| Вчера, 05:57 | |
Не хочешь слушать как люди врут, сам ври В.И.Даль Неправда - ложь Послания Ивана Грозного Ответ Яну Роките 12 убо мое слово Си писалъ еси о иконномъ поклонении, и сие убо твое безумие вкратцѣ обличю тя. Аще ли хощеши истинно увѣдати, прочти во «Царствиих» Льва Исавра иконоборца, и сына его Констянтина Гноитезнаго, и Льва Арменина, и Феофила Богомерскаго, святымъ досадителя, и вся тамо изъяснена обрящемъ о божественных иконнопоклонений, и богомерскаго ихъ сопротивства нечестивыхъ царей, в неже нечестие вы самоволне подастеся. А что ко Второзаконию прибѣгаеши, азъ выше сего писал тебѣ: аще ли к Закону Моисеову прибѣгаеши, то подобает ти вся законная творити. Аще ли едино обрѣзание сотвориши, не токмо вся законная, Христос тебѣ ни въ кую ползу есть. Якоже апостолъ Павел, пиша, глаголетъ к галатомъ: «Яко аще обрѣзаетеся, Христосъ вамъ ни в кую ползу есть. Свидѣтельствую же паки всякому человеку обрѣзающемуся, яко должен есть весь законъ творити. Упразднистеся от Христа, и закономъ оправдаетеся, от благодати отпадаете». А еже убо приводиши от десятисловия, еже «Не сотвориши себѣ подобия ниже на небеси горѣ, ниже на земли низу» – тако и пророцы вси, и аз ти о семъ ползую, яко вся сия о идолех реченно есть. Яко во Исходе Моисеове глаголется: егда скрыжали Моисей приятъ, тогда убо восташа вси людие на Арона и рекоша: «Сотвори намъ боги, иже приидутъ пред нами, Моисей убо изведе нас изъ Египта, не вѣмы, что бысть ему». И тако убо собраша злато, перьсни и серязи у жен своихъ и ввергоша во огнь, и сольяся глава телчая, и поклонишася ему, рекущи: «Сий есть бози твои, изведшии тя из Египта, Израилю». Егда приидоша к Валаку, царю маавску, и како осквернения ради женъ льпоты, ихже вы безумне приасте, женское совокупление, и дѣвство отрицающе, и тако убо тогда июдѣи, прельстившеся женъ ради лѣпоты, «Воелфегору послуживши, и снедоша жертвы мертвыхъ», и Остарти и сидонстей мерзости служивше, и о Хамосе плакашеся; яко рече пророкъ Давыдъ: «Искусиша и прогнѣваша Бога вышняго, и свидѣния его не сохраниша, и обратишася, и отвергошася, якоже отцы их, превратишася в лук развращенъ, и прогнѣваша в холмѣх своихъ и во истуканных своих раздражиша», «смесишася во языцех, и навыкоша дѣла ихъ, и поработаша истуканнымъ их, и бысть имъ в соблазнь; и пожроша сыны своя и дщеря своя бѣсовом, и пролияша кровь неповинную, кровь сынов своих и дщерей, яже пожроша истуканным ханаанскимъ». Якоже Соломон жены ради поклонися идоломъ и отступи от Бога жива, и паки Ероавамль в Самории сотвори двѣ юнницы злате и велѣ имъ поклонитися и людемъ, и пребысть сие поклонение даждь и до разорения Самарии. И много убо о семъ идолопоклонении, о немъже убо пророцы глаголаша и апостоли благовѣстиша. И ты убо посреди святаго и мирскаго не разсудилъ еси, Христову бо икону равно Аполонову идолу судил еси, Богородичну икону равно Диеву судил еси, и прочих святых, ихъже убо идолопоклонение вмѣнилъ еси. Мы же, християнѣ, первообразно, и божественно, и сообразно, и спасению ходатайственъно истинъно почитаемъ и поклоняемъся. Идѣже убо обрящеши о божественных иконахъ жертвеное заколение и кровемъ пролитие? И якоже рече пророкъ: «И да ям мяса юньча или кровь козлию пию? И пожри Богови хвалѣ жертву, и воздаждь Вышнему молитвы твоя». Не сия ли вся о иконах совершается, яже о идолех никакоже не дѣйствуется, понеже убо тамо о идолех требищи, и