| Вчера, 07:02 | |
Не хочешь слушать как люди врут, сам ври В.И.Даль Неправда - ложь Послания Ивана Грозного Ответ Яну Роките 1 убо мое слово О вашемъ учителе Люторе, яко убо в житии его имя себѣ прилично сочета. Воистинну бо Лютор, иже «лютъ», глаголется. Люто бо, люто, иже краеугольнему камени Христу приражатися, и его божественныя уставы разоряти, и божественных его ученикъ и апостолъ проповѣди разсецати, и священныхъ отецъ уставы превращати. И разно убо козньствующе всякое Божественное Писание и неистинно исповѣдуете. Якоже убо Сатанаил отверженъ бысть с небесе и вмѣсто аггела свѣтла тма и прелесть наречется, и аггели его бѣсове нарицахуся, тако убо и вы. Яко началникъ бѣсомъ и имя Сатана, тако и вашему началнику имя Лютор, якоже ангели его именуются бѣсове, тако и вы – кознодѣи. Яко рече избранный сосуд апостолъ Павелъ: «Не чудно бо, яко преобразуяся Сатана во аггела свѣтла, тако и служители его, яко служителя правды». Яко учитель нашъ Исус Христос рече: «Внемлите от лживыхъ пророкъ, приходящих къ вамъ во одеждах овчиихъ, волцы суть внутрь и хищницы. От плод ихъ познаете ихъ», сиирѣчь от учения ихъ, кои от Бога есть и кое лестное учение (а не яко скажется учителемъ, имѣя одѣяния смирения, внутрь дыхает злобою лукавых нечестивых учения). И яко во Иоанне реченное: «Не входяй дверми во дворъ овчий, но прелазя инудѣ, той есть тать и разбойникъ. А входяй дверми пастырь есть овцамъ. Сему дверникъ отверзаетъ, овца гласа его слышатъ». Тако убо и вы чрез переграду божественнаго учения прелѣзше, и на учительскомъ мѣстѣ ставше, и своим учениемъ Христовы словесныя овца, ихже искупи своею честною кровию, яко татие крадѣте и разбиваете, понеже убо дверми не внидосте ни коимъ повелѣниемъ. Яко убо дверник Христос рече верховному апостолу Петру: «Паси овца моя». И сия убо трикраты провозгласи трикратнаго ради отвержения и всѣмъ покаянию начало показуя, еже вы спасение отвергосте. И паки индѣ глаголетъ верховному апостолу Петру: «И дам ти ключь Царства Небеснаго. Елико аще свяжеши на земли, связана суть на небесѣхъ. Елико аще разрѣшиши на земли, разрѣшена суть на небесѣхъ». И по сихъ божественный апостолъ Петръ власть приим от всѣхъ владыкы Христа, тако и своимъ ученикомъ преподасть, и епископы по градомъ постави, сиирѣчь посѣтители, даже и до нас доиде. И сия убо дверми вшедше, и дверъникъ Христосъ отверзе имъ двери, и овца Христовы кождо по своей силѣ пасоша. Вы же, от самовольства вземшеися, и на учителство воскочисте, и дверми не внидосте, сего ради татие и разбойницы нарицаетеся. Сия убо доздѣ.
Библиотека литературы Древней Руси / РАН. Ин-т рус. лит. (Пушкинский дом) ; под. ред. Д.С. Лихачева и др. - Санкт-Петербург : Наука, 1997-. / Т. 11: XVI век. - 2001. - 681, c. | |
|
| |
| Просмотров: 2 | Загрузок: 0 | | |
| Всего комментариев: 0 | |