Статьи, находящиеся в рукописи № МДА 69 после летописного текста.

Уставная грамота Новгородского князя Всеволода Мстиславовича церкви св.Иоанна Предтечи на Опоках

Се азъ князь великии Гаврилъ, нареченыи Всеволодъ, самодръжець Мьстиславичь внукъ Володимиръ, владычествующю ми всею Рускою землею и всею областью Новгороцкою, божиимъ благоволением поставилъ есми церковъ святыи великыи Иванъ на Петрятинѣ дворище, и устроилъ есми ю иконами многоцѣннами, и еуангелиемъ многоцѣннымъ, и всѣми книгами исполнь, устроилъ есми попы и дьяконы  въ зборнои великои церкви.

И даю святому великому Ивану, от своего великоимѣния, на строение церкви и в вѣкы, вѣсъ вощанои, а в Торжку пудъ вощанои, половина святому Спасу, а половина святому  великому Ивану на Петрятино дворище.

А оброка попомъ, и дьякону, и дьяку, н сторожамъ из вѣсу вощаного имати: попомъ по осми гривенъ серебра, а дьякону четырѣ гривны серебра, а дьяку три гривны серебра, а сторожамъ три гривны серебра.

А имати имъ тои оброкъ и в вѣкы, на всякии годъ по моему данью великого князя Всеволода. А попомъ пѣти у святого Ивана вседенная, у святого Захарьи на полатѣхъ пѣти по неделямъ и в вѣкы, а дьякону пѣти у святого Ивана субота да неделя, ис того оброка, и в вѣк.

И язъ князь великии Всеволодъ поставилъ есми святому Ивану три старосты от житьихъ людеи, и от черныхъ тысяцкого, а от купцевъ два староты,  управливати имъ всякие дѣла Иванская, и торговая, и гостинная, и суд торговыи, а Мирославу посаднику в то не вступатца, и инымъ посадникомъ, в Ываньское ни въ что же, ни боярамъ новгороцкымъ.

А хто хочетъ в купѣчьство вложится в Ыванское, дастъ купьцемъ пошлымъ вкладу пятьдесятъ гривенъ серебра, а тысяцкому сукно ипьское, ино купцамъ положить въ святыи Иван полътретьяцать гривенъ серебра.

А не вложится хто в купечьство,  не дастъ пятьдесятъ гривенъ серебра, ино то не пошлыи купець. А пошлымъ купцемъ ити имъ отчиною и вкладомъ.

А весити имъ в притворе святого Ивана, гдѣ дано, ту его и дръжати. А весити старостамъ Иваньскимъ, двѣма купцемъ пошьлымъ, добрымъ людемъ, а не пошлымъ купцем старошениа не дръжати, ни весу имъ не вѣсити Иваньского.

А у гостя имъ имати: у низовьского от дву бѣрковска вощаныхъ полъгривне серебра да гривенка перцю, у полоцкого и у смолѣньского по двѣ гривны кунъ от берковъска вощаного, у новоторжанина полторы гривны от берковъска вощаного, у новгородца шесть мордокъ от берковска вощаного.

А куны имъ класти святого великого Ивана в домъ, что вывесятъ, по правому слову. А новгородцю не вѣсити ни на которого гостя.

А по моемъ животѣ, великого князя Всеволода, стояти за домъ святого великого Ивана брату моему великому князю всея Русии, и владыцѣ новгороцкому, и старостамъ купецькимъ и купцам, и за вся церковникы святого Ивана.

А взять князю великому из вѣсу вощаного полтретьяцать гривен серебра черезъ год. А праздникъ Рожество святого великого Ивана почесть створити и празновати старостамъ купецкимъ и купцамъ.

А имати старостамъ купецкимъ и купъцемъ из вѣсу нз вощаного на полътретьяцать гривенъ серебра, на всякыи праздникъ святого Ивана и в вѣкъ, а старостамъ купецкимъ святого великого Ивана ставити на праздникъ святого Ивана семъдѣсятъ свѣчь и тѣмъянъ и ладанъ.