сквары, и жертвы, и кровемъ пролитие; о иконах – церкви, и духовная молитва, сердечная жертва. Не мни, яко боготворимъ сия, но первообразному почестъ воздаюше, поклоняемся. Ни бо шаровомъ и дщицамъ но образомъ написанымъ Христовымъ, и Богородичным, и всѣмъ святымъ, иже убо на первообразную честъ возводяще. А иже от Моисеова закона глаголеши, аз ти преведу самого Моисея: како убо Моисей два херувима златы содѣла во Святая Святыхъ, како убо и завѣсу истка, на нейже швениемъ вся небесных подобие содѣла, како убо и киотъ завѣта, иже всюду окован златомъ, в немъ стамна имущи, манну и жезлъ Аароновъ прозябший, и скрыжали Завѣта, имже всѣмъ симъ поклоняхуся июдѣи. И не токмо проречение бяше истинныи. И сия тако почитахуся, како убо Святая Святыхъ почиташеся. Егда убо июдѣи хождаху, тогда вси покрывала имяху. И егда убо во Святая Святых вхождаху, тогда покрывала отлагаху. Како убо и воплощение Слова Божия, егда убо Авгарь, Едеский князь на убрусе приат Господне воображение, и како от раслабления недуга воздвиже его. И на самом том одрѣ не могий обратитися, егда Господь нашъ Исус Христосъ посла свое ему воображение на убрусе со апостоломъ с Фадеом. И емуже грядущу со воображением, и егда бысть за 3 поприща от града, и на самомъ томъ одрѣ не могий воздвигнутися, воста простъ и здравъ и ходя на ногу свою, во вратех града срѣте божественное воображение. И колико оттоле от божественаго оного образа содѣяшася многоразличная чюдеса: больнымъ исцеление и бѣсомъ прогнание, воиньствомъ нечестивым побѣждение, благочестивымъ поборание даждь и до разорения Греческаго царства! Колика оттоле от божественаго оного образа содѣя многая различная чюдеса! Аще ли хощеши истинну увѣдѣти, почти царства Греческаго, тамо вся истинна увѣси. Како и кровоточивая она, егда исцелена бысть от раны, и ботомужный образ Христовъ мѣдным лиянием сотвори в мѣру возраста Господня. И много исцеления творящи воображение оно даждь до лѣта сотонинскаго оного служителя и отступника злочестиваго царя Улияна. Что о Лидской церкве, в нейже бысть воображение пречистыя Богоматере с превѣчнымъ младенцемъ на столпѣ от западных вратъ, сию убо церковь составиша апостоли, в нейже воображение то явися, прѣния ради правовѣрных с невѣрными: до коея вѣры явится знамение, тоя вѣры имѣти церковь. Яже убо Божиимъ повелѣниемъ нерукотворенный образъ на столпѣ вообразися, не рукописан бысть, но богописанъ. Яже убо и сама Богомати во плоти суща, тиюже молиша апостоли, да приидет на освещение храму. Она же рече: «Приидѣте, чада, а яз тамо съ вами буду». Они же шедше и преславное то воображение видѣвше, радости бесчисленыя исполнившеся, со слезами молитвы возсылаху творцу всѣхъ Богу. Последи и Богомати пришедшей, свое воображение видѣвше неложно, рекше, сице глаголетъ: «Благодать моя и сила да будетъ с тобою». Сия убо божественное воображение злосмрадный онъ Ульян хотя сокрушити. И елико убо сечцы сечаху камень и тщахуся воображение оно на землю низвергнути, толико убо Божиимъ повелѣниемъ вапы оны невещественую силу вземше, болма бо в камень вхождаху. И до толика содѣяшася чюдеса, елико посланникы бездѣлно отъидоша, воображение оно никакоже низвергнути не могущи, разве сих нѣкто не глатко сѣчениемъ сотвориша. Последи благочестивых руки и сия убо угладиша. И егда бо секоша и углаждаше, вапие шарово никако своего цвѣта премѣншеся, якоже исперва Быша. Что и Енея