени и попове и черньци и всь Новъгород, възлюбиша вси богомь назнаменана Моисия, преже бывша архимандритомь у святого Георгия, потомь вышелъ бяше по своеи воли къ святои Богородици на Коломци въ свои манастырь, и възведоша и на сѣни, и посадиша и въ владычни дворѣ, дондеже позоветь его митрополитъ.

В лѣто  6833/1325

Приде изъ Орды князь Олександръ Михаиловичь, и Татарове с нимь должници, и  много  бысть тяготы на Низовьскои земли.

Того же лѣта поѣха владыка Моисии к митрополиту ставитъся на Москву; и привезоша при нем князя великого Юрья изъ Орды, сына Данилова, внука Александрова, и погребоша и митрополитъ Петръ и архиепископъ Моисии и тфѣрьскыи епископъ Варсонофии и ростовьскыи епископъ Прохоръ, рязаньскыи епископъ Григории, в суботу 1 поста; и плакася его князь Иванъ и всь народ плачемь великым, от мала и до велика: убилъ бо и бяше въ Ордѣ князь Дмитрии Михаилович безъ цесарева слова; не добро же бысть и самому: еже бо сѣеть человѣкъ, тоже и пожнеть.

В лѣто  6834/1326

Приѣха в Новъгородъ поставленъ архиепископъ Моисии, во вторник на вербьнои недѣли. Того же лѣта, мѣсяца августа 28, загорѣся на Бояни улкѣ, и погорѣ до половины Рогатици, а Славкова  улица от Дмитрия святого и до поля и церкы святого Климента сгорѣ.

Того же лѣта уби цесарь въ Ордѣ князя Дмитрия Михаиловича. Тои же зимы преставися митрополить Петръ всея Руси на Москвѣ, и положиша и въ церкви святыя Богородица, юже самъ началъ здати камену; молитвами его у гррба его створи богъ чюдеса.

Того же лѣта приѣхаша послы из Литвы: брат Гѣдиминовъ князя Литовьского Воини Полотскыи князь, Василии Мѣньскыи князь, Федоръ Святьславич; и докончаша миръ с новгородци и с Нѣмци.

В лѣто  6835/1327

Бысть мятежь в Новѣгородѣ, и пограбиша дворъ Остафьевъ Дворянинцевъ и пожгоша всь. Того же лѣта постави церковь святои богородици Рожество архиепископъ Моисии въ Десятинѣ.

Того же лѣта, на Успѣнье святыя богородица, князь Александръ Михаиловичь изби Татаръ много во Тфѣри и по инымъ городом, и торговци гость хопыльскыи исѣче: иришелъ бо бяше посолъ силенъ изъ  Орды, именемь Шевкалъ, съ множествомъ Татаръ.

И присла князь Олександръ послы к новгородцемъ, хотя бѣчи в Новъгород, и не прияша его.

Того же лѣта присла князь Иванъ Даниловичь намѣстникы своя в Новъгород, а самъ иде въ Орду.

На ту же зиму приде рать татарьская множество много, и взяша Тфѣрь и Кашинъ и Новоторжьскую волость, и просто рещи всю землю Русскую положиша пусту, толко Новъгород ублюде богь и святая Софья.

А князь Олександръ вбѣжа въ Пльсковъ; а Костянтинъ, брат его, и Василии в Ладогу; и в Новъгород прислаша послы Татарове, и даша имъ новгородци 2000 серебра, и свои послы послаша с ними к воеводамъ съ множествомь даровъ.

Убиша же тогда Татарове Ивана, князя Рязаньского.

В лѣто  6836/1328

Ходи князь великыи  Иванъ Данилович и Костянтинъ Михаилович, а новгородци от себе послаша Федора Колесницю, въ Орду кь  цесареви; и отпусти я цесарь, повелѣвъ искати князя Александра.

И посла князь Иванъ свои послы, а новгородци от себе владыку Моисия и Аврама тысячьского къ князю Олександру въ Пльсковъ, веляче ему, абы пошелъ въ Орду, и не послуша.

Того же лѣта погорѣ Юрьевъ Нѣмецьскыи всь и божници ихъ, и полаты каменыи скрушившеся падоша; и сгорѣ Нѣмець в полатахъ 2000 и 500 и 30, а Руси 4 человѣкы.

В лѣто  6837/1329

Приде в Новъгород на столъ князь великыи Иванъ Даниловичь, внукъ Олександровъ, марта 26, на сборъ архангела Гаврила; бяху же с ним и тфѣрьскыи князи Костянтинъ и Василии, и Олександръ Суждальскыи, и иныхъ много русскыхъ князии.  

Того же лѣта убиша въ Юрьевѣ новгородского посла мужа честна Ивана Сыпа.

Того же лѣта приходи в Новъгород митрополитъ, Грьчинъ родомь, именемь Феогностъ.

Того же лѣта поиде князь Иванъ со всѣми князи и с Новымьгородомь къ Пльскову ратью; и увѣдавше пльсковичи, выпровадиша князя Олександра от себе, а къ князю Ивану и к новгородцемъ прислаша послы с поклономь въ Опоку, и докончаша миръ.

Тои же зимы избиша новгородцевъ, котории были пошли на Юргу, устьюжьскыи князи.