А пѣти в празьдникъ владыцѣ. А старостамъ купѣцкимъ и купцамъ дати владыцѣ гривна серебра да сукно ипьское. А на завтрѣе пѣти анхимандриту святого Егоргиа, а взять ему полъгривне серебра; а на третеи день пѣти игумену святеи богородици из Онътонова манастыря, взять ему полъгривне серебра.

И язъ, князь великии Всеволодъ, далъ есми пошлины попомъ святого великого Ивана Петрятино дворище с купець в Руси, на память княземъ великымъ дѣдомъ моимъ и прадѣдомъ имати с купець тая в вѣкы: съ тверского гостя, и с новгородцкого,  и з бѣжицкого, и з деревьского, и съ всего Помостья.

А буевище Петрятино дворище от прежнихъ двереи святого великого Ивана до погрѣба, от погрѣба до Концаньского мосту, а того буевища имати куны старостамъ Иваньскимъ и старостамъ Поберескимъ, а класти куны в домъ святого великого Ивана.

А поповъ святого великого Ивана, и дьякона и дьяка,  и сторожовъ, призирати старостамъ Иваньскимъ, и купцамъ и старостамъ Поберескимъ и побережаномъ. А в дому святого Ивана не дръжати никому ничего же, но развѣе  свѣчи и тѣмъяна.

А городу, ни владыцѣ, ни боярам вѣсу не отъимати у святого великого Ивана, ни продавати моего данья великого князя Всеволода. А хто почнѣтъ вѣсъ отъимати, или проЦдавати, или домъ обидити святого великого Ивана и святого Захарьи, на того спасъ и пречистая и святыи великыи Иванъ, будѣтъ имъ тма, и съблазнь, и казнь божия. 

А се 5 роды рускихъ князеи. 
Первое князь  Рюрикъ, пришедъ  из Немець, роди  Игоря. А Игорь роди Святослава.  А Святославъ роди Володемѣра, иже крести Рускую землю.

А Володимѣръ роди Ярослава; егоже грамота в Новѣгородѣ. Ярославъ роди Всеволода. А Всеволодъ роди Володимѣра, иже нарицается Манамахъ. А Володимѣръ роди Гюргя. Гюргии роди Всеволода Великого Гнѣзда. Всеволодъ роди Ярослава. При семъ Тотарьскую землю взяша. Ярославъ роди Александра Храбраго.

Алекъсандръ роди Данилья. А Данилеи роди Ивана Доброго, иже исъправи Рускую землю от татеи, от разбоиникъ, ото всякого мятѣжа. А Иванъ роди Ивана. А Иванъ роди Дмитрѣя князя, тои бо Дмитрии съсвѣщася самодръжцемъ.

А Дмитреи роди Юрья. 

Слово святого Ефрема. Како достоитъ съ всѣмъ предлежаниемъ честити святыя книги безъ лѣности.

Брате, егда ти наидѣтъ лукавыи помыслъ, извлѣци сии мѣчь, еже есть помянути страхъ божии и посѣци всю силу вражию.

Имѣи въ утробѣ мѣсто книги божественыя, тацим же образомъ труба въпиющи съзываетъ ны, воины, тако божественыя книги чтомы, збираютъ помыслы на страхъ божии, и паки тацим же объразомъ въпиющи труба въ время рати невѣгласа въставить прилѣжати на супротивныя.

Тако и святыя книги въставять ти умъ, прилежа ти на благое и укрѣпятъ тя на страсти. Тѣмъ же, брате мои, понужаи себѣ часто почитати я, да получимъ истинныи разумъ писания почитанием, черплюще от него воду живу, могущую устудити ражьженыя наша страсти и наставиі ны на всю.

Мужъ мудръ, не имѣя  книгъ, подобенъ есть оплоту безъ подпоръ стоящю: аще будѣтъ вѣтръ, то падется. Тако и мудрии: пахнувшу на нь вѣтру грѣховному, падеть ся не имыи подъпора книжныхъ словесъ.

Аще ли мудрость книги, то свершенъ есть. Иванъ (Бого)словъ рече: п(ти)цамъ того р(ади) даны крылѣ, (да) сѣти человѣчьи  (и)збѣжать; а (че)ловеком же (кни)ги, яже всю неприязную лѣсть отгоняютъ.

Генадръ рече: имѣнье книгъ паче злата, въ множествѣ злата души помощи нѣсть.