онъ, иже исцѣлен бысть от Петра и Иоанна. Тако и церкву прекрасну воздвиг, тако и Богоматери образ вообразися, и чюдеса многа содѣяшася. Како и божественный Лука Богоматери образъ написа и к ней принесе. Она же прирекши: «Благодать моя и сила будетъ съ тобою». Еже убо и сия икона, Божиимъ повелѣниемъ здѣ во царствующемъ градѣ Москвѣ сохраняющи християнство, пребываетъ. Что убо реку ти о оной иконѣ Богоматере, юже божественный онъ Германъ патриярхъ Царяграда со оныя с Литцкия преписа, и како немокреными стопами чрез море до Рима шествова? Сами множае можете насъ вѣдѣти, занеже Римская церкви у вас есть. Что убо изреку ти о чюдесѣх, и о исцѣлении недугомъ, и бѣсомъ прогнании, яже от божественых икон и поклонниковъ их содѣяшася? Яже множества ради не могу исписати, – «постигънеот убо мя повѣствующа лѣто» о сицевых, якоже рече апостолъ Павел, ко евреомъ пиша. И аще хощеши истинну видѣти, вся сия в Божественномъ Писании обрящеши. И рцы ми убо, отколе начало и како идоломъ поклонение, и иконно воображение, и коего ради чина? Не первый бо ли Серух идолы поча творити? Ово убо в храбрых имя человекъ, ово в мудрыхъ, ово во иныя ради вещи похвалныя, и онъ убо яко разумен памяти ради похвалы сия творящи. Последи его, не разумѣвше его разума, яко богы твориша я, яко богу идоломъ поклоняхуся, се и самыя тыя идолы боги нарицаху. Се убо мерско есть и отречено пророкы Божиимъ повелѣниемъ, понеже убо идолы творяхуся во имя скверных человекъ: ово убо блудникомъ, инии пияницы, инии же разбойницы, татие и гудцы. Божественое воображение – убо воображение Спаса и Господа нашего Исуса Христа, яко симъ образомъ изволи воплотитися и спасти нас. Пречистая его Богомати – яко сподобльшияся таковѣй божественей тайне послужити и огнь божественей нетѣсно в ложеснах своихъ приимши, яко ходатаица спасению роду нашему, еюже к Богу примирихомся. И сего ради образу ея поклоняемся. Небесных силъ – яко ходатаи спасению нашему. Всѣхъ святых воображении на иконахъ почитаемъ сего ради, яко совершителя заповѣдемъ Господнимъ, наставникы. И сами ревнующе благочестию, подражатели и соверьшители желаемъ быти. Сия убо о иконах. Яже о идолех, таковая не можеши указати, иже разньствуетъ бо иконно поклонение со идольскимъ бѣсованиемъ. Глаголи же ми, яко можеши ли таковая чюдеса показати о идолех и, якоже о иконах, исцеления человеком? Иже тебѣ иконному поклонению яко псу не вѣрующу, по Господни заповѣди, не подобает пред тобою святая глаголати. А что еси писалъ о Иоаннове послании о иконах, и во Иванновѣ послании писано: «Чадца, хранитеся от требъ идолских!» А о иконах во Иоанновѣ послании не писано. И то еси писал ложно. А что еси написал, что за то Богъ карал грозно, которыя образы ставят, и мы того в Божественномъ Писании нигдѣ не нашли. А что еси писал о вознесении Господни, и та строка к тому не стоитъ. А что писалъ апостолъ Павелъ, «что телеса наша – церкви Богови, в нихже Духъ Божий живет». А иже о Петрѣ и о Корнилии глаголал еси, и яже в Богослове во Откровении о аггелѣ, и сия смирения ради. Понеже убо и самъ Господь нашъ Исус Христос, егда преобразися на горѣ, и сходящу з горы, заповѣда ученикомъ своимъ, глаголя: «Никому повѣдати видѣния, дóндеже Сынъ человеческий из мертвых воскреснетъ». Сего ради показует Господь смирения и научая смирятися, да никто себе самъ превозноситъ. Сего ради и аггелъ Богословца воздвизаетъ – смирения образ научаетъ. Тако и Петръ к Корнилию – ради смирения. И аще бы сие сице было, якоже ты глаголеши, то гдё хощеши положити, иже трикратнемъ вопрошением Господнемъ кратно отвержение Петрово исправися, иже: «Паси овца моя»? И аще не покланяетеся и не хвалите, паки какой пастве быти! Смотри же, како и власть имѣютъ апостоли святии. И рече Господь во Евангелии къ Петру: «И дамъ ти ключь Царствия Небеснаго. И елико убо свяжеши на земли, связаны суть на небесѣхъ, и елика аще разрѣшишы на земли, разрѣшена суть на небесѣхъ». Видиши ли, яко и небесное началство апостолскому и святительскому начальству подложно суть. И яко во 2-законии Илья затвори небо и не бысть дождя лѣт 3 и месяцъ 6, токмо глаголомъ усть пророчих. Яко обычай благодати, видиши ли, Божии послушати угодниковъ своихъ. А писалъ еси о Павле и о Варнаве, и они того ради возбранили, что жерцы идолския хотѣли имъ жертву принести что идоломъ. И они потому возбранили, а они не тако ихъ почитали, како подобаетъ святыхъ почитати. А что писалъ еси, что не подобаетъ кромѣ Бога святыхъ на помощь призывати, ино написано есть во Евангелии: «Видѣв же Господь народ многъ, милосердова о нихъ, яко смятени бяху и отвержени яко овца, не имущи пастыря». Тогда глагола учеником своимъ: «Жатва убо многа, дѣлателей же мало. Молитеся Господину убо о жатве, яко да изведет дѣлателей на жатву свою». «И призва оба на 10 ученики своя, дасть имъ власть на дусех нечистых, яко да изгонять, и исцѣляти всяк недугъ и всяку болѣзнь». И ты видиши ли, какову дасть власть Господь ученикомъ своимъ и святителемъ, не яко не могий спасти человеки, но сходя к немощем их, к неразумѣнию, и сими наставляя человеки на истинный путь, яже выше о семъ писано. А еже от Давыдова псалма глаголеши, и сия вся о идолех писано, а не о иконахъ. А что писалъ еси, что нѣколико сотъ лѣтъ образовъ не бывало, и писал еси ложно. От Христова воплощения почалися образы и донынѣ. А что писалъ еси о святемъ епискупе о Епифанѣ Кипрьскомъ, буде онъ на полотенце образ терзал нѣкоего святаго, и то писано ложно. А то написание еретическое и во истинных християнех не приемлется. Воспомяни и самого Епифания, аще ко отеческому учению притекаеши, како последи епископъ бысть во острове Кипрьскомъ, идѣже много иконнаго поклонения исполнено бысть бяше в Кипрьскомъ островѣ, и поклоняхуся много. А егда поставлен Епифаний епископом Кифрия града Паппосом епископомъ, тогда избрание его бысть дивно, понеже убо от явления подвигошася духомъ святии отцы, обрѣтоша его на торжищи, идѣже Божие воображение купуется. В та бо времена пребожественный Златоустъ бысть, и той рече: «И восколиянно воображении почитаю». Великий Василий глаголетъ, преже сихъ бывъ, яко почесть образа на первообразная восходит. А что в вашей странѣ дѣется о образѣхъ, и азъ о томъ глаголати не хощу, како есте подалися в бѣсовскую прелесть, и о том сами вѣдаете. Яко рече божественный апостолъ Петръ в послании: «Судъ вашь не укоснит, и огонь не угаснетъ». А что писалъ еси от Дѣяний святыхъ апостолъ о апостоле Петрѣ, и то не к тому еси писал, в Дѣянии апостолских того не писано, и то есть писал ложно. Сия убо доздѣ. Библиотека литературы Древней Руси / РАН. Ин-т рус. лит. (Пушкинский дом) ; под. ред. Д.С. Лихачева и др. - Санкт-Петербург : Наука, 1997-. / Т. 11: XVI век. - 2001. - 681, c. | |
|
| |
| Просмотров: 2 | Загрузок: 0 | | |
| Всего комментариев: 0 | |