Ответ Яну Роките 13 убо мое слово
Вчера, 05:10

Не хочешь слушать как люди врут, сам ври В.И.Даль Неправда - ложь

Послания Ивана Грозного

Ответ Яну Роките 13 убо мое слово

А что писал есть о дѣвстве и о браку, и ты не то писал, в чемъ азъ тебе вопрашивал. Азъ бо тя вопрашивал въ томъ, како держите дѣвство, и брак, и блуд, и ты не по тому писалъ. А что еси писал, и о томъ пишетъ Иоаннъ Богословъ во своемъ  послании: «Аще кто вѣрует въ Господа Исуса Христа, в плоть пришедша, и глаголяй, въ немъ пребывати должен есть». Якоже онъ ходилъ есть, намъ такоже ходити. А Христос жены не имѣл, и апостоли вси женъ не имѣли. Аще ли Петръ тещу и жену имѣл, и сия до послѣдования Христова. Егда послѣдова Христови, тогда чистоту храняше, и тещу убо имѣ яко матерь, и жену яко сестру. Тако и Филиппъ от 7 дияконъ, и 4 дщери имяше пророчицы. И егда не послѣдова Христу, тогда сия роди, егда Христу послѣдова, тогда в чистотѣ пребысть. И дщери его дѣвство храняху, и мужьское усердьство восприимше, и пророческаго дару сподобишася, и слово Божие со апостолы проповѣдаху. Что убо и о мироносицахъ, не вся ли дѣвству послѣдоваша? Не токмо совершися в мужстемъ полу, но и в женстем.

На два убо чину в нас лежит християнское пребывание: на дѣвственно убо и просто. И обѣщавшимся дѣвствовати, подобает имъ хранитися брака и мяс, не яко гнушения ради, но виною воздержания. А не обѣщавшимся дѣвствовати, аще и браку и мясомъ причастятся, нѣсть имъ возбранения, аще и заповѣди Христовы сохранятъ, понеже бо не едины заповѣди есть инокомъ и мирскимъ. А обещавшимся дѣвствовати и не сохраняющимъ заповѣди, пишетъ о сих апостолъ Петръ: «Лутче бы имъ не познати пути правды, нежели познавше, возвратитися имъ от преданныя имъ святыя заповѣди. Случи бо ся имъ истинная притча: песъ, возвращься на своя блевотины, и свиния, омывся – в кале тимѣния». Господу нашему Исусу Христу о дѣвстве глаголющу и о браку: «Сего ради человекъ оставит отца своего и матерь, и прилепится к женѣ своей, и будета оба в плоть едину, яко к тому нѣсть два, но плоть едина. Иже убо Богъ сочета, человекъ да не разлучаетъ». И паки: «Аще пустит жену свою, аще развѣ словесе прелюбодѣйнаго, и оженится иною, прелюбы творитъ, и женяйся пущеницею, прелюбы дѣет». Сия убо о бракѣ. О дѣвстве же сице и евангелистъ Матфей пишетъ: «Глаголаша ему ученицы его: Аще вина человеку тако с женою, уне есть не женитися. Рече имъ Исус: не вси вмѣщаютъ словесе сего, но имъже дано есть. Суть скопцы, иже изъ чрева матерня родишася таки; и суть скопцы, иже ископишася от человекъ; и суть скопцы, иже ископиша сами себе Царствия ради Небеснаго. Могий вмѣстити, да вмѣстит».