Того же лѣта безъ князя и без новгородцевъ загорѣся Ондрѣшковъ дворъ въ Плотникѣхъ, и погорѣ и до Федора святого, и потом на тои же недѣли погорѣ Ильина улица мало не вся и Лубяница, и церкы святого Спаса и святого Лукы сгорѣ.

В лѣто  6838/1330

Пострижеся въ скиму архиепископъ Моисии, по своеи воли, и много молиша и новгородци всѣм Новымьгородомь с поклономь абы пакы сѣлъ на своемь престолѣ, и не послуша, но благослови я, рекъ: «изберѣте от себе мужа такого достоина, а язъ васъ благословляю».

И много гадавше новгородци, и быша безъ владыкы съ 8 мѣсяць, и възлюбиша всь Новъгород и игумени и попове богомь назнаменана Григорья Калѣку, мужа добра и смѣрена, попа бывша у святою Козмы и Демьяна на Холопьи улици; и пострижеся въ святыи ангельскыи образъ, мѣсяца генваря, и нареченъ бысть Василии, и посадиша и въ владычни дворѣ, дондеже послють к митрополиту.

Тои же зимы приѣхаша послове от митрополита из Велыньскои земли Федорко и Семенко, на страстнои недѣли, позыватъ на ставление. Того  же лѣта поставиша Василья въ Велыньскои земли в Новъгородъ.

В лѣто  6839/1331

Мѣсяца ноября въ 30, на память святого апостола Андрѣя, бысть помрачение въ солнци и стоя от 1-го часа до 3-го.

В лѣто  6840/1332

Въсташа крамолници в Новѣгородѣ, и отъяша посадничьство у Федора у Ахмыла и даша Захарьи Михаиловичю, и пограбиша дворъ Смена Судокова, а брата его Сенефонта села пограбиша.

Того же лѣта великыи князь Иванъ приде изъ Орды и възверже гнѣвъ на Новъгородъ, прося у нихъ серебра закамьского, и в томъ взя Торжекъ и Бѣжичьскыи верхъ за  новгородскую измѣну.

Том же лѣтѣ  отъяша посадничьство у Захарья и даша Матфѣю.

В лѣто  6841/1333

Приде князь Иванъ в Торжекъ съ всими князи низовьскыми ис рязаньскыми,  и присла в Новъгородъ, сведе намѣстникы а самъ сѣде в Торжьку от Крещения до Сбора, теряя волость Новгородьскую.

И послаша новгородьци послы, зовуче его в Новъгород: архимандрита Лаврентия, Федора Твердиславлича, Луку Валъфромѣева; и онъ молбы не приялъ, а ихъ не послушалъ, а миру не да, поѣха прочь.

Того же лѣта архиепископъ новгородьскыи Василии постави городъ каменъ въ два лѣта, и архимандритъ святого Юрья Лаврентии постави стѣны святого Юрья силою 40 саженъ и съ заборолами.

В  лѣто  6845/1337

Индикта 5 наважениемь дияволимь сташа простая  чадь на архимандрита  Есифа, а думои старого архимандрита Лаврентия, и створиша вѣче, и запроша Есифа въ церкви святого Николы; и сѣдоша около церкви нощь и день коромолници, стрегуще его.

А оже кто подъ другомъ копаеть яму, самъ впадется в ню.

В  лѣто 6853-ее./1345 

Индикта лѣто 3-ее, поновлена бысть церки си святыи Георгии покровомь, при великомъ князѣ Семенѣ Ивановичѣ, при архиепископѣ новъгородьскомь Василии, при посадницѣ Еустафьи, при тысячьскомь Аврамѣ, промысломь божиимь, поспѣшениемь святого мученика христова Георгия, повелѣниемь боголюбиваго архимандрита новъгородьского Есифа.

В  лѣто  6860/1352

Добиша челомъ новъгородьци, бояре и черныи люди архиепископу новъгородьскому владыцѣ Василию, чтобы «еси, господине, ехалъ нарядилъ костры во Орѣховѣ»; и онъ ехавъ, костры нарядилъ, и приеха в Новъгородъ.

И приехаша послове изо Пскова, биша челомъ владыцѣ Василию, ркуче такъ: «богови тако изволшю, святои троицѣ, дѣтемъ твоимъ пьсковицемъ богъ реклъ жити дотолѣ, чтобы еси, господине, былъ у святои Троици и дѣтии своихъ благословилъ псковиць».

И онъ не умедли поеха, поимя собою архимандрита Микифора, игумены, попове, приеха въ Псковъ, служи въ святои Троици, у святои Богородици на Снѣтнои горѣ, у святого Михаила, у Ивана Богослова, опять въ святои Троици, ходи около города со кресты, и благослови дѣти своихъ всихъ псковиць.

Поеха ис города, доеха до Прощеника въ день  недѣлныи; обечерившися за Прощеникомъ сь едину версту, на рѣцѣ на Чересѣ сташа; и разболѣся ту; привезоша его в манастыри ко святому Михаилу, усть Узы рѣки, на Шелонѣ; и приставися ту, на память святого мученика Уакинфа, въ вторникъ ; привезоша и в Новъгородъ в четвергь, мѣсяця июля въ 5, на память святого отца Лампада; проводи и архиепископъ новъгородьскии  владыка Моисѣи, игумени и попове и весь Новъгородъ, и положиша и у святои Софьи притворѣ.