Ответ Яну Роките 10 убо мое слово
Вчера, 06:14

Не хочешь слушать как люди врут, сам ври В.И.Даль Неправда - ложь

Послания Ивана Грозного

Ответ Яну Роките 10 убо мое слово

А что еси писалъ о молитвѣ, что святых на помощь не призываешь и литоргии не слушаешь, и о томъ писано выше того много, а нынѣ вмале изреку ти. Аще бы еси на основании Христовѣ и апостолскомъ назидании былъ, и во оградѣ священныхъ учений былъ словесная овца, ничесоже бы еси апостолскихъ повелѣний разрушал. Аще ли разрушаеши, не токмо козлище еси, но хищникъ и волкъ, тать и разбойникъ. И яко речено есть во Евангелии: «Яко прелазя преграду, той тать есть и разбойникъ». Якоже Громовъ сынъ глаголетъ: «Изыдоша от нас, но не бѣша от насъ; аще убо Быша были от нас, пребыша убо были с нами». И паки наводит, глаголя: «Не пребываяй во учении Христовѣ, Бога не имать, и се есть Антихристовъ». Памятуй то, и яко в Луцѣ речено есть: «Отметаяйся апостолъ, Христа отметается». И есть в Матфее писано: «Иже Господу Богу поклонишися и тому единому послужиши». То рече Господь ко дияволу. О апостолехъ и о всѣх святых, како подобаетъ имъ молитися, выше написахомъ.

О литоргии подлинно во Евангелии написано есть. По семъ священныи апостолы уставиша молитвы, и святыя отца, како литоргию сотворити. Или мниши, яко просто хлѣбъ и вино? Како убо воспоминати смерть Господню, аще литоргия не сотворяти? Апостолъ убо Павелъ, къ коринъфомъ пиша, глаголетъ: «Аз убо прияхъ от Господа и предах вамъ, яко Господь Исусъ въ нощь, в нюже предан бываше, прия хлѣб, благодаривъ, преломивъ, рече: „Приимѣте и ядите. Се есть тѣло мое, еже за вы ломимое. Се творите в мое воспоминание». Тако и чашу по вечери, глаголя: «Сия чаша Новый Завѣт есть о моей крови. Се творите, елико аще пиете, в мое воспоминание. Елико аще ясте хлѣбъ сей и чашу сию пиете, смерть Господню возвѣщаете"». И Господу нашему Исусу Христу глаголющу, егда на божественней своей страсти возлегъ со обѣманадесять ученикома своима и рече къ нимъ: «И приемъ хлѣбъ, хвалу воздавъ, преломи, дасть имъ, глаголя: «Се есть тѣло мое, и за вы даемое; се творите в мое воспоминание». Такоже и чашу по вечери, глаголя: «Сия чаша Новый Завѣт есть моею кровию, еже за вы проливается"». Сия убо в Луцѣ, Матфѣй и Марко глаголетъ: «Се есть кровь моя Новаго Завѣта, еже за многия изливаема во оставление грѣховъ». Смотри сего, како воспоминание Господне сотворити, аще литоргии нѣсть? Паче убо самъ, научая учениковъ своихъ и апостоловъ молитву сотворяти, самъ воздая хвалу Богу и Отцу, якоже при Лазори, тако и здѣ. И сего ради убо, аще ли кто литоргия не совершает, тот смерти Господни не возвѣщаетъ, и се есть Антихристъ и развратникъ вѣре Христовѣ. Избранному же сосуду апостолу Павлу глаголющу: «Вся кровию очищаются по закону, без кровопролития не бывает оставление. Но в них воспоминание грѣхомъ на коеждо лѣто, невозможно бо крови юнчей и козлей отпущати грѣхи». Тогда рече: «Се прииду сотворити волю твою, Боже. Отъемлетъ 1, еда 2 поставит. О нейже воли освящени есми и приношениемъ тѣла Исусъ Христова единова». Видиши ли, како о литоргии пиша, глаголет, яко подобает ю творити и послушати? Не хотящимъ сего сотворити таково запрещение полагаетъ, глаголя: «Волею бо согрѣшающимъ намъ, по приятию разума истинне, к тому о грѣсѣхъ не обрѣтается жертва. Страшьно чаяние суда и огня зависть, поясти хотя противныя. Отвергся кто Закона Моисеова, без милосердия при двою или триех свидѣтелей умираетъ. Колицей, мнитца, сподобитися горцѣй муцѣ, иже Сына Божия поправ и кровь завѣтную просту непщева, в нейже освятися, и Духъ благодати укоривъ? Вѣмы бо рекшаго: Мнѣ отмщение, аз воздамъ – глаголеть Господь». Сия убо доздѣ.
 

Библиотека литературы Древней Руси / РАН. Ин-т рус. лит. (Пушкинский дом) ; под. ред. Д.С. Лихачева и др. - Санкт-Петербург : Наука, 1997-. / Т. 11: XVI век. - 2001. - 681 c.

Категория: Послания Ивана Грозного | Добавил: coldaevatatyana2016 | Теги: дополнения, 10убо мое слово, Слово по слову, К пословицам, Послания Ивана Грозного, Ответ Яну Роките
Просмотров: 2 | Загрузок: 0 | Рейтинг: 0.0/0


Всего комментариев: 0
avatar