Избранный сосудъ апостолъ Павелъ, к римляном пиша, глаголетъ: «Нынѣ убо ближайшая намъ спасения, или егда вѣровахомъ. Нощь успе, а день приближися. Отверземъ убо дѣла тмы и облецемся во оружие свѣта. Яко во дне, благообразно ходимъ: не козлогласовании и пиянства, ни любодѣянии и студодѣянии, ни рвениемъ, ни завистию, но облецетеся Господемъ Исусом Христомъ, и плоти угодия не творите в похоть». И паки тойже Павелъ, къ коринфомъ пиша, глаголетъ: «О них писасте ми, добро человеку женѣ не прикасатися. Любодѣяния ради, кождо свою жену да имать, и каяждо свой мужь да имать. Мужь женѣ должную любовь да воздает, тако и жена мужу. Жена своимъ тѣломъ не владѣетъ, но мужь, тако и мужь своимъ тѣлом не владѣет, но жена. Не лишась другъ друга, точию от согласия, ко времени, да празднуйте въ постѣ и въ молитвѣ, и паки вкупе збирайтеся, да не искуситъ васъ сатана за невоздержание ваше. Се глаголю по совѣту, а не по повелѣнию. Хощу бо, да вси человецы будут, якоже и аз, но кождо свое дарование имать от Бога, ово убо сице, ово сице. И глаголю юнотамъ и вдовицамъ, добро имъ есть, аще пребудуть яко и аз. Аще ли не воздержаютца, да посягаютъ. Лучши бо есть женитися, нежели разжизатися. А оженшимся, заповѣдую не аз, но Богъ, женѣ не разлучатися; аще ли и разлучится, да пребывает без мужа, или съ мужемъ да смирится. И мужу жены не отпущати». «О юнотах и дѣвах повелѣния Господня не имамъ и совѣть даю, яко помилован от Господа вѣренъ быти. Мню убо се добро быти за настоящую нужьду, яко добро человеку, иже тако быти. Привязаеши ли ся женѣ? Не ищи разрѣшения. Отрѣшся жены? Не ищи иныя. Аще ли и оженишися, не согрѣшил еси; и аще посягнет дѣва, не согрѣшила есть. Скорбь плотию имѣть начнут таковии». «И хощу вас беспечальны имѣти и быти. Не оженивыйся печется о Господних, како угодити Господеви; а оженивыйся печется о мирскых, како угодити женѣ. Раздѣлися жена и дѣва: не посягшия печется о Господних, яко да есть свята тѣломъ и духомъ, а посягшия печется о мирскыхъ, како угодити мужу. Се къ ползе вамъ самѣмъ глаголю, не да силу вамъ наложу, но ко благообразию и благоприступанию Господеви безмолвно. Аще ли кто не благообразѣ образѣ дѣву свою мнитъ, аще есть преходница, и тако должна есть быти, и хощетъ, да творитъ, не согрѣшаетъ, да посягнетъ. А иже стоитъ твердо сердце, не имый нужду, власть имать о своей воли, и се разсудил есть в сердцы своемъ блюсти свою дѣву, добрѣ творитъ. Тѣмъ вдаяй къ браку свою дѣву, добрѣ творит, а не вдаяй – лутчее творитъ. Жена есть привязана закономъ, въ нелико время живет мужь ея; аще ли умрет мужь ея, свободна есть, за негоже хощет посягнуть, точию о Господе. Блаженънѣйша есть, аще тако пребудетъ, по моему совѣту. Мню бо, и аз Духъ Божий имый».

Сии убо написах ти, како убо подобаетъ брак хранити. А о немже вопрошах тя сего ради, яко слышахомъ о семъ, яко инии в васъ блудъ ни во что пологаютъ и грѣха в семъ не творятъ. И сихъ убо обличая, глаголетъ верховный Петръ апостолъ: «Вѣсть Господь благочестивыя от напасти избавляти, неправедники же в День судный мучимы блюсти, паче во слѣдъ похоти плотския сквернения ходящая, и о господстве не радящая, продерзателе, себе угодни, славы не трепещутъ, хуляще, идѣже аггели, крѣпостию и силою больши сущи, не терпят на ся Господа хулна суда. Сии яко скоти животнии естествомъ бывше в погибели и тля, въ нихже не вѣдяще и хуляще, во истлѣниихъ истлѣютъ. Приемлюще мзду неправедну, сласть меняще дневную пищу, сквернителы и порочницы, питающеся лестми своими, ядуще съ вами. Очи имуще исполнь любодъяния и непрестающе грѣха, льстяще душа неутвержены, сердце научено лихоимству имущи, клятве чада! Оставльше правый путь, прелстишася, послѣдоваша пути Валаамову Восорову, иже мзду неправедну возлюби, обличение имѣ своего беззакония: яремникъ безгласен человеческимъ гласомъ провѣщавъ, возбрани пророку беззакония. Сии суть источницы безводни, облацы и мглы от вѣтра приносими, ихъже мракъ тмы во вѣки блюдется. Прегордая бо суетию вѣщающе, прелщаютъ въ похоти плоти нечистот, иже воистинну отбѣгшая и въ прелести живущая. Свободу имъ обѣщевающе, сами раби суще тлѣнию».

