| 21.11.2026, 06:08 | |
Не хочешь слушать как люди врут, сам ври В.И.Даль Неправда - ложь Послания Ивана Грозного Ответ Яну Роките 11 убо мое слово Се часто поминаешь о ходатайстве Исус Христовѣ. И ты слыши: ходатайство Господа нашего Исуса Христа се есть и божественных его ученикъ, и апостолъ, и святыхъ отецъ. Ходатайство Господа нашего Исуса Христа се есть, якоже писано в Бытийсках книгах: искони сотвори Богъ небо и землю, видимая вся и невидимая, послѣди же Адама и Евву, и заповѣдь положи ему. Оному преступльшу заповѣдь, изгнанъ бысть ис породы райския и осуженъ смертию и тяжестию плоти. Раю приставлени бысть херувими, с пламенным оружиемъ стрегущии врат Едемскых, да никто входит во нь. Не мни убо се, яко противникъ кто Богу есть и властию похитити райское селение, но ради сего приставлено бысть пламенное оружие, возвѣщая гнѣвание Божие к человекомъ. И оттоле царствоваше смерть и грѣх человекомъ, на несогрѣщихъ, от Адама до Ноя, от Ноя до Авраама, от Авраама до Моисея, от Моисея до Христова воплощения. Якоже рече Павелъ, ко евреом пиша, глаголетъ: «Святии вси, иже вѣрою побѣдиша царствия», и прочая, – «И си вси послушествовани вѣрою, не прияша обѣтования, Богу о насъ лучшее что прозрѣвшу, да не без нас совершени будутъ». Понеже бо до Христова пришествия, аще и праведнии непорочни бяху кои обрѣтаеми, но обаче осужениемъ адамовымъ вси умираху и во ад схожаху. И видѣвъ Богъ создание свое, от диявола мучимо, и милосердова – посла Сына своего воплотитися от пречистыя присно Дѣвы Мария на спасение человекомъ. Якоже рече избранный апостолъ Павел: «Посла Богъ Сына своего единороднаго, ражающася от жены, бывающа под закономъ, да подзаконныя искупит, да всыновление приимемъ». И паки, ко евреомъ пиша, глаголетъ: «Имуще убо, о братие, дерзъновение вход святых кровию Исус Христовою, и обнови нам путь новъ завѣсою, сиирѣчь плотию своею, и святителя велика на дому Божии». Сие убо ходатайство Господа нашего Исуса Христа. Яко речено бысть в Луцѣ о рождествѣ Господа нашего Исуса Христа: «Внезапу бысть со аггеломъ множество вой небесных, хвалящих Бога и глаголющихъ: Слава в вышнихъ Богу и на земли мир, во человецѣх благоволение». Понеже гнѣв Божий и вражда, на человѣцхъ пребывая от Адама и до воплощения Христова, Христовымъ божественнымъ плотнымъ смотрениемъ вся сия разрушися: и смерть, и грѣх, и дияволя держава. Самовластни Быша человецы Христовою благодатию и научени, како подобает побѣждати князя тмы вѣка сего и миродержителя. И волю Божию совершивъ, и о божественемъ его слове содѣйствомъ Святаго Духа и Царства Небеснаго наслѣдницы будем. Самоволно не приемлющи заповѣди Христовы и самовластно диаволу покарящеся снидутъ въ муку вѣчную; понеже бо до Христова пришествия и неволею, аще и праведни бяху, но ради Божия гнѣва и проклятия Адамля дияволъ область имяше, и душа ихъ во адъ сводяшеся. Исус Христос, пришед, воплощениемъ своимъ, и распятиемъ, и воскресениемъ сию клятву разруши, бывъ по насъ клятва, и миръ Божий давъ человекомъ, и древний гнѣвъ разори, еже о Адаме, и дияволю дрьжаву разруши, и самовластна человека сотвори, якоже и Адамъ бысть преже преступления, творити добро и зло. Якоже рече апостолъ Павелъ, пиша к римляномъ: «Слава, и честь, и миръ всякому дѣлающему благое. Повинующимся неправде – ярость, гнѣвъ. Скорбь, теснота на всякой души человека, творящаго злое». И научи Господь нашъ Исус Христос, како подобает заповѣди его, Отца и Святаго Духа совершати и Царствию Небесному наслѣдникомъ быти. И се, егда возношашеся на небеса, предасть божественнымъ своимъ ученикомъ и апостоломъ, посылая ихъ на проповѣдь