А еже о иноческомъ жительствѣ писалъ еси, и то начася от апостолъ. Господу нашему Исусу Христу о семъ глаголющу въ Матфѣе, зачало : «Иже любитъ отца или матерь паче мене, нѣсть мене достоинъ; иже любитъ сына или дщерь паче мене, нѣсть мене достоинъ. И иже не прииметъ креста своего и во слѣдъ мене грядетъ, нѣсть мене достоинъ». И паки, глава : «Аще кто хощетъ по мнѣ итти, да отвержется себе, и возмет крестъ свой, и по мнѣ грядет». Въ Луцѣ, глава 54: «Аще кто грядетъ ко мнѣ и не возненавидитъ отца своего и матерь, жену и чад, и братию, и сестръ, еще и душу свою, не можетъ быти мой ученикъ. Иже не носитъ креста своего и вослѣд мене грядет, не можетъ быти мой ученикъ». «Тако убо всяк от васъ, иже не отречется всего своего имѣния, не может быти мой ученикъ». Избранный сосуд апостолъ Павелъ, къ римляномъ пиша, глаголетъ о семъ: «Елицы крестихомся во Христа Исуса, в смерть его крестихомся. Спогребохомся убо с нимъ крещениемъ въ смерть, да, яко воста Христос от мертвых со славою Отчею, тако и мы во обновлени жизни ходити начнемъ. Аще убо образни быхомъ по подобию смерти его, то и воскресению будемъ, се вѣдуще, яко ветхий нашъ человекъ распятся, да упразнится тѣло грѣховное, не к тому работати намъ грѣху, умерый бо оправдися от грѣха. Аще ли умрохомъ со Христомъ, вѣруемъ, яко живи будемъ съ нимъ, вѣдяще, яко Христос, воста от мертвых, уже не умрет, смерть ему уже не удолѣет. Еже убо умрет грѣхови, умретъ единою, а иже живетъ – Богови. Тако и вы причитайте себе и мертвымъ убо быти грѣху, живемъ же Господеви о Христе Исусе Господе нашемъ. Да не царствует убо грѣхъ в мертвенномъ вашемъ тѣле, послушати его в похоти его. Ни приставляти уды ваша оружия неправдѣ грѣху, но представляйте себе Богови, яко от мертвыхъ живы, и уды ваша – оружие правдѣ Богови. Грѣхъ бо вамъ не удолѣет, нѣсте бо под закономъ, но под благодатию». «Вся ми лѣть суть, но не вся на пользу. Вся ми возможна суть, но не аз обладан буду от кого. Брашна чреву, и чрево брашномъ, Богъ же и сия да упразднит. Тѣло не любодѣянию, но Богови, и Господь тѣлу. Богъ же и Господа воздвиже, и нас совоздвигнетъ силою своею. Не вѣсте ли, яко тѣлеса ваша удове Христови суть? Тѣм ли убо уды Христовы, сотворю любодѣица. Да не будетъ. Или не вѣсте, яко прилепляяйся любодѣицы, едино тѣло есть? Будета бо, рече, оба в плоть едину. Прилепляяйся Господеви, единъ духъ есть. Бѣгайте любодѣяния; всяк бо грѣхъ, аще сотворит человекъ, кромѣ тѣла есть, а творяй любы в свое тѣло согрѣшает. Или не вѣсте, яко телеса ваша храмъ иже в вас Святому Духу есть, имате от Бога, и нѣсть себе? Куплени бе есте ценою. Прославите Бога в тѣле вашемъ и в дусѣ вашемъ, яко суть Божия». «И мнѣ да не будетъ похвалитися, токмо о крестѣ Господа нашего Исуса Христа, имже миръ распятся, и азъ мирови. О Христѣ бо Исусѣ ни обрѣзание что может, ни необрѣзание, но нова тварь. И елици правилемъ семъ приложатся, мир на них, милость, на Израиля Божия. Прочее, труды да никто дает ми, аз бо язвы Господа Исуса на тѣле моемъ ношу». И рцы ми, кто недуги исцели, кто болныя востави, кто мертвыя воскресы, кто смертно испи, не вреди ся, кто бѣсы прогна, не вреди ся, и прочая по Евангелию? Не вся ли иноческаго суть натрижения? Сия убо доздѣ.

Библиотека литературы Древней Руси / РАН. Ин-т рус. лит. (Пушкинский дом) ; под. ред. Д.С. Лихачева и др. - Санкт-Петербург : Наука, 1997-. / Т. 11: XVI век. - 2001. - 681, c.

 

Категория: Послания Ивана Грозного | Добавил: coldaevatatyana2016 | Теги: 13 убо мое слово, Послания Ивана Грозного, Ответ Яну Роките, дополнения, К пословицам
Просмотров: 2 | Загрузок: 0 | Рейтинг: 0.0/0


Всего комментариев: 0
avatar