и повелевая к тому иныхъ научити. Се есть ходатайство Господа нашего Исуса Христа. «Приидѣте, возрадуемся Господеви, настоящую тайну исповѣдающе, средоградия стѣны разорися, и пламенное оружие плещи дает ми, и херувимъ отступает от древа жизни, и райския пища причащаюся, от негоже изгнан бых ослушания ради, ибо неизмѣнный образ Отечь, образъ подобия присносущия его, образъ рабий приемлет. Из неискусобрачныя матере исшед, не преложение прият, иже бѣ пребысть. Богъ сый истиненъ. И еже не бѣ приято, человек быв человеколюбия ради». И пакы в воскресных стисѣх глаголетъ: «Животворящему твоему кресту бес престани кланяющеся, Христе, и тридневное твое воскресение славимъ. Тѣмъ бо обнови истлѣвшее человеческое естество, всесилне, небесный входъ обновил еси намъ, яко единъ благъ и человеколюбецъ». Се есть ходатайство Господа нашего Исуса Христа. И много тебѣ изрекъ от Божественнаго Писания, но ты о семъ, яко онагръ не вѣруеши, и «яко аспидъ глухий, затыкая уши свои, и не слышиши гласа истинне нынѣ обавающаго тя». Ходатайство апостольское и святыхъ отецъ – учити люди и наказывати, како подобаетъ заповѣди Христовы совершати, яже выше рѣче, яко вси полагаху на основании Христовѣ, якоже апостолъ Павелъ пишет, яко: «Основания никто может положити иного паче лежащаго, иже есть Христос». От Христова бо воплощения и доселе вси нарицаемся християне и во ино имя не крещаемся, развѣ во имя Отца и Сына и Святаго Духа. И вси убо божественнии апостоли и священныя отца учили и проводили людей, руководствующе и к спасеннымъ заповедемъ Христовымъ, и недоумѣннымъ словомъ и вещемъ научили, и растворях, како подобаеть вѣровати и заповѣди Христовы сотворяти. Яже убо выше сего много о томъ писах ти от Божественаго Писания, что есть ходатайство Господа нашего Исуса Христа, и что учение божественных апостолъ и святых отецъ. Аще ли не хощеши похвалити святыхъ отецъ и святыхъ апостолъ, руководству ихъ послѣдовати и нарицати ихъ, яко наставника спасению, подобаетъ ти писанию ихъ не вѣровати. И аще ли писанию ихъ не вѣровати, то почесому разумѣти, яко есть Богъ, и яко во Троицы славится, и чесо ради съ небесе сниде, и воплотися, и пострада, и воскресе, и вознесеся на небеса. Како разумѣти заповѣди Божия? Воистинну убо тма есть, еже не разумѣти вѣры в Бозе. Како убо разумѣти, аще не кто наставиот. Божественныхъ апостолъ и святых отецъ поучениемъ свѣт вѣры видимъ. Якоже Громовъ сынъ Иоанъ глаголя: «Яко позна Господа, и заповѣди его не соблюдаетъ, ложь есть, и в семъ истинны нѣсть. Яко тма ослѣпи очи его». Се убо есть тма, еже не видѣти закона Божия како разумѣти. Се убо свѣт, еже разумѣти заповѣди Божия. Како разумѣти, аще не от Писания ли кто наставит? И сего ради нужда належит, яко божественных апостолъ и святыхъ отецъ яко наставникы почитати и молитися имъ, тогда и Писанию вѣровати и из него поучатися. Аще убо сия тако будутъ, яко ты надшен от диявола, прелстился еси, тогда вси человецы яко скоти будут, ничто разумѣюще. Слыши же, Господу нашему Исусу Христу глаголющу о вас во Иоане Богослове: «Не посла Богъ Сына своего въ миръ, да судитъ мирови. Вѣруяй во нь не будетъ осужен, а не вѣруяй осуженъ есть, яко не вѣруяй в имя единороднаго Сына Божия. Сей есть суд, яко свѣт прииде в миръ, и возлюбиша паче тму, неже свѣтъ, бѣша бо ихъ дѣла зла. Всякъ убо дѣлаяй злая, ненавидитъ свѣта». Сия убо доздѣ. Библиотека литературы Древней Руси / РАН. Ин-т рус. лит. (Пушкинский дом) ; под. ред. Д.С. Лихачева и др. - Санкт-Петербург : Наука, 1997-. / Т. 11: XVI век. - 2001. - 681, c. | |
|
| |
| Просмотров: 4 | Загрузок: 0 | | |
| Всего комментариев: 0 | |